Vidɛo yele l’ɔtɛ a dui ɔnɛ: Les merveilles de la création révèlent la gloire de Dieu
Anto efula ngɛnangɛnaka menda diangɔ diakatongama. Koko, anto yema tshitshɛ tsho mbashihodia dia diangɔ diakatongama kɛnɛmɔlaka akambo efula wendana la Otungi aso a Woke. (Romo 1:20) Ambeta deko aha nɛ, Davidi akeke akambo wendana la Jehowa l’Ɔtɛkɛta Ande wakasambiyama. Ndo nto, nde ‘akɛnyi’ ndo akayasukanya suke la Nde lo tshimbo ya diangɔ diakatongama. (Osam. 8:3, 4) Vidɛo yele l’ɔtɛ a dui ɔnɛ: Ditongami dia diambo mɛnyaka lotombo laki Nzambi (lo Falase) tokimanyiyaka sho l’anaso ndo l’ambeki aso wa Bible dia nsɛdingola dimɛna dimɛna diangɔ dimɔtshi diakatonge Jehowa, mɛna waonga ndo lonto laki Otungi aso a Woke, ndo dui sɔ tosukanyaka suke la nde. L’ɔkɔngɔ wa menda vidɛo nyɛ, enda kana wɛ kokaka nkadimola lo ambola wayela anɛ:
1) Ngande wafudia woke woke ndo woho wokongɛmi andja wɛnama ɔnɛ lowando lele laso le Jehowa? (Is. 40:26) 2) Etena kendaso l’ashi dimɛna dimɛna, wetshelo akɔna wakondjaso lo dikambo dia Nzambi? (Eny. 14:7) 3) Ngande wele woke woke wa nkɛtɛ ndo woho weyɔ suke la wonya mɛnyaka lomba laki Jehowa? 4) Oyango akɔna wele la ngɔndɔ? (Osam. 89:37) 5) Ngande wakalɔngɔsɔla Jehowa di’anto ngɛnangɛna la lɔsɛnɔ? 6) ADN kɛdikɛdi na? (Osam. 139:16) 7) Ngande wotshikitanyi anto la diangɔ dikina tshɛ diakatonge Jehowa la nkɛtɛ? (Etat. 1:26) 8) Kakɔna kakongɛyɛ l’asolo wa lomɔlomɔ dia tosala l’andja w’oyoyo?
Akambo akina: 9) Oma lende akaye kulɛrɛ? 10) Ngande wadɛ ashi ndeka ndo wolo w’okotwelo ko nkoma polo lo tɔsɔdi t’etamba? 11) Ohomba akɔna wele l’ashi lo demba diaso? 12) Sha bɛnyɛlɔ diɛnya diɔtɔnganelo diele lam’asa diangɔ diasɛna. 13) Ngande weya diangɔ diakatongama mbɔtɔ lɔngɛnyi lam’asadiɔ? 14) Elɛwɔ “angle d’or,” ndo ngande wɛnyamawɔ l’etongelo? (Enda lo g-F 9/06 lɛkɛ 24).
‘Tɔsɛdingole dimɛna dimɛna’ etongelo ka Jehowa: Yeso akatokeketsha ɔnɛ: ‘Nyɔsɛdingole dimɛna dimɛna fudu ya l’olongo’ ndo ‘nyokondja wetshelo oma le alɛmbɔlɛmbɔ wa l’oswe.’ (Mat. 6:26, 28) Nsala ngasɔ kokaka keketsha mbetawɔ kaso, nshikikɛ wɛkamu wele la so le Otungi ndo tokimanyiya dia sho mbɔsa lomba, wolo wa nshimbɛ ndo ngandji kaki Jehowa la nɛmɔ di’efula. Lo dihole dia sho mbekola timba tshanana oma l’elimu wa l’andja ɔnɛ, toyatshungwe etena ndo tosale la wolo dia nsɛdingola diangɔ dia diambo diakatonge Jehowa ndo tokanyiya wetshelo watoshadiɔ lo dikambo dia Nzambi kaso.—Osam. 19:1.