Ekadimwelo Lo Ambola Anyu

◼ Onde Ɛmɛnyi wa Jehowa pombaka nsangola awui kana asawo ko takahɛka anto?

Sho keketshamaka oma l’asawo wa lo Bible washama. (Etsha 15:32) Ɔnkɔnɛ, sunganaka dia sho nkombola dia tokeketsha anto wahongi lo losanganya l’awui wakatami. Lam’ele bandɛ efula yambosalema, aya kema dui dia wolo dia sho nsangola asawo washama. Anto amɔtshi namaka bandɛ y’asawo wakawasangola mbidja ndo asawo wamboshamaka ambeta ɛnɔnyi efula ndo vɔ ndjâsangolaka dia mbisha angɛnyi awɔ. Akina wambosala waa sitɛ Web ndo vɔ mbidjaka asawo asɔ lɔkɔ lo wahɔ w’onto tshɛ lalanga mbadia.

Mbokɛmaka hwe dia bu kɔlɔ di’onto nsangola asawo dia wahɔ ande ndamɛ kana w’ase nkumbo kande. Lâdiko dia lâsɔ, dikumanyi mbeyaka nɔngɔsɔla dia asawo sangɔma dikambo di’ase etshumanelo wele la hemɔ wahakoke ndja lo nsanganya. Koko, ekɔ ɛkɔkɔ w’eshika wahatakoke kahɛ anto asawo wakatasangola.

Lam’ele asawo mbishamaka lo ndjela ehomba wa l’etshumanelo, sho kokaka ndjoka asawo wakasangɔma lo yoho ya kɔlɔ lam’ele hateye awui wakayokonyaka dia asawo akɔ mbishama. Lâdiko dia lâsɔ, ayonga dui dia wolo le so dia mbeya onto lakasha sawo diakɔ ndo etena kakandadisha woho wa sho ndjashikikɛ di’awui wakatama lo sawo diakɔ watete loowe ndo wekɔ mɛtɛ. (Luka 1:1-4) Ndo nto, nkahanya asawo wakatasangola mbeyaka ntshutshuya anto amɔtshi dia vɔ mbidja yimba kana nkotola yambalo y’anto oya le wɔ ndo nongola nɛmɔ diahawakoke nongola.—1 Kor. 3:5-7.

Ɔhɔmbɔ wa kɔlamelo ndo wa kɛsɔ ekɔ lo nkamba olimu wa wolo dia tosha mbo ya ndɛ ya lo nyuma ‘lo yɛdikɔ yakoka’ ndo ‘l’etena kakoka.’ (Luka 12:42) Kɛsɔ mendanaka ndo la ekongelo k’asawo washama lo tshumanelo di’Ɛmɛnyi wa Jehowa ndo l’awui wasangolawɔ wakokaso ntana lo adrɛsɛ aso wa l’Ɛtɛrnɛtɛ jw.org Web site. Sho kokaka monga l’eshikikelo k’ɔnɛ ɔhɔmbɔ wa kɔlamelo la wa kɛsɔ kamɛ la Olui-walɔmbɔla awɔ wayotoshaka kɛnɛ kele laso ohomba dia nshikikala lo mbetawɔ.—Etsha 16:4, 5.