Toyalɔngɔsɔlɛ dimɛna dikambo dia Eohwelo

Ambeki waki Kristo wekɔ mɛtɛ l’ɔngɛnɔngɛnɔ ndo la diɛsɛ dia ndjalɔngɔsɔla dimɛna dikambo dia Eohwelo ka nyɔi ka Yeso Kristo! (Luka 22:19) Kakɔna mɛtɛ kahombaso sala dia ndjalɔngɔsɔla dikambo dia Eohwelo?

◼ Wonya ndo dihole: Onto tshɛ pombaka mbeya wonya ndo dihole shikaa diayosalema Eohwelo. Naka tshumanelo efula diayosala Eohwelo lo Mbalasa ka Diolelo ɔtɔi, kete ayonga ohomba koma la wonya ndo tomba esadi nɛ dia minitɛ yele lam’asa nsanganya shɔ bu kambe. Ekɔ ohomba efula dia mbidja welo wa lânde dia mbewɔ efukutanu lo wɔtwɛlɔ kana l’otombelo w’anto ndo l’ahole wa mbɛkɛ mitutu kana akalo.

◼ Akatshi wa leeta: Onde apandjudi tshɛ wekɔ la ekanda k’ɔlɔlɔ k’akatshi wa leeta, ndo onde wambomanyamanya awui wele lɔkɔ? Onde wɛ ambɔlɔngɔsɔla woho wahombayɛ tosha anto akatshi akɔ? Waa na wayoyosha akatshi wa leeta? Welo wa lânde pombaka mbidjama dia kahanya akatshi tshɛ wa leeta.

◼ Woho wa ndja lo Eohwelo: Anto amɔtshi wayasha lo akambo wa mɛtɛ ndo anangɛso l’akadiyɛso amɔtshi mbeyaka monga l’ohomba w’anto mbaɛmba dia mbakonya lo dihole diayosalema Eohwelo. Tɛdikɔ takɔna tambonyɔsa dia mbâkimanyiya?

◼ Mapa la vinyɔ: Nyoyashikikɛ dia mapa la vinyɔ yayetshetshama paka l’ɔkɔngɔ wa ɛɔtwɛlɔ ka wonya. Pombaka tɔ̂shi tɛdikɔ ta tɔlɛ okitami tshɛ wele baka la hemɔ ndo wahatokoka ndja lo losanganya mapa la vinyɔ. Pombaka takondjisha mapa ndo vinyɔ yakoka.—Enda lo Tshoto y’Etangelo ya Ngɔndɔ ka sato 1, 2003, lɛkɛ 10, 11, odingɔ 14, 17.

◼ Mbalasa ka Diolelo: Mbalasa ka Diolelo kana dihole dikina diayosalema Eohwelo pombaka tɔ̂mbami kana tâsolami la ntondo. Pombaka têla la ntondo alɔnga w’akale, tɔvɛrɛ ta mbidja vinyɔ, mɛsa, ndo dihɔndɔ dia mɛsa dia dimɛna lo dihole diayosalema Eohwelo. Naka nyayosala losanganya lo dihole dikina, kete pombaka ndjashikikɛ dia dihomɔ dia sɔnɔrizasiɔ di’amɛna diayonga di’ampokami tshɛ ndjela ɔtɛkɛtshi dimɛna. Pombaka tâsɔnyi wanɛ wayolongolaka anto la wayetshetsha mapa la ntondo ndo tawamanyisha ɛkɛndɛ akɔ fundo la woho wayowokotsha ɛkɛndɛ akɔ kâmɛ ndo ohomba wa vɔ ndɔta ndo minya divo lo yoho ya dimɛna.

Lo diaaso di’ohomba efula sɔ, mbuta ate Eohwelo ka nyɔi ka Yeso Kristo, sho nangaka ndjalɔngɔsɔla dimɛna dimɛna l’onto ndo l’onto ndo oko etshumanelo. Aha la tâmu, Jehowa ayɔtshɔkɔla wanɛ tshɛ wɛnya lowando lawɔ l’oma k’ɛse otema lo tɛdikɔ tshɛ takandɔshi dikambo di’anto lo tshimbo y’olambo wakakimɔ Ɔnande la ngandji Yeso Kristo.