Tosha anto periodikɛ yasambisha akambo wa mɛtɛ
1. Naa ɔkɛndɛ wa Tshoto y’Etangelo la Réveillez-vous !?
1 Tshoto y’Etangelo mbewoyaka Diolelo diaki Jehowa la Réveillez-vous ! ekɔ dihomɔ dioleki kamba laso l’olimu w’esambishelo ndo wa mbetɛ anto ambeki. (Mat. 24:14; 28:19, 20) Sho ngɛnangɛnaka mbisha anto mbala la mbala periodikɛ hiende ya la wonya shɔ etena kashaso lonya lo toho totshikitanyi t’olimu wa Diolelo.
2. Etshikitanu akɔna wambosalema lo Tshoto y’Etangelo ndo lo Réveillez-vous !, ndo lande na?
2 Lo edja ka ɛnɔnyi, tambɛna etshikitanu lo kɛnɛ kendana la woke ndo lo awui wa l’etei ka periodikɛ shɔ kâmɛ ndo lo toho takamba laso dia ndjikahanya. Etshikitanu ɛsɔ wambosalema la oyango w’anto ndeka ngɛnangɛna periodikɛ yakɔ ndo dia yɔ ndeka monga la etombelo w’ɛlɔlɔ l’oyango wa losango la Diolelo munanda etema ‘w’anto wa weho tshɛ, dia vɔ shimbamɛ ndo kondja ewo k’oshika k’akambo wa mɛtɛ.’—1 Tim. 2:4.
3. Ngande wayotokambaka la periodikɛ l’esambishelo?
3 Tatɛ lo Ngɔndɔ ka ntondo 2006, taya la diewo lo kamba la mbɔtwɛlɔ yotshikitanyi dia mbisha anto numɛlɔ ɔtɔi ka Réveillez-vous ! lo ngɔndɔ. Kakianɛ tayokambaka nto la mbɔtwɛlɔ yotshikitanyi dia mbisha anto numɛlɔ ɔtɔi lo numɛlɔ hiende ya Tshoto y’Etangelo mbewoyaka Diolelo diaki Jehowa yatomba lo ngɔndɔ lo esambishelo kaso ka lo sɛkɛ. Bɛnyɛlɔ dia mbɔtwɛlɔ dia periodikɛ tshɛ tanemaka lo lɛkɛ l’ekomelo la Olimu aso wa Diolelo. Mbala efula mbɔtwɛlɔ shɔ tɛkɛtaka di’asawo wa mbɔtwɛlɔ wa lo periodikɛ, koko lo tena dimɔtshi asawo akina wangɛnyangɛnya anto efula tɛkɛtamaka. Sho kokaka kamba la mbɔtwɛlɔ yatoshawɔ shɔ lo yoho ya dimɛna naka sho manyamanya awui wele lo sawo diatɛkɛtama lo ɛnyɛlɔ ka mbɔtwɛlɔ ndo naka tayokamba l’ɛtɛkɛta aso hita dia mbɔtɔnganyiya mbɔtwɛlɔ kaso la awui wa l’ɛtshi kaso ka nkɛtɛ.
4. Lande na kele kokaka monga ohomba kamba la mbɔtwɛlɔ nkina lâdiko dia nyɛ yonga lo Olimu aso wa Diolelo?
4 Kânga mbele Olimu aso wa Diolelo mongaka la mbɔtwɛlɔ hiende dikambo dia periodikɛ tshɛ, tanyengengake dia kamba la mbɔtwɛlɔ kekina. Ɔkɔkɔ ɔmɔtshi wakokanyu sala ngasɔ ko asawo akina mbeyaka ngɛnyangɛnya anto wa lo ɛtshi kanyu ka nkɛtɛ. Kana nyu mbeyaka mɛna dia nyayokoka sala mbɔtwɛlɔ ka dimɛna naka nyu kamba la asawo amɔtshi waleka nyɔngɛnyangɛnya.
5. Kakɔna kahombayɛ salaka la ntondo ka wɛ nɔngɔsɔla mbɔtwɛlɔ kɛmɔtshi kendana la periodikɛ kashaso anto?
5 Woho wa nɔngɔsɔla mbɔtwɛlɔ kayɛ: Ntondotondo, wɛ pombaka manyamanya sawo diakayasɔnyi dia tɔtɛkɛta. Ondo aha mbala tshɛ mbayoyongaka l’akoka wa manyamanya oseka sawo tshɛ dia lo periodikɛ la ntondo ka wɛ kamba latɔ l’olimu w’esambishelo. Koko, wɛ pombaka tɛkɛta asawo wakayasɔnyi la wangasanu tshɛ ndo woho wokoyɔtɛkɛtaka. Wɛ kokaka sala dui sɔ onyake paka etena kayoyomanyamanya awui wele lɔkɔ.
6. Ngande wakokaso nɔngɔsɔla mbɔtwɛlɔ yaso hita?
6 Dui dia hende, etena kalɔngɔsɔlayɛ ɛtɛkɛta ayɛ wa mbɔtwɛlɔ, lɔngɔsɔlawɔ lo yoho yakokawɔ mbɔtɔnɛ la mbɔtwɛlɔ yotshikitanyi. Dia tatɛ sawo, wɛ mbeyaka kamba la dimbola dimɔtshi diemula nsaki diɔtɔnɛ la sawo diakɔ. Yaɛkɛka mbala tshɛ lo wolo wele la Ɔtɛkɛta wa Nzambi dia minanda etema w’anto. (Heb. 4:12) Sɔna divɛsa dimɔtshi diɔtɔnɛ la sawo diɔtshiyayɛ, djekoleko divɛsa dimɔtshi dioshilami ɛtɛkɛta adiɔ kana dikina diele lo sawo diatɛkɛtayɛ. Sɛdingola woho wakokayɛ mbɔtɔnganyiya divɛsa diakɔ la sawo.
7. Ngande wakokaso ndeka ndowanya mbɔtwɛlɔ yaso?
7 Lo oseka diaaso tshɛ: Dia mbɔtwɛlɔ ndeka monga dimɛna, wɛ pombaka kamba latɔ. Sambishaka kâmɛ la etshumanelo Nshi ya samalo yakahanyema periodikɛ. Sha anto wakalongola ekanda ekina periodikɛ. Mbala tshɛ, shaka ambeki ayɛ wa Bible ndo anto akina wakoka monga lâwɔ etena kasalayɛ waendelo w’eyoyo periodikɛ. Wɛ mbeyaka monga l’akoka wa mbisha anto wasawola la yɛ etena katayatshu lo lobingu, keyɛ lo lɔkɛndɔ kana keyɛ la lopitadi periodikɛ. Tayolowanya mbɔtwɛlɔ yaso naka sho kambaka la yɔ lo ngɔndɔ k’otondo.
8. Lo toho takɔna tele Tshoto y’Etangelo la Réveillez-vous ! tojurnalɛ ta lânde?
8 Tshoto y’Etangelo la Réveillez-vous ! ekɔ periodikɛ ya lânde. Yɔ tombolaka Jehowa oko wende Nkum’Olongo. (Etsha 4:24) Yɔ sambaka anto la lokumu l’ɔlɔlɔ la Diolelo diaki Nzambi ndo keketsha mbetawɔ kawɔ le Yeso Kristo. (Mat. 24:14; Etsha 10:43) Ndo nto, yɔ tetemalaka mbidja yimba lo awui wa lo andja ɔnɛ etena katawakotsha prɔfɛsiya ya lo Bible. (Mat. 25:13) Tokimanyiya anto wa lo ɛtshi kaso ka nkɛtɛ dia vɔ kondja wahɔ oma lo tojurnalɛ tɔsɔ lo ndjalɔngɔsɔlaka dia tisha anto lo oseka diaaso tshɛ!
9. Ngande wakokaso tshika dui dimɔtshi dia ndjosala wendelo w’oyoyo?
9 Etena katondoyayɛ dia mbisha onto periodikɛ kɛmɔtshi kana naka wɛ oma la sawola l’onto ɔmɔtshi la lɔngɛnyi tshɛ sawo dimɔtshi di’awui wa lo nyuma, lɔngɔsɔla dimbola kana dui dimɔtshi diakoka tshutshuya onto dia nde kana yimba diakoka kosha diaaso dia ndjosala wendelo w’oyoyo ndo dia ndjosawola la nde mbala kekina. Naka tekɔ l’ohetoheto lo wonelo wa tɔngɔ y’akambo wa mɛtɛ, kete sho kokaka ndjashikikɛ dia Jehowa ayodihola etema w’anto wele la nsaki ka mɛtɛ ka Mbêya ndo Mbokambɛ.—1 Kor. 3:6.