Toyadje Eyango wa lo Nyuma
1 Ayonga mɛtɛ diɛsɛ dia woke dia tombolaka Jehowa pondjopondjo! Kɛnɛ kakoka tokimanyiya dia kotsha oyango ɔsɔ ele, ndjadjɛ eyango wa lo nyuma oma ko kakianɛ ndo sala tshɛ dia mbekotsha. Kɛsɔ tokimanyiyaka dia mbeya kamba dimɛna la wolo aso wa demba. (1 Kor. 9:26) Eyango akɔna wayoyokoka ndjadjɛ ndo mbekotsha?
2 Wekelo wa Bible: Onde wɛ nɔngɔsɔlaka losanganya tshɛ la l’etshumanelo? Naka ngasɔ, onde wɛ ndjatshungwɛka etena ka sala eyangelo ndo ka kanaka yimba l’awui akɔ wonya wekayɛ? Ɛnyɛlɔ, wonya walɔngɔsɔlayɛ Wekelo wa Tshoto y’Etangelo ya lomingu la lomingu ndo Wekelo wa Dibuku wa l’Etshumanelo, onde wɛ mbekɛka paka eshidi eto l’ekadimwelo kana wɛ mendaka avɛsa woshawɔ ndo kanaka yimba lo ɛkɔkɔ wɛnya bonde koshawɔ elembetshiyelo w’avɛsa akɔ? Onde wɛ koka ndjadjɛ oyango wa salaka eyangelo lo tokambokambo tɔmɔtshi lomingu tshɛ oma lo wadielo wa Bible wayosalema lo Kalasa k’Olimu wa Teokrasi? Eyangelo wendana l’akambo wa lo nyuma nɔmbaka dia sho ndjatshungwɛ etena ndo sala la wolo, koko teye di’eyangelo ɛsɔ tokondjiyɛka ɛtshɔkɔ efula.—Tuk. 2:4, 5.
3 Nsanganya ya l’Etshumanelo: Oyango okina ele wa mbɔtɔka mbala tshɛ lo nsanganya tshanu ya l’etshumanelo. Naka tayokomaka la wonya dia nsangana l’anyaso ambetawudi ndo membaka la wɔ osambo wa ndjihwelo ndo pokamɛ dɔmbɛlɔ dia ndjihwelo, kete dui sɔ diayotokimanyiya dia keketshaka lonyuma l’etshumanelo. Sho pombaka nto ndjatshutshuya dia mbishaka kɔmatɛrɛ lo losanganya tshɛ ndo ndjilowanyaka. Ondo wɛ kokaka mɛnya nganɛ wɔtɔnɛ divɛsa dimɔtshi dia l’odingɔ la dikambo diakɛtshanyanyu kana mɛnya woho wakoka tokimanyiya awui akɔ lo lɔsɛnɔ laso la nshi tshɛ.—Heb. 10:24, 25.
4 Olimu w’Esambishelo: Sho ndowanyaka olimu aso w’esambishelo efula lam’ayadjɛso eyango. Onde ekɔ lofulo lɔmɔtshi la wenya lamboyoyadjɛ oyango wa kotshaka ngɔndɔ tshɛ l’esambishelo? Anto amɔtshi mɛnaka dia dikambo sɔ diekɔ ɔlɔlɔ. Kana onde wɛ kokaka ndowanya awui amɔtshi wendana l’olimu ayɛ, oko okambelo wa la Bible l’esambishelo ka lo luudu la luudu, sala waendelo w’eyoyo w’amɛna, ndjaketembola dia tatɛ mbeka l’anto Bible, kana nyomoleka mbeya ndakanya ambeki wa Bible?
5 Ambutshi le, onde nyu keketshaka ananyu dia vɔ ndjadjɛ eyango l’olimu wa Jehowa? Nyakimanyiya dia vɔ mɛna dia kamba oko ombatshi mboka, oko misiɔnɛrɛ, kana kamba lo nkumbo ka Bɛtɛlɛ ekɔ yoho yoleki dimɛna ya vɔ mɛnya lowando lawɔ otsha le Jehowa.—Und. 12:1.
6 Naka sho sɛdingola elimu aso, ndjadjɛ eyango wa lo nyuma ndo nyanga dia mbakotsha, kete tayonga l’ɔngɛnɔngɛnɔ heyama l’olimu aso ndo tayonga kiɔkɔ y’ekeketshelo le anto akina.—Romo 1:12.