Onde wɛ kokaka pamia olimu ayɛ?
1. Ohomba akɔna wa wanyandja wele l’olimu w’esambishelo, ndo lande na?
1 Lam’akandɛnyi dia anto efula wekɔ lo ndjasha lo lokumu l’ɔlɔlɔ la Diolelo, Yeso akatɛ ambeki ande dia vɔ ‘nɔmba Nkumadiɔndjɔ kanga dinela dia nde toma ekambi lo dinela diande.’ (Mat. 9:37, 38) Lam’ele tekɔ lo nsɛna l’ekomelo ka eleko ka dinela, nshi nyɛ mbamboleka monga ohomba kamba olimu aso la shamanya. Dui sɔ nembetshiyaka dia sho pombaka sɛdingola lo dɔmbɛlɔ woho wakokaso ndeka ndjasha l’esambishelo.—Joa. 14:13, 14.
2. Ngande waketawɔ apandjudi amɔtshi leeta la nɔmba amunyi efula lo dinela?
2 Toho ta ndeka ndjasha l’esambishelo: Lo ɛlɔmbwɛlɔ ka Jehowa ndo l’ekimanyielo kande, apandjudi efula wakatatɛ kamba olimu w’ombatshi mboka. (Osam. 26:2, 3; Fil. 4:6) Amɔtshi wakadje welo wa lânde dia kamba oko ambatshi mboka wa tshanda ngɔndɔ ɔtɔi kana ndekana l’ɔnɔnyi. Ɔsɔ aki yoho ya dimɛna ya vɔ pamia olimu awɔ w’esambishelo. Ɔngɛnɔngɛnɔ waya oma lo kamba olimu w’ombatshi mboka akakonya anto efula dia sɛdingola dia kana vɔ koka koma ambatshi mboka wa pondjo.—Etsha 20:35.
3. Naka wɛ aki ombatshi mboka, kakɔna kakokayɛ sɛdingola kakianɛ?
3 Onde wɛ koka nyomonga ombatshi mboka?: Naka wɛ aki ombatshi mboka, kete aha la tâmu wɛ mbohɔka etena kɛsɔ l’ɔngɛnɔngɛnɔ. Onde wɛ ambokana yimba lo dɔmbɛlɔ dia menda kana wɛ koka nyomonga ombatshi mboka? Mbeyaka monga ko ekakatanu wakakokonya dia tshika olimu w’ombatshi mboka waya bu. Ondo etena kambokoka ka wɛ nyomonga la diɛsɛ dia lânde sɔ.—1 Joa. 5:14, 15.
4. Naa diɛsɛ dia lânde diele la ntondo ka ɔmɔmɔ la l’atei aso?
4 Olimu wa dinela wekɔ lo salema ndo kem’edja vɔ wayanga shila. (Joa. 4:35, 36) Ɔmɔmɔ la l’atei aso asɛdingole akambo wele la nde dia menda kana nde kokaka sala etshikitanu dia nde ndeka ndjasha l’esambishelo. Ko naka tambɛna mɛtɛ dia sho kema l’akoka wa pamia olimu aso, shi kete sho kokaka nyanga toho tokina takokaso ndeka ndjasha? (Mako 12:41-44) Ande diɛsɛ diele la ntondo ka wanɛ tshɛ wele akambo wele la wɔ mbashaka diaaso dia Jehowa kamba la wɔ l’olimu w’ombatshi mboka lee!—Osam. 110:3.