Tatɔfɔnyake dia hatokoke nɔmbɔla wekelo wa Bible
1. Lande na kengenga apandjudi amɔtshi dia nɔmbɔla wekelo wa Bible?
1 Onde wɛ mengengaka dia nɔmbɔla wekelo wa Bible l’ɔtɛ wafɔnyayɛ dia wɛ kema l’akoka wa nsala dui sɔ dimɛna? Lo tena dimɔtshi, ekambi waki Nzambi wa kɔlamelo wa lo nshi y’edjedja, ɛnyɛlɔ oko Mɔsɛ nde la Jɛrɛmiya wakayaoke dia vɔ bu l’akoka wa nkotsha ɛkɛndɛ wakawawasha. (Eto. 3:10, 11; 4:10; Jɛr. 1:4-6) Ɔnkɔnɛ, onto tshɛ kokaka monga la tokanyi ta ngasɔ. Ngande wakokaso nkandola okakatanu ɔsɔ?
2. Lande na kahatahombe komɛ tsho lo sambishaka lo luudu la luudu, ko tshikɛ apandjudi akina olimu wa nɔmbɔlaka wekelo wa Bible?
2 Sho pombaka mbohɔ dia Jehowa hatɔlɔmbɛ pondjo dia sho nsala kɛnɛ kahatakoke nsala. (Osa. 103:14) Sho kokaka nkotsha ɔkɛndɛ wakawatosha wa ‘mbetɛ anto ambeki,’ ndo wa “mbaetsha.” (Mat. 28:19, 20) Jehowa kombisha paka anto wele l’akoka ndo la diewo dia laande diɛsɛ sɔ. (1 Kɔr. 1:26, 27) Oma lɔkɔ, hatohombe komɛ tsho lo sambishaka lo luudu la luudu, ko tshikɛ apandjudi akina olimu wa nɔmbɔlaka wekelo wa Bible.
3. Ngande watosha Jehowa akoka wa nɔmbɔla wekelo wa Bible?
3 Jehowa mbatosha akoka: Jehowa mbatosha akoka wa mbetɛ anto ambeki. (2 Kɔr. 3:5) Oma lo tshimbo y’okongamelo ande, nde tetshaka akambo wa mɛtɛ wa lo Bible wele kaanga wanɛ wakɔtɔ kalasa y’efula ya l’andja ɔnɛ hawowaeye. (1 Kɔr. 2:7, 8) Nde akasale woho wa toho ta mbetsha takakambaka la Yeso, Ombetsha a Woke namema lo Bible dia tosha ɛnyɛlɔ ka sho ndjela ndo nde ekɔ lo ntetemala tolowanya lo tshimbo y’etshumanelo. Laadiko dia laasɔ, Jehowa toshaka dihomɔ diele la so ohomba dia mbeka la anto Bible. Nde akatosha dihomɔ diele oko dibuku Bible etshatɔ, dialembetshiya akambo wa mɛtɛ lo yoho ya shikaa ndo ya wɔdu. Nɔmbɔla wekelo wa Bible bu dui dia wolo oko wadifɔnyaso.
4. Lande na kakokaso monga l’eshikikelo dia Jehowa ayotokimanyiya?
4 Mɔsɛ nde la Jɛrɛmiya waki l’akoka wa nkotsha ɔkɛndɛ awɔ l’ekimanyielo ka Jehowa. (Eto. 4:11, 12; Jɛr. 1:7, 8) Sho lawɔ kokaka nɔmba Jehowa dia nde tokimanyiya. Ndo nto, etena kalɔmbɔlaso wekelo wa Bible, tekɔ lo mbetsha onto ɔmɔtshi akambo wa mɛtɛ wendana la Jehowa ndo dui sɔ ngɛnyangɛnyaka Nzambi. (1 Jni. 3:22) Ɔnkɔnɛ, toyadje oyango wa mbisha lonya l’olimu wa mbeka l’anto Bible, olimu woleki mbisha ɔngɛnɔngɛnɔ.