Omba
Tɔlɔmbɔlɛ wekelo wa Bible watahame
Lo dikatshi nɛ dia okotsha, tambosanganya awui w’ohomba w’oma lo ɔnɔngɔ wa asawo wendana la nɔmbɔla wekelo wa Bible watahame wakatombe lo Olimu aso wa Diolelo. Anto tshɛ keketshamaka dia momba dikatshi dia okotsha nɛ dia mbokaka sso lɔkɔ etena kekawɔ la anto Bible. Ndo nto, akambo wa lo dikatshi dia okotsha nɛ koka tɛkɛtama wonya wa nsanganya y’otsha lo esambishelo ndo omendji w’olimu koka kamba la wɔ oko asawo etena kembolande elui wa wekelo wa dibuku.
Etenyi 1: Wekelo wa Bible kɛdikɛdi na?
Naka wɛ kɛtshanyaka l’onto mbala la mbala awui wa lo Bible, lo ndjela toho tɔmɔtshi ta wekelo, kânga lo tshena pe, lo kamba la Bible kana okanda ɔmɔtshi wekaso l’anto Bible, kete wɛ ekɔ lo nɔmbɔla wekelo wa Bible. Ɔsɔku mbediɔ, oyadi tekɔ lo mbeka l’onto lakande kana lo telefɔnɛ. Onto ɔsɔ koka mbadiema oko ombeki wa Bible, naka tambeka la nde mbala hiende tatɛ oma l’ɔkɔngɔ wa sho mbɛnya woho wekaso l’anto Bible ndo naka sho mɛnaka dia wekelo wayotetemala.—km 7/04 lɛkɛ 1.
Ekanda wahombama
◼ Kakɔna katɔlɔmba Nzambi?
◼ Ewo katɔla otsha lo lɔsɛnɔ la pondjo
◼ Tɛmɔla Nzambi ɔtɔi ka mɛtɛ
◼ Koka kamba la Wɛ kokaka monga ɔngɛnyi waki Nzambi! dia mbeka la anto waheye mukanda efula kana waheye mbadia dimɛna.
Etenyi 2: Toyalɔngɔsɔlɛ dia tɔlɔmbɔla wekelo
Sho la dia nɔmbɔla wekelo lo yoho yayonanda otema w’ombeki. Dui sɔ nɔmbaka dia sho nɔngɔsɔla wekelo dimɛna efula lo mbidja yimba lo ehomba w’ombeki.—km 8/04 lɛkɛ 1.
Woho wa ndjalɔngɔsɔla
◼ Sɛdingola ɔtɛ a dui, ɛtɛ w’awui wahɔnyi ndo dihomɔ tshɛ diɛnama dia tshapita kana wekelo.
◼ Shola ekadimwelo lo ambola wofundami, lo mbekɛ oshidi paka lo ɛtɛkɛta kana ditelo di’ohomba.
◼ Shikikɛ avɛsa wahomba mbadiema wonya wa wekelo. Wɛ koka mɛna ohomba funda towuiwui tɔmɔtshi l’ohembo w’okanda.
◼ Lɔngɔsɔla ovuswelo wa lo tshena pe wa awui woleki ohomba.
Ɔtɔnganyiya wekelo la ehomba wa ombeki
◼ Lɔmba dikambo dia ombeki ndo dia ehomba ande.
◼ Takanyiyisha ambola wakokande tôka ndo awui wakokande monga l’okakatanu dia mboka kana dia mbetawɔ.
◼ Yambola wate: Kakɔna kende l’ohomba dia shihodia kana lende ahombande ndjalowanya dia nde pama lo nyuma? Ngande wakokami minanda otema ande?
◼ Mbala mɔtshi, wɛ mbeyaka mɛna ohomba nɔngɔsɔla ɛnyɛlɔ kɛmɔtshi, olembetshiyelo ɔmɔtshi kana ambola amɔtshi dia kimanyiya ombeki woho wa nde shihodia kitshimudi ya dui kana divɛsa dimɔtshi.
Etenyi 3: Okambelo wa dimɛna wa l’Afundelo
Oyango walɔmbɔlaso wekelo wa Bible ele wa ‘mbetɛ anto ambeki’ lo mbakimanyiya dia vɔ shihodia ndo mbetawɔ wetshelo wele l’Ɔtɛkɛta wa Nzambi ndo kamba la wɔ lo nsɛnɔ yawɔ. (Mat. 28:19, 20; 1 Tes. 2: 13) Ɔnkɔnɛ, wekelo pombaka mbika etshina l’Afundelo.—km 11/04 lɛkɛ 4.
Etsha oma lo Ɔtɛkɛta wa Nzambi
◼ Ɛnya ambeki woho wa vɔ nyanga avɛsa amɔtshi wa shikaa lo Bible yawɔ.
◼ Yanga ndo nyɔkɛtshanya avɛsa wa lo Bible wɛnya dia awui wetawɔso pikama lo Afundelo.
◼ Kamba la ambola. Lo dihole dia nembetshiya ombeki wa Bible avɛsa, lɔmbande dia nde kolembetshiyawɔ.
◼ Etɛka wekelo wɔdu. Ewɔ dia nyanga dia nembetshiya oseka divɛsa tshɛ dia lo wekelo lo toho tadiɔ tshɛ. Tɛkɛta paka kɛnɛ kele ohomba dia shikikɛ dikambo diatɛkɛtama.
◼ Ɛnyande woho wa kamba dimɛna la kɛnɛ kekande. Kimanyiya ombeki wa Bible dia nde mbeya woho wendana avɛsa wa lo Bible la nde.
Etenyi 4: Tetsha ambeki wa Bible dia ndjalɔngɔsɔlaka
Ombeki wadia wekelo la ntondo, wekɛ eshidi lo ekadimwelo, ndo wakanyiya woho wakokande mbisha ekadimwelo l’ɛtɛkɛta ande hita pamaka esadi lo nyuma. Ɔnkɔnɛ, naka wɛ ambɔsa ekongelo ka mbekaka l’onto mbala la mbala, kete lɔngɔsɔla wekelo ɔmɔ kâmɛ la nde dia mbɛnya woho wa nde nɔngɔsɔlaka. Le ambeki efula, ayonga tshondo ya ekimanyielo dia nɔngɔsɔla kâmɛ la nde tshapita kana wekelo w’otondo.—km 12/04 lɛkɛ 1.
Woho wa mbekɛ eshidi lo ekadimwelo ndo wa funda nɔtɛ l’omamu
◼ Lembetshiya ombeki woho wa mbishola ekadimwelo mbala kakɔ ɔtɔi lo ambola wofundami.
◼ Ɛnyande dibuku diayɛ dia wekelo lɛnɛ akayekɛ eshidi paka lo tɔtɛkɛta kana lo ditelo diele ohomba.
◼ Kimanyiyande dia nde mɛna woho wele divɛsa tshɛ dioshilami sukɛka dui dimɔtshi l’odingɔ. Ɛnyande woho wakokande fundaka nɔtɛ ya tomondo l’omamu wa dibuku diande dia wekelo.
Ɔkɔnya ndo ovuswelo
◼ Ɛnyande dia nde kokaka mboka sso lo tshena pe lo awui wa lo wekelo lo sɛdingola ɔtɛ wa tshapita kana wa wekelo, ɛtɛ w’awui wahɔnyi ndo esato la ntondo ka nde tatɛ nɔngɔsɔla wekelo dimɛna dimɛna.
◼ Keketsha ombeki dia nde vusola awui woleki ohomba lo ekomelo ka ɔlɔngɔswɛlɔ w’etenyi kayekama.
Etenyi 5: Shikikɛ lofulo la awui wahombanyu mbeka
Lofulo l’awui lakokayɛ sɛdingola la ombeki nemanɛka la akoka ndo la awui wele la ɔnɛ lalɔmbɔla wekelo ndo ombeki.—km 1/05 lɛkɛ 1.
Hika mbetawɔ ka nge
◼ Ekɔ ohomba sho kimanyiya ombeki dia nde shihodia dimɛna awui wekama lo dihole dia mbeka awui efula lo tshenyi ya wonya.
◼ Etsha wenya wahombama dia kimanyiya ombeki dia nde shihodia ndo mbetawɔ kɛnɛ kekande.
◼ Ɔsa yema ya wenya efula dia kotola yambalo yande oya lo awui woleki ohomba ndo lo avɛsa wosuke wetshelo.
Tetemala la wekelo
◼ Naka ombeki nangaka tɛkɛta efula lo kɛnɛ kendana la akambo ande hita, kete sho mbeyaka ndjalɔngɔsɔla dia ndjosawola la nde akambo akɔ l’ɔkɔngɔ wa wekelo.
◼ Tongake ɔtshɔlɔlɔ amboleka wonya wa wekelo. Tolekake tshɔmbɔla l’awui wele bu ohomba efula wa lo wekelo kana lo bɛnyɛlɔ diaha dikambo sɔ ndjoshimba ombeki dia nde kondja ewo k’oshika ka wetshelo w’ohomba wa lo Bible.
Etenyi 6: Etena koka ombeki dimbola
Naka tamboshila kongɛ dimɛna dia mbekaka la onto Bible, kete, ayoleka dimɛna dia tasɛdingolaka wetshelo wa lo Bible lo yoho yaha l’ofukutanu lo dihole dia tatambatambaka la akambo. Kɛsɔ kimanyiyaka dia ewo k’oshika k’ombeki monga la ehikamelo ndo dia nde pama lo nyuma.—km 2/05 lɛkɛ 6.
Onga la shɛnɔdi
◼ Tena efula ambola wɔtɔnɛ la awui wekama mbeyaka kadimɔma mbala kakɔ ɔtɔi.
◼ Koko, naka dimbola hɔtɔnɛ la awui wekama kana ayɔlɔmba dia sala yema ya eyangelo dia kadimola dimɛna, kete ayonga dimɛna dia sɛdingola dikambo sɔ l’ɔkɔngɔ wa wekelo kana etena kekina. Mbeyaka monga ohomba funda ambola wa ngasɔ.
◼ Naka ombeki ekɔ la okakatanu dia mbetawɔ wetshelo ɔmɔtshi, kete sɛdingola la nde akambo akina walembetshiya dimɛna kɛnɛ kata Bible lo dikambo diakɔ.
◼ Naka ombeki êke paka la tâmu, kete tokotshika dikambo diakɔ, ko nyu tokotetemala la wekelo.
Eya elelo ayɛ
◼ Naka wɛ bu la okadimwelo wa shikaa lo dimbola dimɔtshi, kete tonake dia mbisha kanyi yayɛ hita.
◼ Yema yema ɛnyande woho wasalawɔ eyangelo.
Etenyi 7: Sala dɔmbɛlɔ wonya wa wekelo
Dia ambeki wa Bible pama lo nyuma, ɛtshɔkɔ w’oma le Jehowa wekɔ ohomba efula. Diɔ diakɔ diele, ekɔ dimɛna tatɛ ndo komiya wekelo wa Bible la dɔmbɛlɔ.—km 3/05 lɛkɛ 4.
Woho wa mbɔtshiya la dɔmbɛlɔ
◼ Tena efula, sho koka sala dui sɔ oma ko wekelo wa ntondo la onto layasha efula lo awui w’ɔtɛmwɛlɔ.
◼ Le ambeki akina, sho koka menda etena kakoka monga ɔlɔlɔ tatɛ sala dɔmbɛlɔ.
◼ Wɛ koka kamba la Osambu 25:4, 5 ndo 1 Joani 5:14 dia kimanyiya ombeki dia shihodia lande na kahombaso salaka dɔmbɛlɔ.
◼ Wɛ koka kamba la Joani 15:16 dia mɛnya dia sho pombaka nɔmbaka Jehowa lo tshimbo ya Yeso Kristo.
Awui wakokayɛ mbidja lo dɔmbɛlɔ
◼ Ekɔ dimɛna mbisha Jehowa lotombo oko wende Kiɔkɔ ya wetshelo.
◼ Tɛnya nsaki kaso k’oma k’ɛse otema lo dikambo dia ombeki.
◼ Tɛnya lowando laso otsha le okongamelo wakamba la Jehowa.
◼ Lɔmba Jehowa dia nde tshɔkɔla welo wadja ombeki dia kamba la kɛnɛ kekande.
Etenyi 8: Tɔlɔmbɔlake ambeki otsha lo okongamelo
Oyango aso etena kekaso la anto Bible bu tsho wa mbaetsha awui amɔtshi wendana la dietawɔ, koko ndo wa mbakimanyiya dia vɔ ndjonga anto amɔtshi wa l’atei w’etshumanelo ka Akristo. Lâdiko dia lâsɔ, ɔsaka minitɛ ngana lomingu tshɛ lo wekelo dia nyu kɛtshanya dikambo dimɔtshi diendana la okongamelo wa Jehowa.—km 4/05 lɛkɛ 8.
Nsanganya ya lo etshumanelo
◼ Tɛkɛta dia losanganya tshɛ la lo etshumanelo. Etande dia ndjɔtɔ lɔkɔ oma ko wekelo wa ntondo.
◼ Ewoyande awui w’ohomba wakatami lo nsanganya.
◼ Fudia nsaki kande lo kɛnɛ kendana la Eohwelo, nsanganya ya weke ndo wendelo wa omendji wa otshimbedi.
◼ Kamba la fɔtɔ yele lo ekanda aso dia mbakimanyiya dia vɔ mɛna kɛnɛ kasalema.
◼ Keketshawɔ dia mbadia biukubuku Les Témoins de Jéhovah : Qui sont-ils ? Quelles sont leurs croyances ?
Kamba la bandɛ vidɛo dia fudia lowando lawɔ
◼ Jusqu’aux extrémités de la terre
◼ Les Témoins de Jéhovah : un nom, une organisation
◼ Toute la communauté de nos frères
◼ Unis grâce à l’enseignement divin
Etenyi 9: Tɔlɔngɔsɔlɛ ambeki dia vɔ sambisha lo tshakitudi
Etena katatɛ ambeki wa Bible monga la mbetawɔ lo kɛnɛ kekawɔ, vɔ tshutshuyamaka dia mbewoya akina awui akɔ.—km 5/05 lɛkɛ 1.
Keketshawɔ dia sambisha
◼ Onde nde ekɔ la angɛnyi kana ase nkumbo wakokande mbelɛ dia ndjoyela awui wekande?
◼ Onde osekande ɔmɔtshi la l’olimu, la la kalasa, kana anto akina weyana la nde wakɛnya nsaki?
Etshawɔ dia mbewoya dietawɔ diawɔ
◼ Sɔna awui amɔtshi etena kekanyu, ndo mbola ombeki ɔnɛ: “Ngande wakokayɛ kamba la Bible dia nembetshiya ase nkumbo kayɛ dikambo dia mɛtɛ nɛ?”
◼ Kimanyiya ombeki dia nde shihodia ohomba wa monga la dilɛmiɛlɔ ndo la loshilambo etena katɛkɛtande la anto akina awui wendana la Jehowa ndo la asangwelo ande.
◼ Ambeki kokaka kamba la biukubuku Les Témoins de Jéhovah : Qui sont-ils ? Quelles sont leurs croyances ? dia kimanyiya angɛnyi ndo ase nkumbo yawɔ wele la tokanyi t’ɔlɔlɔ dia vɔ shihodia dietawɔ diaso diohikami lo Bible ndo elimu aso.
Etenyi 10: Tolakanya ambeki wa Bible esambishelo ka lo luudu la luudu
Etena kashikikɛ dikumanyi dia ombeki wa Bible aya opandjudi wahatabatizama, nde kokaka tatɛ sambisha la etshumanelo lo esambishelo ka lo sɛkɛ.—km 6/05 lɛkɛ 1.
Nyɔlɔngɔsɔlake kâmɛ
◼ Ɛnya ombeki lɛnɛ akokande tana mbɔtwɛlɔ.
◼ Kimanyiyande dia sɔna mbɔtwɛlɔ ka wɔdu kɔtɔnɛ la awui wa lo ɛtshi kanyu ka nkɛtɛ.
◼ Keketshande dia nde kambaka la Bible etena kasambishande.
◼ Nyohembe kâmɛ. Ɛnyande woho wakokande kandola la ɔkɔmi tshɛ ekakatanu waleka pomana laso lo ɛtshi kaso ka nkɛtɛ.
Nyosambishake kâmɛ
◼ Tshikande asɛdingole woho wakambayɛ la mbɔtwɛlɔ kakanyatalɔngɔsɔdi kâmɛ.
◼ Dja yimba lo lonto ndo lo akoka w’ombeki. Tena dimɔtshi, mbeyaka monga ɔlɔlɔ mbɔ̂lɔmba dia nde mbuta paka etenyi ka mbɔtwɛlɔ keto.
◼ Kimanyiya opandjudi w’oyoyo dia monga la ekongelo ka tombaka mbala la mbala lo esambishelo.
Etenyi 11: Tokimanyiya ambeki dia vɔ sala waendelo w’eyoyo
Wendelo w’oyoyo tatɛka nɔngɔswama etena kasawolayɛ la onto mbala ka ntondo. Keketsha ombeki dia nde ndjasha la otema ɔtɔi le anto wasawola la nde. Etshakande yema yema dia nde nɔmbaka wanɛ wasawola la nde dia vɔ mbisha tokanyi tawɔ, mpokamɛka kɛnɛ katawɔ ndo fundaka awui wayakiyanyawɔ.—km 7/05 lɛkɛ 1.
Nyoyalɔngɔsɔlɛ dia sala wendelo w’oyoyo
◼ Nyovusole awui wakanyɛnyi lo wendelo wa ntondo ndo ɛnya ombeki woho wa nde sɔna dui dimɔtshi dia losango la Diolelo diayɔngɛnyangɛnya ompokami ande.
◼ Nyɔlɔngɔsɔlɛ kâmɛ mbɔtwɛlɔ kɛmɔtshi ka lo tshena pe kendana la divɛsa dimɔtshi dia lo Bible ndo odingɔ ɔmɔtshi wa lo okanda ɔmɔtshi wekaso l’anto Bible.
◼ Nyɔlɔngɔsɔlɛ dimbola dimɔtshi diakoka munyiyama l’ekomelo ka sawo dianyu.
Lomialomia nsaki kakɛnya onto la etete tshɛ
◼ Keketsha ombeki dia nde kalola esadi eto le anto tshɛ wakɛnya nsaki.
◼ Ɛnya ombeki ohomba wa tetemala nyanga anto wahaleke tanema lawakawɔ.
◼ Ɛnya opandjudi w’oyoyo woho wa nde mbokana la onto lushi la nde ndjowenda nto ndo kimanyiyande dia nde shihodia ohomba wa kalolaka oko wakandalake.
Etenyi 12: Tokimanyiya ambeki dia vɔ tatɛ ndo nɔmbɔla wekelo wa Bible
Ekɔ ohomba efula dia wɛ mbokoya Yeso lo mbisha ɛnyɛlɔ k’ɔlɔlɔ lo olimu ayɛ. Etena kɛna ombeki ayɛ ɛnyɛlɔ kayɛ lo esambishelo, nde ayoshihodia dia oyango wa waendelo w’eyoyo ele dia tatɛ mbeka la anto Bible.—km 8/05 lɛkɛ 1.
Sɛngɔla onto dia mbeka la nde Bible
◼ Lembetshiya ombeki dia hatongaka nshi tshɛ ohomba dia kɔndɔla oseka kiambokambo tshɛ yendana la wekelo.
◼ Mbala efula, ekɔ ohomba mɛnya paka woho wasalema wekelo lo kamba la odingɔ ɔtɔi kana edingɔ ehende oma lo okanda ɔmɔtshi watotekaka la anto Bible.
◼ Nyovusole mbɔtwɛlɔ kɛmɔtshi kendana la woho wa tatɛ mbeka la anto Bible.—km 8/05 lɛkɛ 8; km 1/02 lɛkɛ 6.
Tetsha ambeki dia monga embetsha
◼ Keketsha ambeki dia fundja nkombo lo Kalasa k’olimu wa teokrasi.
◼ Lɔngɔsɔla dia apandjudi w’eyoyo kotshindɛ le ambeki ayɛ akina wa Bible lɛnɛ akokawɔ tosha yema ya kɔmatɛrɛ wonya wa wekelo.