Onde wɛ mɛnaka waonga waki Nzambi wahɛnama?

Etena kendayɛ dɛmbɔlɛmbɔ diele la kulɛrɛ efula, olongo woludi la tɔɔtɔ ndo kokayɛ londjo la woho wambɔmbɔ ashi, onde wɛ mɛnaka elimu w’anya waki Otungi? Etongelo kotodingi mɛnyaka hwe waonga wa Jehowa wahɛnama. (Rɔm 1:20) Lo mbɔsa etena ka nkana yimba lo kɛnɛ kɛnaso, sho mɛnaka wolo, ngandji, lomba, losembwe ndo lokaho la Nzambi.​—Os 104:24.

Naa diangɔ dimɔtshi diakatonge Jehowa diɛnayɛ lushi tshɛ? Oyadi l’osomba kodjashiyɛ, wɛ koka mɛna tofudu ndo esongo. Naka sho sɛdingolaka etongelo ka Jehowa la yambalo tshɛ, kete dui sɔ koka tokimanyiya dia nkitshakitsha ekiyanu, ndeka ndjasha l’awui woleki ohomba ndo mfudia mbetawɔ kaso lo dikoka diele la Jehowa dia tokokɛ pondjo pondjo. (Mat 6:25-32) Naka wɛ ekɔ l’ana, kete kimanyiyawɔ dia mɛna waonga wa laande wa Jehowa. Naka sho mfudia lowando laso lo diangɔ diakatongama diotodingi, kete tayoleka ndjasukanya l’Otungi aso.​—Os 8:3, 4.

NYENDE VIDƐO DITONGAMI DIA DIAMBO MƐNYAKA LOTOMBO LAKI NZAMBI​—OSASE NDO KULƐRƐ, NDO OMA LAASƆ, NYOKADIMOLE AMBOLA WAYELA ANƐ:

• Kakɔna katokimanyiya dia mɛna kulɛrɛ?

• Kakɔna kasala dia ɛngɔ kana nyama monga la kulɛrɛ yotshikitanyi lo ndjelana la dihole dietɔ?

• Lande na kɛnaso kulɛrɛ yotshikitanyi l’olongo?

• Naa kulɛrɛ ya diambo yele lo diangɔ diakatongama diɛnayɛ suke la laakayɛ?

• Lande na kahombaso mbɔsa etena ka nsɛdingola diangɔ diakatongama la yambalo tshɛ?