Takalongola ɛngɔ k’oshinga wolo
1 Ɔpɔstɔlɔ Paulo akɔsaka ɔkɛndɛ wakawosha Nzambi wa sambisha la nɛmɔ ndo akawɔsaka oko ‘ɛngɔ k’oshinga wolo.’ (2 Kor. 4:7) Nde akakikɛ asui ndo ɛhɛnyɔhɛnyɔ lam’akandakotshaka ɔkɛndɛ ɔsɔ. ha la mpekɔ, nde akasambishaka onto tshɛ lakahomanaka la nde. Nde akande nkɛndɔ efula ya wâle ndo ya pâ l’ashi a wake ndo lo okongo. Ngande wakokaso mbokoya Paulo ndo mɛnya dia sho mbɔsaka olimu aso w’esambishelo la nɛmɔ? (Romo 11:13) Kakɔna ketɛ olimu aso w’esambishelo ɛngɔ koleki oshinga wolo?
2 Ɛngɔ koleki oshinga wolo: Tena efula, diangɔ di’oshinga wolo dia la nkɛtɛ nyɛ mbishaka wanɛ wele ladiɔ pâ l’asolo ndo wahɔ adiɔ wekɔ wa lo tshanda mɔtshi tsho. Lo wedi okina, olimu aso w’esambishelo têlaka ndo sho ndo anto akina ɛlɔlɔ wa pondjo. (1 Tim. 4:16) Vɔ kimanyiyaka akanga w’etema ɛlɔlɔ dia vɔ mbeya Jehowa, sala etshikitanu wahombama lo nsɛnɔ yawɔ ndo monga la elongamelo ka shikaa ka lɔsɛnɔ la pondjo. (Romo 10:13-15) Naka sho mbɔsaka olimu aso w’esambishelo la nɛmɔ di’efula, kete tayonga la oyango w’oshika lo lɔsɛnɔ, tayonga l’ɔngɛnɔngɛnɔ waya lo sala dui di’ɔlɔlɔ ndo la elongamelo ka shikaa kendana la nshi yayaye.—1 Kor. 15:58.
3 Tɛnya dia sho mbɔsaka ɛngɔ kaso k’oshinga wolo la nɛmɔ: Mbala efula, sho mɛnyaka dia sho mbɔsaka ɛngɔ kɛmɔtshi la nɛmɔ lo woho wetawɔso ndjahombia diangɔ dimɔ dikambo di’ɛngɔ kakɔ. Ekɔ mɛtɛ diɛsɛ dia woke dia kamba la wenya aso ndo la wolo aso dia tombola Jehowa! (Ef. 5:16, 17) Woho wakambaso la wenya aso pombaka mɛnya dia sho mbɔsaka awui wa lo nyuma la nɛmɔ di’efula oleki eyango wa l’emunyi. Lam’ele tekɔ la ɛngɔ k’oshinga wolo ka kahana l’anto akina, sho kombolaka sambisha l’ɔngɛnɔngɛnɔ ndo mongaka suke dia sambisha lokumu l’ɔlɔlɔ lo diaaso tshɛ diakondjaso.
4 Mbala efula diangɔ di’oshinga wolo hadiotoshɛmaka koko diɔ tokitshamaka lo dihole diaha woshamu di’anto diɛna. Naka sho mbɔsaka olimu aso oko ɛngɔ k’oshinga wolo, kete vɔ wayonga la shɛngiya y’efula lo lɔsɛnɔ laso. (Mat. 5:14-16) La etema woludi la lowando, nyɛsɔ tokoyake ɔpɔstɔlɔ Paulo nshi tshɛ ndo tokambake la diaaso tshɛ diakondjaso dia mɛnya dia sho mbɔsaka mɛtɛ olimu aso w’esambishelo la nɛmɔ, mbuta ate oko ɛngɔ k’oshinga wolo.