Periodikɛ Mbewoyaka Diolelo
1 Ɛmɛnyi wa Jehowa mbeyamaka lo woho wasambishawɔ Diolelo diaki Nzambi l’ohetoheto. Tshoto y’Etangelo la Réveillez-vous!, periodikɛ yatatakahɛ anto, yekɔ ohomba efula dia kimanyiya miliyɔ y’anto dia vɔ mbeya asangwelo waki Nzambi. Losango lele lɔkɔ lekɔ mɛtɛ lokumu l’ɔlɔlɔ, nɛ dia lɔ mbewoyaka ɔnɛ Diolelo diaki Nzambi dia l’olongo mbele tshɔi yakɔ y’elongamelo le anto tshɛ.
2 Periodikɛ shɔ tɛkɛtaka di’ehomba wa mɛtɛ wele l’anto, ɛnyɛlɔ oko: ehomba wa lo tokanyi, wa lo demba, ndo wa lo nyuma. Lam’ele ɛlɛmbɛ ndo lɔsɛnɔ la nkumbo lekɔ lo talana ndana tsho l’ahole tshɛ, Tshoto y’Etangelo la Réveillez-vous ! kimanyiyaka ambadi ayɔ dia vɔ ndowanya nsɛnɔ yawɔ lo mbaɛnya woho wa kitanyiya awui wa lo Bible. Tayɔngɛnangɛna dia ndɛkɛ anto periodikɛ Ngɔndɔ ka Tanu la ka Samalo.
3 Yɔ Mɛtɛ Kotolaka Anto: Tshoto y’Etangelo la Réveillez-vous ! tanemaka suke la l’ɛtɛkɛta tshɛ wa l’andja. Diɔ diakɔ dieyamayɔ dimɛna. Ɛkɔkɔ ɛmɔtshi wangɛnangɛna anto periodikɛ shɔ vɔ ɛnɛ:
◼ Oko wetɔ tojurunalɛ tele la kɔlamelo ndo tata akambo wa mɛtɛ, tɔ mɛnyaka hwe otshikitanu wa l’asa ɔlɔlɔ la kɔlɔ.
◼ Tɔ mbishaka anto elongamelo ka vɔ sɛna lo paradiso kayonga l’akambo wa losembwe, oko wakalake Nzambi di’anto wa la nkɛtɛ nɔmbwama la Diolelo diande.
◼ Tɔ ndola la nsango ya vwavwa y’awui weta l’andja w’otondo, awui wendana la weho w’anto tshɛ ndo wa dishidimikwelo tshɛ.
◼ Tɔ tekɔ l’asawo w’eshika, washa anto wetshelo, wata awui watshama mɛtɛ, wahatshutshuya anto l’awui wa lohetsho kana wa kɔlɔ.
◼ Esato wamɛna wa lɔkɔ kotolaka anto mbala kakɔ ɔtɔi, ndo asawo wa lɔkɔ bu wolo mbadia nɛ dia wakafundama lo yoho yokɛma hwe.
4 Kahanyayɔ Efula: Dia mbisha anto periodikɛ efula, sho la dia nɔngɔsɔlaka asawo la ekongelo kaso ka wenya dimɛna, ndo nɔngɔsɔla olimu aso w’esambishelo. Wakatosha tokanyi t’ɛlɔlɔ l’Olimu Aso wa Diolelo wa Ngɔndɔ ka Tanu 1997, tokanyi tahombaso vusola nto ndo kamba latɔ.
5 Yaekesanyiya Dimɛna la Periodikɛ: Lam’adiayɛ numɛlɔ tshɛ, kanyiya onto ɔmɔtshi layɔngɛnangɛna kondja periodikɛ kɛmɔtshi. Yanga tokanyi l’avɛsa amɔtshi w’eshika wakokayɛ kamba lawɔ dia sawola l’onto. Kanyiya wombola ɔmɔtshi wakokayɛ kamba lawɔ dia tatɛ sawo ndo memula saki k’onto oya lo sawo diakɔ.
6 Ɔtɔnganyiya Sawo Diayɛ: Lɔngɔsɔla sawo dia wɔdu, diakokayɛ tshikitanya naka wɛ la pami, omoto, opalanga, dikɛnda mambohomana, oyadi wɛ mbeyaka kana bu.
7 Ongaka Wonya Tshɛ la Tshoto y’Etangelo ndo Réveillez-vous !: Nɛ dia periodikɛ kokaka mbɔtɔ lo tapa, lo tshapatapa, kana lo dibenga, sho kokaka tiɛmbaka wonya wɛngɔlaso kana watatasombe diangɔ. Wonya wasawolayɛ l’ewotɔ ayɛ, asukanyi ayɛ, wanɛ wakamba la yɛ, asekɛ wa la kalasa, kana embetsha, shawɔ periodikɛ yakɔ. Sɔna lushi lɔmɔtshi l’atei a lomingu dia mbishaka anto paka periodikɛ tsho.
8 Ɔsaka Periodikɛ la Nɛmɔ: Yɔ hayoshisha nɛmɔ diayɔ pondjo. Kânga periodikɛ yay’edja, nsango ya lɔkɔ hayoshile nɛmɔ. Lo mɛtɛ, naka sho mbidja weolo wa lânde dia mbisha anto numɛlɔ tshɛ kalongolaso, kete hatotɔmɔtshaka numɛlɔ y’edjedja yele laso.
9 Esambishelo ka l’Ɛsɛsɛ Mbishaka Etombelo w’Ɔlɔlɔ: Ɔsɔ ekɔ yoho mɔtshi yoleki ɔlɔlɔ ya mbisha anto efula periodikɛ. L’atei a lomingu, apandjudi amɔtshi sambishaka mbala la mbala lo toshinga ta weke tele la waa makashinyi.
10 Mbilo Yandawɔ Okanda Yekɔ Dimɛna Efula: Lam’asambishaso lo waa makashinyi, sho tanaka anto suke la dihole tshɛ. Amundji efula w’ekanda wekɔ la loshilambo, ndo efula mbetawɔka periodikɛ l’ɔngɛnɔngɛnɔ. Tɛnya omindji akɔ w’okanda wambohomana laso asawo wendana l’okanda ande.
11 Anto Efula Mbetawɔka Periodikɛ Mbala la Mbala ndo Vɔ Kokaka Ndjokoma Ambeki wa Bible: Lam’ele tɔ tombaka mbala hiende ngɔndɔ tshɛ, sunganaka sho kalola dia ndjenda anto watiada ndo mbasha periodikɛ y’eyoyo. Sho la dia kalolaka dia tenda anto asɔ, aha paka dia tatshikɛ periodikɛ tsho koko dia tolomialomia saki kawɔ lo Bible. Sho kokaka ndjeka Bible l’anto walongola periodikɛ mbala la mbala.
12 Kahanyatɔ Efula Ngɔndɔ ka Tanu la ka Samalo: Miliyɔ y’ambadi ngɛnangɛnaka Tshoto y’Etangelo la Réveillez-vous ! Lam’ele yɔ mbewoyaka Diolelo lo yoho y’ɔlɔlɔ efula, sho la dia tiɛmbaka mbala tshɛ ndo tishaka anto lo diaaso tshɛ diakondjaso. Ɔnkɔnɛ toleke kahanya periodikɛ lo Ngɔndɔ ka Tanu la ka Samalo!