Esambishelo ka lânde dia mbelɛ anto lo Eohwelo!
1. Kakɔna kayosala apandjudi wa Diolelo wa l’andja w’otondo tatɛ Ngɔndɔ ka sato 21, 2009, ndo lande na?
1 Lushi la nɛi, Ngɔndɔ ka nɛi 9, 2009, atɛmɔdi waki Jehowa wa l’andja w’otondo wayosangana dia mbohɔ djembetelo yoleki woke ya ngandji kakoke Nzambi anto. (Romo 5:6-8) Sho nongamɛka dia miliyɔ y’anto wɛnya nsaki wayonga kâmɛ la so etena kayotohɔ nyɔi ka Yeso. Akatshi wa leeta la lânde lendana la Eohwelo wayokahanyema lo nkɛtɛ k’otondo tatɛ Ngɔndɔ ka sato 21.
2. Akambo akɔna wahombaso mbohɔka etena kakahaso akatshi wa leeta?
2 Akambo wahombaso mbohɔka: Tokambe dimɛna la esato, la ambola ndo la avɛsa wele lo dikatshi dia leeta. Ɛnyɛlɔ, sho mbeyaka kamba la osato wele lâdiko lo mbuta ɔnɛ: “Lakalangi mɛtɛ kelɛ dia wɛ ndjonga kâmɛ la so lo eohwelo ka nyɔi ka Yeso kayosalema Lushi la nɛi, Ngɔndɔ ka nɛi 9, 2009.” Oma lâsɔ, kamba la ɔtɛ a dui wa dikatshi dia leeta ndo la ambola wele l’ɛse. Shikikɛ ompokami ayɛ dia nde ekɔ la lotshungɔ la mbelɛ ase nkumbo kande ndo anto akina tshɛ wayondolanga ndja la wɔ.
3. Ngande wakokaso nomialomia nsaki ka wanɛ wambotelɛ oya lo Eohwelo?
3 Naka etshumanelo kanyu kekɔ la ɛtshi ka nkɛtɛ ka woke, kete dikumanyi mbeyaka nyotɛ dia tshika akatshi wa leeta lo ahole wele anto kema lawakawɔ. Lo waa wikɛndɛ, kanyoshake anto periodikɛ kâmɛ la akatshi wa leeta. Nyoyadje oyango wa mbelɛ anto wakɛndɛnyu dia tosala waendelo w’eyoyo, ambeki anyu wa Bible, ewotɔ anyu, asekanyu wa kalasa, asekanyu wa l’olimu, asukanyi anyu ndo anto akina weyanyu. Ɔnɔnyi wetshi, kadiyɛso kɛmɔtshi akelɛ ewotɔ ande 30 ndo oma lâsɔ, mbala la mbala nde akawaoholaka ohomba wa dikambo sɔ. Ande ɔngɛnɔngɛnɔ waki la nde dia mɛna anto 25 l’atei awɔ wamboya lo Eohwelo ndo 4 l’atei awɔ wambetawɔ mbeka Bible lee!
4. Ngande wahombaso ndjalɔngɔsɔla oma ko kakianɛ, ndo lande na?
4 Toyalɔngɔsɔlɛ oma ko kakianɛ: Apandjudi efula kokaka pamia olimu awɔ w’esambishelo lo Ngɔndɔ ka sato la ka nɛi. Naka wɛ ekɔ la ana kana ambeki wa Bible watahame dimɛna, kete ɔnɛ mbeyaka monga diaaso di’ɔlɔlɔ dia vɔ koma apandjudi wahatabatizama. Ɔnɛ mbele etena ka tatɛ ndjalɔngɔsɔla dia ndeka mbisha lonya l’esambishelo ka lânde kɛsɔ, dia mbelɛ anto lo eohwelo ka tolembetelo tohende toleki woke ta ngandji kakɛnya Nzambi nde la Yeso.—Joa. 3:16; 15:13.