Ɛngɔ kombaso dihomɔ dia mbetsha
1. Ngande wele apandjudi w’Akristo wekɔ oko etshudi?
1 Etshudi kambaka la dihomɔ diotshikitanyi. Lam’ele dihomɔ dimɔtshi diekɔ ohomba lo tena dimɔtshi dia nsala elimu wa laande, dihomɔ dikina kambemaka mbala la mbala. Etshudi wa tomanamana wokoongaka la dihomɔ diawɔ di’ohomba sɔ lo ɛngɔ kɛmɔtshi kombawɔ dihomɔ diawɔ, ndo dihomɔ sɔ mbalekawɔ nkamba la diɔ. Bible keketshaka Okristo tshɛ dia ndjasha l’olimu w’esambishelo ndo monga “ose olimu waha la dikambo dia mbotshama nsɔnyi.” (2 Tim. 2:15) Ehomɔ kakɔna koleki ohomba lo ɛngɔ kombaso dihomɔ? Ekɔ Ɔtɛkɛta wa Nzambi mbuta ate, ehomɔ kakamba la so dia ‘mbetɛ ambeki.’ (Mat. 28:19, 20) Ɔnkɔnɛ, sho pombaka nsala la wolo dia monga l’akoka wa nembetshiya “ɔtɛkɛta w’akambo wa mɛtɛ dimɛna.” Koko, ekɔ dihomɔ dikina diakambaso la diɔ mbala la mbala diatanema lo ɛngɔ kombaso dihomɔ dia mbetsha ndo Akristo tshɛ pombaka mbeka dia nkamba la diɔ dimɛna dia mbetsha anto akambo wa mɛtɛ.—Tuk. 22:29.
2. Naa dihomɔ diele la so dia mbetsha anto?
2 Dihomɔ diaso dia mbetsha: Laadiko wa Bible, naa dihomɔ dikina diahomba nkamba la so? Ehomɔ ka ntondo kele la so dia mbetsha akambo wa mɛtɛ wa lo Bible ele Bible etshatɔ mɛtɛ? L’ɔkɔngɔ wa nshidiya la mbeka dibuku nɛ la ombeki, sho kambaka la ‘Nyotshikale lo ngandji ka Nzambi’ dia mbetsha woho wa nkamba l’atɔndɔ wa lo Bible lo lɔsɛnɔ la lushi la lushi. Ɔnkɔnɛ, sho pombaka monga l’akoka wa nkamba dimɛna l’abuku asɔ ahende. Tobukubuku tokina koka monga lo ɛngɔ kombaso dihomɔ dia mbetsha. Lokumu l’ɔlɔlɔ l’oma le Nzambi! ekɔ l’atei wa dihomɔ diakamba la so dia ntatɛ wekelo wa Bible. Naka ɛtshi kaso ka nkɛtɛ kekɔ l’anto wele bu l’akoka wa mbadia dimɛna kana anto watɛkɛta ɔtɛkɛta wele sho bu l’ekanda kana tekɔ la wɔ yema tshitshɛ, sho koka nto nkamba la Hokamɛ Nzambi kana Hokamɛ Nzambi dia wɛ nsɛna pondjo pondjo. Ehomɔ ketshaso ambeki dia vɔ mbeya okongamelo ele Waa na wasala lolango laki Jehowa ɛlɔ kɛnɛ? Tovidɛo takimanyiya dia mbetɛ anto ambeki, ɛnyɛlɔ Lande na mbeka Bible? Kakɔna kasalema lo Mbalasa ka Diolelo? ndo Onde Nzambi ekɔ la lokombo? ɔsɔ tshɛ ekɔ dihomɔ diahombaso mbeka woho wa nkamba la diɔ dimɛna.
3. Olimu aso wa Diolelo w’otsha la ntondo, wayotokimanyiya dia nsala na?
3 Olimu aso wa Diolelo w’otsha la ntondo wayotokimanyiya dia sho monga tomanamana lo nkamba la ekanda ɛmɔtshi wele lo ɛngɔ kombaso dihomɔ dia mbetsha. Naka sho mbidja weolo dia nkamba la dihomɔ sɔ dimɛna, kete tayokamba la dako diakafundama l’ɛlɔmbwɛlɔ ka nyuma k’ekila diata ɔnɛ: “Oyalamake ndo odjake yimba lo wetshelo ayɛ. Otetemale l’akambo asɔ nɛ dia lo nsala ngasɔ, wɛ ayoyashimbɛ ndo ayoshimbɛ wanɛ wakohokamɛ.”—1 Tim. 4:16.