Tonge okimanyedi w’ɔlɔlɔ lo esambishelo ka lo luudu la luudu
1. Naa ɛlɔlɔ waya lo nsambisha kâmɛ la onto okina?
1 Lo diaaso dimɔ, Yeso akatome ambeki 70 dia vɔ tosambisha ndo nde “akâtumi ahendi ahendi.” (Luka 10:1) Lo mɛtɛ, yɛdikɔ shɔ yakakimanyiya ambeki ande dia vɔ kimanyiyana ndo keketshanya etena kakawatasambishaka. Etena katombaso l’opandjudi okina l’esambishelo, ngande wakokaso monga ohomba le nde?
2. Etena kɔtshiya ɔnɛ lakatumbi la so sawo, ngande wahombaso mpokamɛ ndo lande na?
2 Lo mpokamɛka: Hokamɛ la yambalo tshɛ etena kɔtshiya ɔnɛ lotumbi la yɛ sawo. (Jak. 1:19) Etena kadiande divɛsa, yela wadielo lo Bible kayɛ. Endaka onto latɛkɛta, oyadi ɔnɛ lakatumbi la yɛ kana ompokami anyu. Naka wɛ mbidja yimba efula lo sawo, kete dui sɔ mbeyaka nkeketsha ompokami anyu dia nde nsala woho akɔ wâmɛ.
3. Etena kakɔna kakoka ɔnɛ lakatumbi la so mɛna ohomba wa sho mbɔsa ɔtɛkɛta?
3 Lo mbeya etena ka mbɔsa ɔtɛkɛta: Etena kɔtshiya ɔnɛ lakatumbi la so sawo, tayowosha nɛmɔ naka sho mbotshika dia nde nɔmbɔla sawo diande. (Romo 12:10) Tewɔ dia mbohembolaka ɔtɛkɛta. Naka nde ambohɛ kɛnɛ kolanginde mbuta kana ompokami ambonyiya dui kana dimbola dimɔ ko tambɛna dia ɔnɛ lakatumbi la so ekɔ l’ohomba w’ekimanyielo, kete tayohemba dia nkotsha dui dimɔ lâdiko dia kɛnɛ kotshinde lo dihole dia mbɔtshiya dui dikina diahendana la kɛnɛ katɛkɛta osekaso. (Tuk. 16:23; Und. 3:1, 7) Naka tekɔ lo nanga mbɔsa ɔtɛkɛta, kete kɛnɛ kayangaso mbuta kakotsha lo kɛnɛ kasambishaso onto.—1 Kor. 14:8.
4. Kakɔna kayotosha ɔngɛnɔngɛnɔ ndo tokondjiyɛ etombelo w’ɛlɔlɔ l’esambishelo?
4 Etena kakakomiya ambeki 70 la nsambisha, vɔ “wakakalula la ongenongeno.” (Luka 10:17) Sho lawɔ tayonga la ɔngɛnɔngɛnɔ ndo tayokondja etombelo w’amɛna l’esambishelo naka sho mpokamɛka ndo mbeyaka etena ka mbɔsa ɔtɛkɛta dia nkimanyiya ɔnɛ lakatumbi la so l’esambishelo ka lo luudu la luudu.