Onde Wɛ Sunganaka Kamba Olimu W’ombatshi Mboka?
1 “Hakanyiyaka dia ntsha ɛngɔ kekina. Halɛnyi mɛtɛ kɛnɛ kokoki mbishami ɔngɛnɔngɛnɔ wa nganɛ.” Akate ngasɔ na? Ɔmɛnyi ɔmɔtshi wa Jehowa a l’atei wa nunu nkama wayasha l’ɔngɛnɔngɛnɔ l’olimu wa lo tena tshɛ lo lɔsɛnɔ lawɔ. Onde wɛ amboyambolaka lo dɔmbɛlɔ kana wɛ sunganaka kamba olimu w’ombatshi mboka? Lam’ele takayakimɔ tshɛ le Jehowa, sho la dia kana yimba mɛtɛ dia mbeya kana hatokoke nyomoleka mbetsha wenya efula lo pandjola lokumu l’ɔlɔlɔ la Diolelo. Omalɔkɔ, tênde wembola ɛmɔtshi wayambola anto efula lo dikambo di’olimu w’ombatshi mboka.
DIMBOLA 1: “Vate aha onto tshɛ mbakoka monga ombatshi mboka. Ngande wayomeya ɔnɛ dimi sunganaka kamba olimu ɔsɔ na?”
2 Okadimwelo wa dimbola sɔ nemanɛka la lɔsɛnɔ lasɛnaso ndo ɛkɛndɛ wele laso lo ndjela Bible. Demba kana lɔsɛnɔ lasɛna anto efula nshi nyɛ hawasha diaaso dia nsambishaka wenya 90 lo ngɔndɔ. Ɛnyɛlɔ, akadiyɛso efula wele Akristo wa kɔlamelo tshukama ndo wekɔ l’ana. Vɔ nsambishaka mbala la mbala oko ele akoka awɔ ndo lo yɛdikɔ yakondjawɔ diaaso lo ndjela lɔsɛnɔ lasɛnawɔ. Etena kakondjawɔ diaaso, vɔ mongaka ambatshi mboka wa tshanda ngɔndɔ ɔtɔi kana efula l’ɔnɔnyi ndo vɔ kondjaka ɔngɛnɔngɛnɔ waya oma lo woho wasambishawɔ efula. (Ngal. 6:9) Kânga mbahawakoke monga ambatshi mboka wa lo tena tshɛ kakianɛ, vɔ wekɔ la yimba y’ambatshi mboka, ndo akadiyɛso asɔ wasambisha lokumu l’ɔlɔlɔ l’ohetoheto wekɔ tshondo y’ɔtshɔkɔ le etshumanelo kawɔ.
3 Lo wedi okina, anangɛso l’akadiyɛso wele bu l’ɛkɛndɛ efula wakayalɔngɔsɔla lo sɛdingola awui woleki ohomba dia vɔ monga ambatshi mboka. Ko wɛ ngande na? Onde wɛ ekɔ dikɛnda di’Okristo diamboshidiya kalasa? Onde wɛ ekɔ l’omi lakotsha ehomba wa lo nkumbo kande dimɛna? Onde wɛ tshukama koko bu l’ana wa mbodia? Onde wɛ ambolongolaka pasiɔ? Onto ndamɛ mbahomba mbɔsa yɛdikɔ ya monga ombatshi mboka kana kema. Dimbola diɔnɛ: Onde wɛ kokaka nɔngɔsɔla lɔsɛnɔ layɛ woho wa monga ombatshi mboka?
4 Satana ekɔ lo kamba la dikongɛ diande di’akambo nɛ dia ndodja lɔsɛnɔ laso la tɔkɛnyɔ ko totambiya tshavu l’akambo wa lokaki. Naka sho mbɔsa yɛdikɔ di’aha mbɔtɔ l’akambo wa l’andja ɔnɛ, kete Jehowa ayotokimanyiya dia sho tetemala la mbidja wahɔ wa Diolelo lo dihole dia ntondo ndo kukutɛ waɛsɛ tshɛ wakondjaso l’olimu a Nzambi. Naka sho kokaka ndjalɔngɔsɔla dia monga ambatshi mboka, lande na ahataditshe na?
DIMBOLA 2: “Ngande wakokami ndjashikikɛ ɔnɛ layokoka ndjakotshɛka ehomba ami etena kemi l’olimu wa lo tena tshɛ?”
5 Têye ɔnɛ lo wedja efula, lofulo la wenya wakamba onto lomingu tshɛ dia kondja woho wa nde sɛna tadɛka ɔnɔnyi l’ɔnɔnyi. Koko, efula wekɔ ambatshi mboka ɛnɔnyi k’ɛnɔnyi, ndo Jehowa tetemalaka la mbâsukɛ. Dia mbidja olimu w’ombatshi mboka, pombaka monga la mbetawɔ ndo yimba ya ndjahombia. (Mat. 17:20) Osambu 34:10 toshikikɛka ɔnɛ ‘wanɛ watoyangaka Jehowa hawotohomba ndoko ɛngɔ.’ Onto tshɛ lakamba olimu w’ombatshi mboka pombaka mbokamba ele l’eshikikelo ɔnɛ Jehowa ayowokotshɛ ehomba ande. Ngasɔ mbasalɛnde ambatshi mboka wa kɔlamelo l’andja w’otondo! (Osam. 37:25) Ekɔ mɛtɛ dia, lo ndjela kɛnɛ katawɔ lo 2 Tesalonika 3:8, 10 la lo 1 Timote 5:8, ambatshi mboka hawohombe mendɛka paka l’anya w’anto dia mbâkotshɛka ehomba awɔ wa l’emunyi.
6 Onto tshɛ lasangoya kamba olimu w’ombatshi mboka pombaka ndjela dako dia Yeso nɛ: ‘mbidjasɛ dia ntɛdiki oshinga.’ (Luka 14:28) Ntsha ngasɔ ekɔ dikambo dia lomba. Sawola la wanɛ wele ambatshi mboka wa tomanamana ɛnɔnyi k’ɛnɔnyi. Mbolawɔ woho wâsukɛ Jehowa. Omendji w’otshimbedi anyu ekɔ ombatshi mboka wahokɔ akambo efula ndo nde ayɔngɛnangɛna dia kosha tokanyi dia wɛ mbidja olimu wa lo tena tshɛ.
7 Edja tshɛ keso tatayakitsha l’anya wa Jehowa, hatokokaki shihodia mɛtɛ ka daka dia Yeso diele lo Mateu 6:33. Omoto ɔmɔtshi lele ombatshi mboka wa kɔlamelo akate ate: “Lam’akawatotome lo mbilo kekina dimi la wonyami ombatshi mboka, takiso la falanga, taki paka la yema ya djɛsɛ tshitshɛ la dikɔhɔ dia matɛka. La dikɔlɔ lam’akatamanyi yema yakɔ ya mbo ya ndɛ tshɛ, takate shate: ‘Sho bu ndoko l’ɛngɔ ka ndɛ lui.’ La ntondo ka sho ndala, takalɔmbɛ Nzambi lo dikambo diakɔ. La pindju ka pɛ, kadiyɛso kɛmɔtshi kakadjasɛka suke la lamawakiso akaye ko nde aso ate: ‘lakalɔmbɛ Jehowa dia totomɛ ambatshi mboka. Layonyotshindɛ lushi l’otondo ɛlɔ, koko lam’ele lakami ekɔ yema tshale, lambonyɔlɔmba dia sho ndɛ kâmɛ la midi. Lakela diangɔ dia sho asato.’ Nde akela nyama efula la djɛsɛ.” Hatokoke mamba woho wakatoshikikɛ Yeso ɔnɛ ‘tatoyakiyanyake lo dikambo di’anima aso!’ Nde akayokotshaka ate: ‘Akɔna l’atei anyu, lam’ayondoyakiyanya, ko nde kotsha kubita kânga ɔtɔi l’otale wa lɔsɛnɔ lande?’—Mat. 6:25, 27.
8 Andja ɔnɛ wotodingi wekɔ lo tatɛkɔya ndola la saki ka lomombo. Tekɔ lo sɛngiyama wolo efula dia sho ntsha oko atsha anto akina. Koko, naka sho ngɛnangɛna olimu wa lo tena tshɛ l’okitshakitsha, kete hatotoleka mbidja yimba lo diangɔ dia l’emunyi. (1 Tim. 6:8) Ambatshi mboka wasɛna lɔsɛnɔ l’ɔsɛlɛngɛ ndo lɔlɔngɔswami dimɛna wekɔ la wenya efula wa nsambisha, vɔ mongaka l’ɔngɛnɔngɛnɔ w’efula ndo wekɔ wolo efula lo nyuma nɛ dia vɔ mbetshaka anto akina sɔlɔ. Kânga mbewɔ hawonyi dia ndjadimaka ɛngɛnɔngɛnɔ tshɛ wa lo lɔsɛnɔ, woho wewɔ la wɛdimo l’akambo w’okundji mbâkimanyiyaka dia vɔ kondja ɛlɔlɔ w’oma l’olimu w’ombatshi mboka.
9 Naka sho mbeyaka mɛtɛ ɔnɛ tekɔ lo nshi y’ekomelo ndo ɔnɛ andja wa kɔlɔ ɔnɛ hayoviya nto, kete tayosokoyama lo nyuma dia ndjahombia akambo amɔtshi ko kamba la diaaso tshɛ diakondjaso dia nsambisha lokumu l’ɔlɔlɔ. Naka sho minya washo l’awui a falanga ko kitsha akambo tshɛ l’anya wa Jehowa, kete ondo tayɛna dia sho kokaka kamba olimu wa lo tena tshɛ. Oyadi kânga sho pombaka tona saki mɔtshi ya lomombo dia monga ambatshi mboka, Jehowa ayotɔtshɔkɔla efula.—Osam. 145:16.
DIMBOLA 3: “Dimi ɔlɔngɔlɔngɔ kana osekaseka, lande na ahombami mɛna olimu w’ombatshi mboka oko lotumu lokokimi kamba lo lɔsɛnɔ lami l’otondo na?”
10 Wɛ amboshidiya kalasa ko okanyiya nganɛ wayoyonga lo nshi yayaye. Wɛ kombolaka monga shikaa ndo l’ɔngɛnɔngɛnɔ lo nshi yayaye. Ondo embetsha ayɛ la wanɛ wakosha alako wakotshutshuyakɔ dia wɛ kamba olimu wa kondjaka falanga efula wayona tshima wɛ mbɔtɔ l’univɛrsite ɛnɔnyi efula. Nkum’otema kayɛ k’Okristo kaketshama dimɛna kekɔ lo kotɛ ɔnɛ wɛ pomboka ndjalɔngɔsɔla dia kambɛ Jehowa efula lo ndjela akoka ayɛ. (Und. 12:1) Ondo wɛ ekɔ lo sangoya dia tshukana ko tonga nkumbo kayɛ. Ayoyotsha na?
11 Tɛdikɔ tayoyɔsa l’etena kɛnɛ ka lɔsɛnɔ layɛ tayonga la shɛngiya lo nshi yayɛ yayaye. Naka wɛ ekɔ Ɔmɛnyi wa Jehowa wakayakimɔ ndo wakabatizama, kete wɛ akayasha le Jehowa l’anima ayɛ tshɛ. (Heb. 10:7) Ntondo, tokonga ombatshi mboka wa tshanda ngɔndɔ ɔtɔi kana efula. Ngasɔ mbayoyeya ɛkɛndɛ wonga l’onto lakamba olimu w’ombatshi mboka wa pondjo ndo ɔlɔ wakondjande. Lâsɔ kayoyonga la kanyi ya shikaa ya kɛnɛ kahombayɛ ntsha la lɔsɛnɔ layɛ. Oma lâsɔ, lo dihole dia wɛ mbetsha wenya ayɛ tshɛ wahâyɔtɔ kalasa la olimu wa l’emunyi wa wonya w’otondo, lande na ahayonge ombatshi mboka wa pondjo? Amɔtshi wanɛ wakakongaka tsho la ntondo ka ndjokoma ambatshi mboka wonyanga woho wakiwɔ kotatɛ k’ɔlɔmɔ.
12 Naka wɛ eke dikɛnda, kete sunganaka wɛ kamba la diaaso diele layɛ di’onyemba kele takondjisha ɛlɔlɔ waya oma l’esambishelo ka lo tena tshɛ. Naka wɛ hatongi ombatshi mboka wa pondjo, kete wɛ hatokoka mbika etshina k’ɔlɔlɔ ka diwala lushi lokoyolanga tshukana. Etena katayatshunde ndo katayole lo nyuma, ondo wɛ ayɔsɔna dia kamba olimu w’ombatshi mboka lo lɔsɛnɔ layɛ l’onto layoyotshukana la yɛ lele la tokanyi tele oko tayɛ. Ambatshi mboka amɔtshi wotshukani wakasɔnama l’olimu w’otshimbedi kana wa misiɔnɛrɛ. Yoho ya lɔsɛnɔ shɔ yekɔ dimɛna efula mɛtɛ!
13 Oyadi eke esadi womeyɛ olimu w’ombatshi mboka ko kana aya edja, wɛ ambeya awui akina lâdiko dia mukanda wakayeke ndo ambolowanyema hakoke ndeka ndo woho wotokolowanya elimu ekina tshɛ wa lanɛ la nkɛtɛ. Olimu w’ombatshi mboka tolakanyaka dia sho ndjahokola, ndjalɔngɔsɔla, monga la dionga di’ɔlɔlɔ otsha le anto akina, ndjaɛkɛ le Jehowa ndo monga la lotutsha ndo ɔlɔlɔ, waonga wele ohomba dia kondja ɛkɛndɛ a weke.
14 Anto watongaka l’okandokando oko nshi nyɛ. Naka sho minya alaka wa Jehowa, akambo watolaka anto yema tshitshɛ tsho mbakotshama. Lam’ele wɛmɛ kaya l’ɔkɛndɛ wa nshi yayɛ yayaye, shi etena kɛnɛ koleki dimɛna wɛ nkana yimba ɔlɔlɔ dia mbeya kɛnɛ kayoyotsha la lɔsɛnɔ layɛ lo ɛnɔnyi wayaye? Ɛdika dimɛna diɛsɛ dia monga ombatshi mboka. Wɛ hanyangaki pondjo l’ɔtɛ wakayasɔnɛ dia kamba olimu ɔsɔ lo lɔsɛnɔ layɛ.
DIMBOLA 4: “Kema layongaka paka asolo l’olongo oto dia kotsha lofulo la wenya walɔmbama? Kakɔna kayotomba naka hakotshisha oyango?”
15 Ɔnɛ lalodja dɛmandɛ dia monga ombatshi mboka wa pondjo pombaka kadimula lo dimbola nɛ: “Onde wɛ amboyalɔngɔsɔla dia kotsha wenya 1000 walɔmbama l’ɔnɔnyi?” Dia kotsha oyango ɔsɔ, pombaka nsambishaka wenya oko esato lo lushi. Dikambo sɔ nɔmbaka di’onto monga l’ekongelo ka dimɛna ndo kiyela. Ambatshi mboka efula, ndjaka l’ɔkɔngɔ a ngɔndɔ ngana tsho kete wambɔlɔngɔsɔla ekongelo kawɔ ka wenya dimɛna efula.
16 Koko, Undaki 9:11 mbutaka dui dia mɛtɛ di’ɔnɛ: ‘Tena ndo akambo waki kosangoyama komɛka onto tshɛ.’ Hemɔ ka wolo kana dikambo dikina diaki ombatshi mboka konongamɛka kokaka mbôshimba dia nde kotsha oyango. Naka dikambo diakɔ hadioviyisha ndo diambotomba l’etatelo k’ɔnɔnyi w’olimu, kete nde koka ndjokotsha wenya ɛsɔ naka nde nyomɔlɔngɔsɔla ekongelo kande. Ko ngande naka dikambo dia wolo ambotomba, ko ambotshikala paka ngɔndɔ ngana ntsho y’ɔnɔnyi w’olimu shila ko ombatshi mboka hakotshisha wenya wakambɛɛ na?
17 Naka aya ngɔndɔ ngana y’etondo yeyɛ la hemɔ, kana l’ɔkɔkɔ wa dikambo dimɔtshi diakiyɛ kosangoya, ko wɛ hayokoka kotsha oyango wa wenya, ko wɛ sawola l’ose kɔmite k’olimu ka l’etshumanelo ɔmɔtshi ndo mbôlembetshiya dikambo diakɔ. Naka dikumanyi wambɛna ɔnɛ ayonga dimɛna vɔ kotshika dia wɛ tetemala l’olimu ayɛ aha la ndjakiyanya dia kotsha wenya wakambɛɛ, kete vɔ koka ntsha woho wɛnawɔ. Sekeletɛlɛ ayofunda lo fishi kayɛ k’opandjudi ɔnɛ hawokɔlɔmbɛ dia tshima wɛ kotsha wenya wakambɛɛ. Ɔsɔ aha vakashi, koko wambɛdikola yema lo yoho ya lânde lo menda akambo wakakokomɛ.—Enda l’Olimu Aso wa Diolelo wa Ngɔndɔ ka Tanu 1987, lɛkɛ 3, odingɔ 7.
18 Ambatshi mboka wambekesanɛ l’olimu awɔ nsambishaka wenya efula l’etatelo k’ɔnɔnyi w’olimu. Vɔ mbetshaka olimu awɔ w’ombatshi mboka la ntondo k’akambo akina tshɛ, diɔ diakɔ diahawatotshaka awui amɔtshi wele bu ohomba efula mbala mɔtshi. Naka ombatshi mboka hayokotsha wenya nɛ dia nde heye ndjalɔngɔsɔla kana kondjela ekongelo kande dimɛna, kete nde la dia ntsha tshɛ dia kotsha wenya wambombɛɛ aha la nongamɛ ɔnɛ wawɔsɛ yɛdikɔ mɔtshi ya lânde.
19 Tena dimɔtshi, otshikitanu ɔmɔtshi waheyama mbewɔ tɔtɔka lo lɔsɛnɔ l’ombatshi mboka. Ondo ayonga edja, nde hatokoka kotsha lofulo la wenya walɔmbama l’ɔkɔkɔ wa tohemɔhemɔ tahashile, ɛkɛndɛ wa lo nkumbo wamboleka efula, kana akambo akina wa woho ɔsɔ. Naka ngasɔ kete ayoleka dimɛna kalola opandjudi, ko kambaka olimu w’ombatshi mboka wa tshanda tena tshɛ diatanema diaaso. Ndoko yɛdikɔ yakɔsama dia tshika onto l’ɔnɔngɔ w’ambatshi mboka etena kele lɔsɛnɔ lande hayowosha diaaso dia nde kotsha wenya walɔmbama.
20 Tambolongamɛ dia yɛdikɔ yakɔsama ya ndjashaka lo yoho ya lânde le wanɛ wakotsha kɛnɛ kalɔmbama ayoleka mbâsokoya dia vɔ kamba olimu ɔsɔ aha la ndjakiyanya tshanana. Dikambo sɔ diayokimanyiya ndo wanɛ wakamba olimu wa lo tena tshɛ dia vɔ tetemala la lotumu lawɔ. Sho nangaka dia ambatshi mboka kotsha olimu awɔ.
DIMBOLA 5: “Dimi nangaka ntsha dikambo dimɔtshi ndo ndjâla l’ɔngɛnɔngɛnɔ oma lɔkɔ. Onde layɔngɛnangɛnaka l’olimu ami w’ombatshi mboka?”
21 Ɔngɛnɔngɛnɔ wa mɛtɛ nemanɛka efula la diokanelo dia mama diasa onto la Jehowa ndo la dietawɔ diaso dia mbôkambɛ la kɔlamelo. Yeso akakikɛ otamba w’asui ‘l’ɔtɛ w’ɔngɛnɔngɛnɔ waki la ntondo kande.’ (Heb. 12:2) Nde akongaka l’ɔngɛnɔngɛnɔ lo ntsha lolango la Nzambi. (Osam. 40:8) Lo dikongɛ di’akambo dia nshi nyɛ, sho koka monga l’ɔngɛnɔngɛnɔ naka elimu aso efula mendanaka la ɔtɛmwɛlɔ watɛmɔlaso Jehowa. Sunganaka sho ndjela eyango wa lo nyuma nɛ dia teyakɔ ɔnɛ tekɔ lo ntsha kɛnɛ kele ɔlɔlɔ. Ɔngɛnɔngɛnɔ ndjaka oma lo mbisha, ndo hateye yoho kina yoleki ɔlɔlɔ ya ndjasha naka aha mbetsha akina woho wa vɔ kondja lɔsɛnɔ la pondjo l’andja w’oyoyo waki Nzambi.—Etsha 20:35.
22 Ombatshi mboka wakatatshi l’odingɔ wa ntondo akadilembetshiya ɔnkɔnɛ: “Haleye ɔngɛnɔngɛnɔ woleki wɔnɛ wa mɛna onto leka la yɛ Bible ambomɛ tombola Jehowa l’osalosalo tshɛ. Asolo ndokɔlokɔka ndo mbetawɔ kami keketshamaka lo mɛna woho watshutshuya Dui dia Nzambi anto dia vɔ tshikitanya nsɛnɔ yawɔ dia ngɛnyangɛnya Jehowa.” (Enda lo Tshoto y’Etangelo ya Falase ya Ngɔndɔ ka Dikumi 15, 1997, lɛkɛ 18-23.) Kakɔna kakɔngɛnyangɛnya na? Naka wɛ sɔna dia mbidjaka weolo wonya tshɛ dia ntsha dui di’ɔlɔlɔ lo dihole dia sɔna ɛngɛnɔngɛnɔ wa l’andja ɔnɛ, kete olimu w’ombatshi mboka ayokosha saki k’ɔlɔlɔ ka ntshaka dikambo dimɔtshi di’ohomba diayokɔngɛnyangɛnya mɛtɛ.
DIMBOLA 6: “Lam’ele dia kondja lɔsɛnɔ la pondjo hawɔlɔmbɛ tshima monga ombatshi mboka, shi dimɛ kahomba mbɔsa yɛdikɔ ɔnɛ monge ombatshi mboka kana kema?”
23 Eelo mɛtɛ, wɛmɛ kahomba mbɔsa yɛdikɔ ya monga ombatshi mboka kana kema. Paka Jehowa oto mbokoki menda dikambo diayɛ wɛmɛ. (Romo 14:4) Nde nongamɛka dia wɛ mbôkambɛ l’otema ayɛ tshɛ, l’anima ayɛ tshɛ, la yimba yayɛ tshɛ ndo la wolo ayɛ tshɛ. (Mako 12:30; Ngal. 6:4, 5) Nde nangaka onto lakaha l’ɔngɛnɔngɛnɔ, lôkambɛ l’ɔngɛnɔngɛnɔ, aha la lonyangu kana la wolo. (2 Kor. 9:7; Kol. 3:23) Ngandji kokayɛ Jehowa la onyayɛ onto mbahomba kosokoya dia wɛ kamba lo tena tshɛ. (Mat. 9:36-38; Mako 12:30, 31) Naka ngasɔ mbokayɛ, kete sunganaka dia wɛ kanyiya ɔlɔlɔ lo dikambo di’olimu w’ombatshi mboka.
24 Tambolongamɛ dia kɛnɛ kamboyoka ayokokimanyiya dia wɛ mbɛdikola akoka ayɛ wa monga ombatshi mboka. Onde wɛ koka ndjalɔngɔsɔla dia monga ombatshi mboka wa pondjo? Wɛ ayɛna l’ɛsɛ lanɛ alamanaka wele l’ɔtɛ a dui ɔnɛ: “Ekongelo ka Wenya k’Ombatshi Mboka ka Lomingu la Lomingu.” Kana lomba lo ekongelo ka wenya kayosungana le yɛ ndo kayokokimanyiya dia wɛ nsambishaka wenya oko 23 lo lomingu. L’ɔkɔngɔ, onga la mbetawɔ le Jehowa ndo yaɛkɛ le nde. L’ekimanyielo kande, wɛ ayodja olimu akɔ! Nde akalake ate: ‘Layonyotshulolɛ mɛtɛ ɛtshɔkɔ edja ndo hanyoyohomba ndoko ɛngɔ.’—Mal. 3:10.
25 Ɔnkɔnɛ sho mumbolaka ɔnɛ: “Onde wɛ sunganaka kamba olimu w’ombatshi mboka?” Naka wɛ kokaka kadimula ɔnɛ “eelo,” kete yashikikɛ lushi lahombayɛ tatɛ olimu w’ombatshi mboka wa pondjo aha la tshimbatshimba, ndo onga l’eshikikelo ɔnɛ Jehowa ayokɔtshɔkɔla lo kosha lɔsɛnɔ l’ɔngɛnɔngɛnɔ!
LUSHI L’ƆTƆI LA HENDE LA SATO LA NƐI LA TANU LA SAMALO LA LOMINGU
Pindju Pindju Pindju Pindju Pindju Pindju Pindju
Esambishelo Esambishelo Esambishelo Esambishelo Esambishelo Esambishelo Esambishelo
L’ɔkɔngɔ a midi L’ɔkɔngɔ a midi L’ɔkɔngɔ a midi L’ɔkɔngɔ a midi L’ɔkɔngɔ a midi L’ɔkɔngɔ a midi L’ɔkɔngɔ a midi
Esambishelo Esambishelo Esambishelo Esambishelo Esambishelo Esambishelo Esambishelo
Dikɔlɔ Dikɔlɔ Dikɔlɔ Dikɔlɔ Dikɔlɔ Dikɔlɔ Dikɔlɔ
Esambishelo Esambishelo Esambishelo Esambishelo Esambishelo Esambishelo Esambishelo
Funda ekongelo kayɛ ka lushi tshɛ la lo lomingu la kidiyɔ.
Lɔngɔsɔla dia wɛ nsambishaka wenya 23 lomingu tshɛ. Wenya tshɛtshɛ wa lo lomingu ____________________
[Caption on page 6]
[Box on page 6]
Ekongelo ka Wenya k’Ombatshi Mboka ka Lomingu la Lomingu