Sitɛ kaso ka l’Ɛtɛrnɛtɛ kakalɔngɔswama dia wahɔ aso ndo w’anto akina

Yeso akatodjangɛ dia sho nsambisha lokumu l’ɔlɔlɔ la diolelo “lo nkɛtɛ k’otondo oko ɔmɛnyi le anto wa lo wedja tshɛ.” (Mat. 24:14) Dia tokimanyiya dia sho ‘nkotsha olimu aso dimɛna,’ sitɛ watchtower.org, jw-media.org ndo jw.org yambosanganyema tshɛ ndo yeyama lo lokombo la jw.org.​—2 Tim. 4:5.

“Lo nkɛtɛ k’otondo”: Suke l’etenyi ɔtɔi ka l’asato k’anto wa lo nkɛtɛ k’otondo wekɔ lo nkamba l’Ɛtɛrnɛtɛ. Le anto efula, tɔ kaya ehomɔ ka ntondo kakimanyiya dia mbeya nsango, djekoleko le ɛlɔngɔlɔngɔ l’esekaseka. Sitɛ kaso ka l’Ɛtɛrnɛtɛ mbishaka wanɛ wakamba la Ɛtɛrnɛtɛ ekadimwelo wa mɛtɛ lo ambola w’endana la Bible. Tɔ mbakimanyiyaka dia vɔ mbeya okongamelo waki Jehowa ndo mbakimanyika dia vɔ nɔmba di’onto ndjowaetsha Bible ofele la wakawɔ. Dui sɔ diambokimanyiya dia lokumu l’ɔlɔlɔ nkoma polo lo bɛtshi dia nkɛtɛ diele anto bu la waaso efula wa mpokamɛ losango la Diolelo.

“Lo wedja tshɛ”: Dia nsambisha “lo wedja tshɛ,” sho pombaka mbewoya akambo wa mɛtɛ wa lo Bible l’ɛtɛkɛta efula. Wanɛ wɔtɔ lo jw.org kokaka ntana esadi eto awui efula l’ɛtɛkɛta nsuke la 400, oleki sitɛ kina tshɛ ya l’Ɛtɛrnɛtɛ.

Tokambe latɔ dimɛna: Woho welamɛ sitɛ kaso ka l’Ɛtɛrnɛtɛ ɔnɛ jw.org bu tsho l’oyango wa nsambisha anto wele bu Ɛmɛnyi wa Jehowa. Tɔ kakakongɛma dia nkimanyiya ndo Ɛmɛnyi wa Jehowa. Naka wɛ ekɔ l’akoka wa nkamba l’Ɛtɛrnɛtɛ, kete tambokokeketsha dia wɛ ndjaekesanyiya l’adrɛsɛ aso jw.org. Awui wayela anɛ wekɔ alako wɛnya woho wakokayɛ nkamba latɔ.

[Diagramɛ dia lo lɛkɛ 3]

(Dia mbeya awui tshɛ enda l’okanda)

Nsala nganɛ:

1 Funda www.jw.org lo kiombo yele la diko ka lonya la lɔmɔsɔ la ɔrdinatɛrɛ ayɛ.

2 Klikɛ kiombo ya la diko, menus, ndo liens.

3 Hemba nkamba la jw.org lo ɔrdinatɛrɛ kana telefɔnɛ kayɛ ka l’anya. Ekongelo kɛmɔtshi kekɔ kakimanyiya dia mbɔtɔnganyiya la woke wele la ekra, koko akambo wa lɔkɔ wekɔ woho akɔ waamɛ.