Tokoya ɛnyɛlɔ k’amvutshi—Jɔna
1. Waonga akɔna w’amɛna waki la Jɔna?
1 Kakɔna kakoyɛ lo yimba etena kokayɛ di’omvutshi Jɔna? Anto efula mbɔɔsaka oko kanga ɔhɔdu kana kanga otema wolo. Koko, nde akakɛnɛmɔla okitshakitsha, dihonga ndo yimba ya ndjahombia. Ngande ‘wakokaso mbokoya ɛnyɛlɔ’ kaki Jɔna oma lo waonga w’amɛna wakandakɛnɛmɔla?—Jak. 5:10.
2. Ngande wakokaso mbokoya okitshakitsha wa Jɔna?
2 Okitshakitsha: Eelo mɛtɛ la ntondo, Jɔna akalawɔ otsha lo lɛkɛ lokina la nkɛtɛ dia mbewɔ ɔkɛndɛ wakawawosha. Ɔsɔ bu dui dia diambo nɛ dia anto wa l’osomba wa Asuriya waki akanga wa ngala, ndo ase Niniva wakayokomaka lo mbelamɛ ɔnɛ “usumba wa dikila.” (Nah. 3:1-3) Koko etena kakawongola Jehowa, Jɔna akɛnya okitshakitsha ande lo mbetawɔ ɔkɛndɛ wakandayowosha mbala ka hende. (Tuk. 24:32; Jona 3:1-3) Kaanga mbakandatone ɔkɛndɛ ɔsɔ ntondo, Jɔna akasale lolango laki Jehowa. (Mat. 21:28-31) Onde sho lawɔ tamboyashikikɛ dia ntetemala nsambisha lokumu l’ɔlɔlɔ, oyadi tambongɔma kana tekɔ lo mpomana l’ekakatanu l’ɛtshi kaso ka nkɛtɛ?
3. Naa awui amɔtshi wendana l’olimu w’esambishelo watɔlɔmba dia sho monga la dihonga ndo la yimba ya ndjahombia?
3 Dihonga ndo yimba ya ndjahombia: Etena kakeye Jɔna dia yɛdikɔ ya kɔlɔ yakandɔshi yambodja nsɛnɔ y’akɛndjikɛndji wa masuwa lo waale, nde aketawɔ nkimɔ lɔsɛnɔ lande. (Jona 1:3, 4, 12) L’ɔkɔngɔ diko, dia nde nkotsha ɔkɛndɛ wakandalongola la Niniva, Jɔna aketeta l’osomba w’otondo, ondo lo nyanga dihole dia dimɛna diakandahombe memala dia ntatɛ mbewoya elombwelo ka Jehowa. Oma lo kɛnɛ kakandasale kɛsɔ, sho mɛnaka dia Jɔna komonga kanga ɔhɔdu, koko aki ɔprɔfɛta waki Nzambi waki la dihonga. (Jona 3:3, 4) Kayotota dikambo diaso ɛlɔ kɛnɛ? Tekɔ l’ohomba wa dihonga diatosha Nzambi dia sho ntetemala nsambisha l’ohetoheto tshɛ kaanga l’atei w’ɔlɔshamelo. (Etsha 4:29, 31) Dia sho monga la yimba ya ndjahombia, paka sho nkamba la wenya aso ndo l’ekundji aso lo wahɔ w’olimu w’esambishelo.—Etsha 20:24.
4. Lande na kahombaso tshungolaka etena dia kanaka yimba la bɛnyɛlɔ di’amɛna diakatotshikɛ amvutshi waki Jehowa?
4 Etena kadiayɛ ɔkɔndɔ wendana l’omvutshi ɔmɔtshi wa Jehowa, wɛ ayokondja wahɔ w’efula naka wɛ mbɔsa diele oko wɛ mbakahomana l’akambo wakahomana la nde. Yambola wate: ‘Kakɔna kotomosala lo dikambo nɛ? Ngande wakokami mbokoya waonga ande w’amɛna lo lɔsɛnɔ lami?’ (Hɛb. 6:11, 12) Lo asawo w’otsha la ntondo wa lo Olimu aso wa Diolelo, tayɔsɛdingola bɛnyɛlɔ efula diendana la amvutshi waki Jehowa wa kɔlamelo diayotosha wetshelo w’amɛna efula.