Woho wa nkamba la diangɔ dia lohokamɛ diakadjama l’eshinga
1. Laadiko dia ekanda wakafundama, naa diangɔ dikina di’ohomba diele la so?
1 Anto efula ngɛnangɛnaka nkamba la jw.org dia mbadia ɛtɛkɛta w’amɛna ndo w’eshika w’akambo wa mɛtɛ. (Und. 12:10) Ko onde wɛ ambokambaka la diangɔ dia lohokamɛ diakadjama l’eshinga? Diangɔ sɔ diakasalema woho wa sho monga l’akoka wa mpokamɛ akambo efula wele lo sitɛ kaso k’Ɛtɛrnɛtɛ. Ngande wakokaso nkondja wahɔ oma lo diangɔ dia lohokamɛ diakadjama l’eshinga?
2. Ngande wakokaso nkamba la diangɔ dia lohokamɛ diakadjama l’eshinga etena kasalaso wekelo w’onto ndamɛ kana wa lo nkumbo?
2 Lo wekelo aso w’onto ndamɛ ndo wa lo nkumbo: Pokamɛka awui w’oma lo Bible wakadjama l’eshinga, wa lo periodikɛ kana l’okanda ɔmɔtshi etena keso lo lɔkɛndɔ kana keso lo nkamba elimu aso wa lushi la lushi koka tokimanyiya dia sho ndeka nkamba la wenya aso dimɛna. (Ɛf. 5:15, 16) Sho koka nkotsha akambo wotshikitanyi l’ɔtɛmwɛlɔ aso wa lo nkumbo lo pokamɛka wadielo w’okanda ɔmɔtshi ko tayelaka wadielo akɔ lo kɔpi kaso. Kamba la diangɔ dia lohokamɛ diakadjama l’eshinga etena kasalaso wekelo aso w’onto ndamɛ ekɔ la wahɔ wa laande naka tekɔ lo nanga ndowanya wadielo aso kana naka tekɔ lo mbeka ɔtɛkɛta ɔmɔtshi.
3. Anto akɔna wa l’ɛtshi kaso ka nkɛtɛ wakoka nkondja wahɔ oma lo diangɔ dia lohokamɛ diakadjama l’eshinga?
3 L’olimu w’esambishelo: Anto wa l’ɛtshi kaso ka nkɛtɛ wɛna dia wekɔ la wesanu efula dia mbadia kokaka mbetawɔ mpokamɛ diangɔ diakadjama l’eshinga. Kana sho koka mpomana l’anto watɛkɛta ɔtɛkɛta okina ndo wakoka mbetawɔ esadi eto naka vɔ mboka losango la Diolelo ‘l’ɔtɛkɛta awɔ wa lotɔ.’ (Ets. 2:6-8) Lo bɛtshi dimɔtshi dia nkɛtɛ, mpokamɛ ekɔ dui dimɔtshi di’ohomba dia lo mbekelo yawɔ. Ɛnyɛlɔ, le waa Hmong, anto wekɔ la mbekelo ka kɔndɔlɛka nɔnga y’eyoyo awui wendana l’ɔkɔndɔ awɔ l’onyɔ ndo vɔ kimɛka dimɛna efula awui wahokamɛwɔ. Lo mbekelo efula ya l’Afrikɛ, anto ngɛnangɛnaka mbeka oma lo tshimbo y’ɛkɔndɔ wa l’onyɔ.
4. Ambola akɔna wakokaso ndjambola lo kɛnɛ kendana la nkimanyiya anto wa l’ɛtshi kaso ka nkɛtɛ?
4 L’ɛtshi kayɛ ka nkɛtɛ, onde ayonga ohomba mpokamiya ompokami ayɛ ɔmɔtshi ɛngɔ kɛmɔtshi kakadjama l’eshinga l’ɔtɛkɛta ande hita? Onde onto ɔmɔtshi koka nkondja wahɔ oma l’okanda wakadjama l’eshinga wakayotomɛ lo mesajɛ? Onde sho koka telesharjɛ okanda ɔmɔtshi wakadjama l’eshinga ko mbidja lo CD ko kisha ompokami aso wakɛnya nsaki, mbala mɔtshi ndo kɔpi kakafundama lofundama k’okanda akɔ? Dibuku, biukubuku, periodikɛ, kana traktɛ tshɛ kakadjama l’eshinga kashaso onto ɔmɔtshi l’esambishelo, koka mbadiema oko okanda wakatasha onto. Diangɔ dia lohokamɛ diakadjama l’eshinga diakatondjama dia sho nkamba la diɔ etena kasalaso wekelo w’onto ndamɛ ndo k’onɛso ntɔngɔ y’akambo wa mɛtɛ wa Diolelo.—1 Kɔr. 3:6.