Totombolake Jehowa lushi tshɛ
1. Kakɔna kambokeketshama ekambi waki Nzambi dia sala, ndo lande na?
1 Nkumekanga Davidi akɛnya yɛdikɔ yande ya tombolaka Jehowa “lushi la lushi,” mbuta ate pondjo pondjo. (Osam. 145:2, 7, 21) Sho lawɔ tekɔ la ɛkɔkɔ w’amɛna wa tombolaka Jehowa lushi tshɛ.—Osam. 37:10; 145:14, 18; 2 Pet. 3:13.
2. Ngande wakoka ase nkumbo tombolaka Jehowa lushi tshɛ?
2 Lawakaso: Tekɔ la ekanda w’amɛna watokimanyiya dia kɛtshanyaka akambo wendana la Nzambi ndo la Bible etena kasɛdingolaso divɛsa dia lushi, kasalaso Ɔtɛmwɛlɔ wa lo nkumbo ndo kalɔngɔsɔlaso nsanganya ya l’etshumanelo. Nkumbo efula yekɔ la mbekelo ka ndɛka kâmɛ kânga mbala ɔtɔi lushi tshɛ. Dui sɔ mbakimanyiyaka dia sawolaka dimɛna ndo mbashaka waaso wa tombola Jehowa. Asawo wa ngasɔ wa akambo wasɔna ambutshi mbeyaka mbakimanyiya dia vɔ mbodia anawɔ lo “elembe la lu wetshelu wa Khumadiondjo.”—Ef. 6:4; Euh. 6:5-7.
3. Waaso akɔna wele la so etena keso kâmɛ l’anangɛso l’akadiyɛso?
3 L’atei w’anangɛso l’akadiyɛso: Etena keso l’esambishelo kana lo nsanganya ya l’etshumanelo, sho mongaka la waaso w’amɛna wa tombola Jehowa kâmɛ la wanyaso ambetawudi. (Tuk. 15:30; Fil. 4:8; Heb. 13:15) Lam’ele sho tshɛ mbokaka Jehowa ngandji, bu dui dia wolo dia mɛnya lowando lele la so la l’otema ɔtɔi lo ɔlɔlɔ wa Jehowa etena kasawolaso lam’asaso.—Osam. 106:1.
4. Lâdiko dia olimu w’esambishelo, naa waaso akina wakokaso tombolaka Jehowa?
4 Etena kasawolaso la wanɛ wele kema ambetawudi: Kânga mbele ondo akambo wele la so hawotosha diaaso dia sambishaka lushi tshɛ, sawolaka kânga lo tshena pe l’asekaso wa l’olimu, wa la kalasa ndo anto akina wotodingi lo kɛnɛ kendana la Jehowa ndo la asangwelo ande kokaka mbisha anto wele l’etema w’ɛlɔlɔ elongamelo. (Osam. 27:14; 1 Pet. 3:15) Etena kakandatɛngɔlaka lo aviyɔ, kadiyɛso kɛmɔtshi akasambisha wonyande pasase ndo kɛnɛ kakawotɛ kadiyɛso kakôkeketsha. Ɔnkɔnɛ nde akasha kadiyɛso adrɛsɛ ndo numɛlɔ yande ya telefɔnɛ dia vɔ tetemala sawolaka. Oko wele andja ɔnɛ l’ofukutanu ndo wataleke akambo wa lɔkɔ ndana, ekambi waki Jehowa wekɔ lo tetemala mɛmbɛ wanɛ wâhokamɛ ‘lokumu l’ɔlɔlɔ la ɛngɔ kɛmɔtshi ka dimɛna.’ Dui sɔ mbishaka anto akina elongamelo ndo mbakimanyiyaka dia vɔ tombola Jehowa.—Is. 52:7; Romo 15:11.
5. Bonde keso la nsaki ka tombola Jehowa, ndo dui sɔ kokaka monga la etombelo akɔna?
5 Ande ɔngɛnɔngɛnɔ wahomba monga la Jehowa etena kɛnande ekambi ande wôtombola lushi tshɛ lee! L’ɛnyɛlɔ ka ditongami diaki Jehowa diɛnama diotodingi, sho lawɔ kokaka mbotombolaka lushi tshɛ lawakaso, l’etshumanelo ndo etena kasawolaso la anto akina wahatatatɛ tombola Jehowa kâmɛ la so.—Osam. 19:1-4.