‘Tôkanake kɛtshi’
1. Kakɔna kele anto l’ohomba ɛlɔ kɛnɛ na?
1 Ndoko lushi lambongaka anto l’ohomba wa mbokama kɛtshi ndo kimanyiyama l’ɔkɔndɔ w’ana w’anto oko ɛlɔ kɛnɛ. Woho watalana akambo wa l’andja ɔnɛ ambokonya anto efula dia vɔ nshisha ɔngɛnɔngɛnɔ, elongamelo ndo nkɔmɔ. Miliyɔ y’anto wekɔ l’ohomba w’ekimanyielo ndo oko weso Akristo, sho ndjakiyanyaka l’otema ɔtɔi lo dikambo dia wanyaso anto. (Mat. 22:39; Ngal. 6:10) Ngande wakokaso mɛnya woho wayakiyanyaso lo dikambo diawɔ na?
2. Naa yoho yoleki dimɛna yakokaso nkɛnɛmɔla kɛtshi?
2 Olimu wa kɛtshi: Nzambi ndamɛ mbele kiɔkɔ y’esambelo k’oshika ndo ka mɛtɛ. (2 Kor. 1:3, 4) Jehowa tokeketshaka dia sho mbôkoya lo ‘mbokanaka kɛtshi’ ndo nde akatosha ɔkɛndɛ wa nsambisha wanyaso anto lokumu l’ɔlɔlɔ la Diolelo. (1 Pet. 3:8) Yoho yoleki dimɛna yakokaso nkeketsha “akanga w’etema wambate” ele ndjasha tshɛ l’olimu ɔsɔ nɛ dia paka Diolelo diaki Nzambi mbayonya asui wele l’anto. (Is. 61:1) Lam’ele Jehowa mbokaka ekambi ande kɛtshi, kem’edja nde ayanga minya awui wa kɔlɔ oma la nkɛtɛ ndo mbela andja w’oyoyo wosembwe.—2 Pet. 3:13.
3. Ngande wakokaso mbɔsa ampokami aso oko akawaɔsaka Yeso?
3 Tɔshi ampokami aso oko akawaɔsaka Yeso: Yeso kɔmɛnaka paka ehomba waki l’elui w’anto, koko nde akɛnaka ndo ehomba w’anto l’ɔmɔmɔ. Vɔ waki oko ɛkɔkɔ wele kema l’olami wakoka mbalɔmbɔla. Kɛnɛ kakɛnyi Yeso kakananda otema ande ndo kakôtshutshuya dia mbetsha elui w’anto la solo dia lotutsha tshɛ. (Mako 6:34) Naka sho mbɔsa wanyaso anto oko akawaɔsaka Yeso, kete dui sɔ diayototshutshuya dia mboka ɔmɔmɔ la l’atei awɔ kɛtshi. Tayɛnya dui sɔ lo wondjo wa dui diaso ndo l’ɛnamelo k’elungi kaso. Tayetsha esambishelo lo dihole dia ntondo ndo tayotondjaka ɛtɛkɛta wayokeketshaka ampokami aso tshɛ l’ɔmɔmɔ.—1 Kor. 9:19-23.
4. Lande na kahombaso mboka ampokami aso kɛtshi?
4 Olui wa woke w’anto w’oma lo wedja tshɛ mbetawɔka losango la Diolelo lâsambishaso lo menda woho wayashaso le wɔ. Oko watetemalaso mboka ampokami aso kɛtshi, tekɔ lo ngɛnyangɛnya ndo ntombola Jehowa Nzambi kaso ka kɛtshi.—Kol. 3:12.