Tolowanya akoka aso wa nsambisha—Lo monga okimanyedi w’oshika
Ohomba wa dikoka sɔ: Yeso akeyaka ohomba wa nsambisha l’onto okina. Diakɔ diele, etena kakandakahanya ambeki ande 70 dia vɔ ntshɔ la ntondo ka nde dia tosambisha, nde akawatome ahende ahende. (Luka 10:1) Etena kahomanayɛ l’okakatanu ɔmɔtshi kana keyɛ bu l’eshikikelo lo woho wa nkadimola ompokami ayɛ, opandjudi watasambisha la yɛ koka kokimanyiya. (Und. 4:9, 10) Nde koka kotɛ awui amɔtshi wakahomana la nde ndo lo waaso amɔtshi kosha dako diakoka kokimanyiya dia wɛ ndeka monga osambisha wa manamana. (Tuk. 27:17) Nde koka nto kokeketsha l’ekimanyielo k’asawo wakeketsha wayondotasawolaka la yɛ ntondo ka nkoma lo luudu lokina.—Flpɛ. 4:8.
Woho wa nsala dui sɔ:
• Dja yimba etena kasambisha opandjudi wakatombi la yɛ. (Jak. 1:19) Etena kadiawɔ divɛsa dimɔtshi, taayelaka ndo wɛ lo Bible kayɛ. Dui sɔ diayokokimanyiya dia wɛ monga l’akoka wa mbisha kanyi naka ekɔ ohomba.
• Onga l’ekanelo k’ɔlɔlɔ dia mbeya kana ekɔ ohomba wɛ mbisha kanyi mɔtshi ndo etena kakokayɛ nsala dui sɔ. (Tuk. 25:11) Naka wɛ ambotshindɛ opandjudi ɔmɔtshi dia tɔlɔmbɔla wekelo wa Bible, kɔmatɛrɛ yayoyosha lo waaso amɔtshi koka mandɔma. Koko, etena katanyasambisha lo luudu la luudu, opandjudi watasambisha la yɛ mbeyaka nkombola dia ndamɛ ntɛkɛta lo mbala kande. Lo mɛtɛ, naka onto latasambisha la yɛ eke opandjudi w’oyoyo kana bu l’eshikikelo lo woho wa nkadimola dimbola kana wa mbekola wekamu, ondo nde koka ngɛnangɛna ekimanyielo kayɛ. Koko, oyadi wɛ ambotshɔ l’opandjudi ɔmɔtshi dia tosambisha lo luudu la luudu, dia tosala wendelo w’eyoyo kana dia tɔlɔmbɔla wekelo wa Bible, toohembolake ɔtɛkɛta, toyaetɛke kanga sawo kana mbɔtshiya sawo dikina.
• Tɛnde awui wakahomana la yɛ. Naka lo diaaso dimɔtshi wɛ ambɛna dia ekɔ ohomba mbisha opandjudi watasambisha la yɛ dako dimɔtshi dia nde ndeka monga manamana l’esambishelo, todilamake. (Tuk. 3:27) L’etena kahombama, wɛ koka mbombola ɔnɛ: “Oko le yɛ, onde mbɔtwɛlɔ kakakambi la yɛ kaketshi dimɛna?” kana ɔnɛ: “Lam’alangayɛ, dimi koka kosha dako dimɔtshi?” kana ɔnɛ: “Dimi nganɛ mbatomosalaka.” Tohɛke dia kaanga mbangɛnangɛna apandjudi amɔtshi di’onto mbosha dako lo diaaso dimɔtshi, vɔ koka nkɔmɔ naka vɔ mbashaka dako lo dindja tshɛ diasalawɔ.
Hemba nsala nganɛ lo ngɔndɔ kɛnɛ:
• L’ɔkɔngɔ wa wɛ nsambisha l’opandjudi ɔmɔtshi, tɛnde kɛnɛ kakandasadi kana kakandatshi kakawokonyisha okimanyedi w’oshika.