Tonge ekambi watahame
1 Shɛso lele l’olongo ngɛnangɛnaka etena kɛnande ekambi ande watahame lo nyuma. Dui sɔ nembetshiyaka monga esambisha wa lokumu l’ɔlɔlɔ wa tomanamana ndo wambotshunda lo nyuma. Paulo akakeketsha omendji Timɔtɛ dia nde tetemala ndjasha lo wadielo ndo lo wetshelo dia ohamelo ande mɛnama le anto tshɛ. (1 Tim. 4:13-15) Sho tshɛ pombaka sala la wolo dia ndowanya esambishelo kaso oyadi tekɔ apandjudi waya la diewo di’efula.
2 Yadjɛ eyango: Dia pama, onto pombaka ndjadjɛ eyango. Naa eyango ɛmɔtshi wakokaso ndjadjɛ? Sho mbeyaka sala la wolo dia monga la diewo di’efula lo kamba la yɔɔmbɔ ya lo nyuma, mbuta ate Bible. (Ef. 6:17) Ondo ekɔ yoho mɔtshi y’esambishelo yahombaso ndowanya, ɛnyɛlɔ oko esambishelo ka lo toshinga, ka lo telefɔnɛ kana ka lo ahole wandawɔ okanda. Ondo sho kokaka ndjalowanya dia sala waendelo w’eyoyo w’amɛna. Oyango okina wa dimɛna efula wakokaso ndjadjɛ ele wa ndowanya akoka aso wa tatɛ ndo tetemala nɔmbɔla wekelo wa Bible.
3 Tɛdikɔ: Nsanganya ya l’etshumanelo, djekoleko Kalasa k’olimu wa teokrasi la Losanganya l’olimu ekɔ la oyango wa tokimanyiya dia sho monga ekambi watahame. Lo yɛdikɔ y’efula yayotodja welo dia nɔngɔsɔlaka ndo mbɔtɔka lo nsanganya ndo kamba la alako washama lɔkɔ, mbayotoleka kondja wahɔ.—2 Kor. 9:6.
4 Dia sho pama, sho pombaka nto kimanyiyana. (Tuk. 27:17) Mpokamɛ la yambalo tshɛ mbɔtwɛlɔ k’anto watomba laso l’esambishelo ayotokimanyiya dia sho koma esambisha wa tomanamana. Ndo nto, omendji aso wa wekelo wa dibuku mbeyaka kongɛ di’onto l’onto nongola ekimanyielo. Ekɔ mɛtɛ tshondo y’ɔtshɔkɔ dia monga la ombatshi mboka kana opandjudi wambohokɔ akambo dia tokimanyiya dia sho monga esambisha wa tomanamana ndo ndeka monga l’ɔngɛnɔngɛnɔ l’esambishelo! Onde ekɔ opandjudi ɔmɔtshi w’oyoyo lo olui aso wa Wekelo wa dibuku? Ondo sho kokaka mbɔlɔmba dia nde sambisha kâmɛ la so.
5 Olimu woleki ohomba wakambema ɛlɔ kɛnɛ ele olimu w’esambishelo. Etena kalambolaso Jehowa ‘olambo wa lotombo,’ sho kombolaka mbosha kɛnɛ koleki dimɛna. (Heb. 13:15) Naka sho sala la wolo dia monga ekambi watahame, kete tayonga ekambi ‘waha la dikambo dia mbotshama sɔnyi ndo walembetshiya ɔtɛkɛta w’akambo wa mɛtɛ dimɛna dimɛna.’—2 Tim. 2:15.