Toyalɔngɔsɔlake dimɛna dia mbetsha
1. Lande na kahombaso kimanyiya ombeki dia nde fudia lowando la nde etena kekaso la nde Bible?
1 Etena kalɔmbɔlaso wekelo wa Bible, sho pombaka ndjalɔngɔsɔlaka dimɛna dia monga l’akoka wa tshutshuya ombeki wa Bible dia nde kambɛ Jehowa. Sho pombaka sala la wolo dia nde fudia lowando lande lo akambo wa mɛtɛ wa lo Bible. Dui sɔ diayotshutshuya ombeki dia nde kambɛ Jehowa. (Euh. 6:5; Tuk. 4:23; 1 Kor. 9:26) Ko ngande wakokaso sala dui sɔ?
2. Ohomba akɔna wele la dɔmbɛlɔ etena kayalɔngɔsɔlaso?
2 Tɔlɔmbake etena kayalɔngɔsɔlaso: Lam’ele Jehowa mbasala dia lɔtɔngɔ l’akambo wa mɛtɛ mɛna l’otema w’ombeki wa Bible, ekɔ dimɛna tatɛ ndjalɔngɔsɔla l’ekimanyielo ka dɔmbɛlɔ dia nɔmba dikambo diendana l’ombeki ndo l’ehomba ande. (1 Kor. 3:6; Jak. 1:5) Dɔmbɛlɔ sɔ mbeyaka nto tokimanyiya dia sho mbeya woho wakokaso nyomoleka ndodia otema ande ‘la ewo k’oshika’ ka lolango laki Jehowa.—Kol. 1:9, 10.
3. Ngande wakokaso ndjalɔngɔsɔla lo mbohɔka ombeki?
3 Tokanyiyake dikambo di’ombeki: Yeso akeyaka ɔnɛ dia mbetsha dimɛna pombaka mbidja yimba lo dikambo di’ampokami. Lo waaso ahende w’etondo, wakoke Yeso dimbola diâmɛ nɛ ɔnɛ: “Ayumutsha na dia nkita lumu la pundju?” Nde akasha ekadimwelo ehende wotshikitanyi. (Luka 10:25-28; 18:18-20) Sho pombaka kanyiyaka awui wendana l’ombeki etena kayalɔngɔsɔlaso. Avɛsa akɔna wahombaso mbadia la nde? Edingɔ engana wayoteka la nde? Awui akɔna wele lo wetshelo wayondonga l’okakatanu dia shihodia kana mbetawɔ? Naka sho kokaka takanyiyisha la ntondo ambola wakokande tônyiya, kete tayokoka ndjalɔngɔsɔla dimɛna dimɛna.
4. Kakɔna kahombama dia ndjalɔngɔsɔla dimɛna?
4 Tovusolake awui wahombaso teka: Oyadi mbala ngana yamboteka awui akɔ, ɔsɔ ekɔ mbala ka ntondo kayototowaetsha ombeki akɔ. Ekɔ ohomba sho ndjalɔngɔsɔla dimɛna dia munanda otema w’ombeki. Kɛsɔ nɔmbaka dia sho sala kɛnɛ kalɔmbaso ombeki dia nde sala. Tovusolake awui wayototeka mbidja ndo avɛsa woshilami, mbohɔka ombeki akɔ ndo ondo lo mbekɛka eshidi l’awui woleki ohomba.—Romo 2:21, 22.
5. Ngande wakokaso mbokoya Jehowa?
5 Jehowa ndjakiyanyaka efula dikambo di’ohamelo w’ombeki wa Bible tshɛ. (2 Pet. 3:9) Lo mbɔsa etena ka ndjalɔngɔsɔla dikambo di’ombeki wa Bible tshɛ, sho mɛnyaka dia sho lawɔ ndjakiyanyaka la ngandji tshɛ di’ohamelo awɔ.