Esambishelo tokeketshaka lo nyuma
1. Ɛlɔlɔ akɔna wakondjaso oma l’olimu w’esambishelo?
1 Ndjasha efula l’olimu w’esambishelo kokaka tokeketsha lo nyuma ndo fudia ɔngɛnɔngɛnɔ aso. Ekɔ mɛtɛ dia sho sambishaka ntondotondo dia ngɛnyangɛnya Jehowa. Koko, lo kitanyiya didjango dia ‘sambisha ɔtɛkɛta,’ sho kondjaka ɛtshɔkɔ w’oma le Jehowa ndo wahɔ ekina. (2 Tim. 4:2; Is. 48:17, 18) Ngande wakoka esambishelo tokeketsha ndo tofudiɛ ɔngɛnɔngɛnɔ?
2. Lo toho takɔna tatokeketsha esambishelo?
2 Sho keketshamaka ndo tshɔkwamaka: Esambishelo tokeketshaka dia sho mbika washo lo ɛtshɔkɔ wa Diolelo lo dihole dia mbika washo lo ekakatanu wele nshi nyɛ. (2 Kor. 4:18) Nembetshiya kɛnɛ ketsha Bible keketshaka mbetawɔ kaso l’alaka waki Jehowa ndo fudiaka lowando laso l’akambo wa mɛtɛ. (Is. 65:13, 14) Etena kakimanyiyaso anto akina dia vɔ pama lo nyuma diaha vɔ ‘ndjatambiya lo andja ɔnɛ,’ sho keketshaka eshikikelo kele la so ka kakitɔna l’andja ɔnɛ.—Joa. 17:14, 16; Romo 12:2.
3. Ngande watokimanyiya olimu w’esambishelo dia kɛnɛmɔla waonga w’Okristo?
3 Kamba olimu w’esambishelo tokimanyiyaka dia sho kɛnɛmɔla waonga w’Okristo. Ɛnyɛlɔ, sala la wolo dia ndjala “wehu w’antu tshe” tokimanyiyaka dia sho ndeka monga l’okitshakitsha. (1 Kor. 9:19-23) Etena kasawolaso l’anto ‘wahɛnyahɛnyama ndo wele bu l’ekimanyielo oko ɛkɔkɔ waha l’olami,’ sho tshutshuyamaka dia mbaoka kɛtshi ndo kandji. (Mat. 9:36) Sho mbekaka dia monga l’ekikelo etena katetemalaso sambisha kânga mbahomanaso la wendjodi kana l’ɔlɔshamelo. Sho ndekaka monga l’ɔngɛnɔngɛnɔ etena kayashaso dia kimanyiya anto akina.—Etsha 20:35.
4. Ngande wayaokɛ lo kɛnɛ kendana l’olimu w’esambishelo?
4 Ekɔ mɛtɛ diɛsɛ dia woke dia ndjasha l’olimu watombola Onto lâmɛ lahombaso tɛmɔla! Esambishelo tokeketshaka. Tɔ mbelaka wanɛ wayasha l’otema ɔtɔi lo ‘sambisha lokumu l’ɔlɔlɔ dimɛna dimɛna’ ɛlɔlɔ efula.—Etsha 20:24.