L’ɛlɔmbwɛlɔ kaki Nzambi, ditongami tshɛ diaki kaamɛ ndo lo wɔladi

Lande na keso l’ohomba wa Diolelo diaki Nzambi?

L’etatelo k’ɔkɔndɔ w’ana w’anto, Otungi aso lele lokombo lande Jehowa, ndamɛ oto mbaki Ɔnɔmbɔdi. Nde akalɔmbɔlaka la ngandji. Nde akasale dihole dia dimɛna efula, mbuta ate ekambɔ k’Ɛdɛna di’anto mbidjasɛka lɔkɔ. Nde akawasha diangɔ dia ndɛ efula. Laadiko a laasɔ, nde akasha anto olimu wa dimɛna efula wa vɔ nkamba. (Etatelo 1:28, 29; 2:8, 15) Anto wotohomba ngɛnangɛna la wɔladi otowetawɔ ntshikala l’ɛse k’ɛlɔmbwɛlɔ ka la ngandji kaki Nzambi.

Adama okime olowa wakasekɛma wowosha Eva. — Anto wa ntondo wakatone dia Nzambi monga Ɔnɔmbɔdi awɔ

Bible mɛnyaka dia ondjelo ɔmɔtshi w’ɔtɔmbɔki, wakayelamɛka l’ɔkɔngɔ diko Satana Diabolo, akadje tɔfwɛfwɛ lo dikoka diele la Nzambi dia nɔmbɔla anto. Nde akate dia anto wayoyala l’ɔngɛnɔngɛnɔ l’ɛse k’ɛlɔmbwɛlɔ kande aha la vɔ ndjela ɛlɔmbwɛlɔ ka Nzambi. Lonyangu ko, ambutshi aso wa ntondo, Adama la Eva, wakayele ɛnyɛlɔ ka Satana ndo wakatɔmbɔkwɛ Nzambi.—Etatelo 3:1-6; Ɛnyɛlɔ 12:9.

Lam’ele Adama la Eva wakatone dia Nzambi monga Ɔnɔmbɔdi awɔ, vɔ wakashishɛ edjaselo kawɔ ka lo paradiso ndo elongamelo ka nsɛna pondjo pondjo la yoonge ya kokele. (Etatelo 3:17-19) Yɛdikɔ yawɔ yaki la shɛngiya le ana wakawayohomba mbota. Bible mbutaka dia lam’ele Adama akasale pɛkato, ‘pɛkato kakɔtɔ l’andja ndo nyɔi oma lo pɛkato.’ (Rɔmɔ 5:12) Pɛkato kakakonya lo dui dikina diele l’etombelo wa kɔlɔ efula: ‘Onto mbolɛka wonyande onto ele dia mbosalɛ kɔlɔ.’ (Ondaki 8:9) L’ɛtɛkɛta ekina, etena kayalɔmbɔla anto vɔamɛ, etombelo wayongaka paka wa kɔlɔ.

ƐLƆMBWƐLƆ K’ƆNA ONTO KAMBOTATƐ

Nimɛrɔdɛ emadi la lotamanya tshɛ. L’ɔkɔngɔ ande, anto waka luudu. — Nimɛrɔdɛ akatɔmbɔkwɛ Jehowa

Onto la ntondo lakatatɛ nɔmbɔla latɛkɛta Bible aki Nimɛrɔdɛ. Ndo nde akayɔtɔmbɔkwɛka lowandji la Jehowa. Ntatɛ oma ko nshi ya Nimɛrɔdɛ, anto wa wolo efula wakakambe la lowandji lawɔ lo yoho ya kɔlɔ. Aya ɛnɔnyi oko 3 000 wambeta wakafunde Sɔlɔmɔna, Nkumekanga ka lomba ɔnɛ: “Dimi lakɛnyi asɔyi w’asoyami, ko ndooko onto lakikɔ dia mbasamba. Ndo asoyanyi awɔ waki la wolo.”—Ondaki 4:1.

Akambo hawotshikitana polo ndo ɛlɔ. Lo 2009, Dibuku dimɔtshi dia Nations Unies diakate dia “ɔkɔkɔ wamboleka nsala di’akambo wa kɔlɔ fulanɛ l’andja ɛlɔ kɛnɛ ele awui tshɛ wa kɔlɔ waya lo atshunda aso.”

ETENA KA DIOLELO DIAKI NZAMBI MBOLƐ KAMBOKOKA!

Andja wekɔ l’ohomba wa ɛnɔmbɔdi w’amɛna ndo yoho ya lowandji yoleki tshɛ dimɛna. Ndo kɛsɔ kakatolake Otungi aso!

Osato wele la tenyi tenyi: Etombelo w’oma lo mandji y’ana w’anto. 1. Womoto ɔmɔtshi l’ose Asie odjashi lo shinga ya mindo etena kalela ɔnande. 2. Papa kɛmɔtshi k’osombe kele la hemɔ lo mbeto ka lopitadi. 3. Asɔlayi wakanda lo ta. 4. Olui w’anto wele la nkɛlɛ wahangɔhangɔ ndo wokime adalapo. 5. Mama kɛmɔtshi l’ɔnande la womoto wambotana dia wakodi lokuke la luudu lawɔ. 6. Osomba wele l’edinga w’oma lo waa izinɛ ndo l’eshinga wa kura. — Kaanga mandji y’ana w’anto yɛnama oko yɔ mboleki amɛna, yambokita tatala dia nkandola ekakatanu wa weke efula wele l’anto

Nzambi akatondja Diolelo kana lowandji, layɔhɛna mandji tshɛ y’ana w’anto ndo “diɔ diɔamɛ diayotshikala pondjo.” (Danyɛlɛ 2:44) Ɔsɔ mbele Diolelo dialɔmba miliyɔ y’anto. (Mateo 6:9, 10) Koko Nzambi hatɔlɔmbɔla lowandji lɔsɔ ndamɛ. Koko, nde akasɔnɛ onto ɔmɔtshi lakasɛnɛ oko onto dia nde monga Ɔnɔmbɔdi. Ko onto akɔna akasɔnɛ Nzambi ɔsɔ?