Tɔshi diɛsɛ diaso di’olimu la nɛmɔ
1. Ngande wɔsa anto efula wa l’andja ɔnɛ olimu aso w’esambishelo?
1 L’andja ɔnɛ waki Satana, anto efula mbɔsaka olimu aso w’esambishelo oko olimu ‘w’anyanya.’ (1 Kor. 1:18-21) Naka hatendji ɔlɔlɔ, kete kanyi ya kɔlɔ shɔ kokaka tɔkɔmɔla ndo nkitshakitsha ohetoheto aso. (Tuk. 24:10; Is. 5:20) Ɛkɔkɔ akɔna wele la so wa mbɔsa diɛsɛ dia woho weso Ɛmɛnyi wa Jehowa la nɛmɔ?—Is. 43:10.
2. Lande na kakoka olimu w’esambishelo mbelamɛ ɔnɛ ‘olimu w’ekila’?
2 ‘Olimu w’ekila’: Ɔpɔstɔlɔ Paulo akɔsaka olimu w’esambishelo oko ‘olimu w’ekila.’ (Romo 15:15, 16) Lande na kele olimu w’esambishelo wekɔ ‘olimu w’ekila’? Lo ndjasha l’olimu ɔsɔ, sho mongaka ‘ekambi kâmɛ’ la Jehowa ‘Ɔnɛ lele Ekila’ ndo sho mbishaka lonya dia nkidia lokombo lande. (1 Kor. 3:9; 1 Pet. 1:15) Jehowa mbɔsaka olimu aso w’esambishelo oko ‘olambo wa lotombo.’ Ɔnkɔnɛ, olimu w’esambishelo ekɔ dui dimɔtshi di’ohomba efula dia l’ɔtɛmwɛlɔ aso.—Heb. 13:15.
3. Lande na kele nsambisha lokumu l’ɔlɔlɔ ekɔ diɛsɛ dia woke?
3 Nsambisha lokumu l’ɔlɔlɔ ekɔ diɛsɛ dia woke diele tɔtɔi t’anto toto mbele ladiɔ. Andjelo wakakoke nkamba olimu ɔsɔ l’ɔngɛnɔngɛnɔ tshɛ ndo lo yoho yoleki dimɛna. (1 Pet. 1:12) Koko, Jehowa akatɔsɔnɛ sho anto wele kema kokele wɔsama oko ‘mpoke y’awomba’ dia tosha diɛsɛ dia woke sɔ!—2 Kor. 4:7.
4. Ngande wakokaso mɛnya dia sho mbɔsaka olimu aso w’esambishelo la nɛmɔ?
4 Tetsha olimu w’esambishelo lo dihole dia ntondo: Lam’ele sho mbɔsaka diɛsɛ diaso la nɛmɔ, sho mbɔsaka olimu aso w’esambishelo oko ‘dui dioleki ohomba’ lo lɔsɛnɔ laso. (Fil. 1:10) Oma lɔkɔ mbele, tekɔ l’ekongelo ka tombaka lomingu tshɛ l’olimu akɔ. Ompomi wa mishiki wɔsa la nɛmɔ diɛsɛ diande dia memba kâmɛ l’ampomi wa mishiki akina weyama l’andja w’otondo pombaka ndjalɔngɔsɔlaka mbala tshɛ kahombande memba ndo mbidja welo dia ndowanya diewo diande. Woho akɔ wâmɛ mbele, sho ndjalɔngɔsɔlaka la ntondo ka ntshɔ l’olimu w’esambishelo dia monga l’akoka wa ‘manyamanya ɔtɛkɛta w’akambo wa mɛtɛ,’ ndo sho salaka la wolo dia ndowanya ‘diewo diaso dia mbetsha.’—2 Tim. 2:15; 4:2.
5. Onto akɔna lɔsa olimu aso w’esambishelo la nɛmɔ?
5 Tatɔkɔmɔke etena kahetawɔ anto efula losango laso. Tohɔ dia anto efula wangɛnangɛna dia sho ntshɔ towawenda wekekɔ l’ɛtshi kaso ka nkɛtɛ. Koko sho hatoyange dia mbetawɔma le anto. Dui dioleki ohomba ele woho wayaoka Jehowa etena katɛnande tasambisha ndo woho wɔsande welo wadjaso la nɛmɔ di’efula.—Is. 52:7.