Tosambisha “wehu w’antu tshe”
1. Ngande wele esambisha wa tomanamana wekɔ oko otshudi wa manamana?
1 Otshudi wa manamana ekɔ la dihomɔ efula ndo nde mbeyaka etena ndo woho wahombande nkamba l’ehomɔ tshɛ. Woho akɔ wâmɛ mbele, tekɔ la dihomɔ efula diatokimanyiya dia sho nkotsha olimu aso oko weso esambisha. Ɛnyɛlɔ tobukubuku tele l’awui wotshikitanyi takatondjama dia tokimanyiya dia sho nsambisha “wehu w’antu tshe.” (1 Kor. 9:22) Dikatshi di’okotsha dia Olimu aso wa Diolelo ɔnɛ diekɔ la listɛ la tobukubuku tɔmɔtshi l’atei atɔ ndo diɔ nembetshiyaka anto wendana la tɔ ndo mbishaka alako wɛnya woho wakokaso tisha anto.
2. Etena kakɔna kakokaso nkamba la tobukubuku l’olimu w’esambishelo?
2 Etena ka nkamba la tobukubuku: Otshudi wa manamana tokambaka la ehomɔ kɛmɔtshi paka l’etena ketɔ ohomba. Woho akɔ wâmɛ mbele, sho mbeyaka mbisha anto biukubuku mɔtshi naka tambɛna dia nde ayokondja wahɔ oma lɔkɔ, oyadi aha yɔ mbashaso anto lo ngɔndɔ kakɔ. Ɛnyɛlɔ, naka tekɔ lo ngɔndɔ kashaso anto dibuku Bible etshatɔ ko tekɔ lo tasambisha lo bɛtshi dia nkɛtɛ diele anto wadjasɛ lɛkɔ hawoyasha l’awui wa lo Bible, kete sho kokaka mbasha biukubuku yayonga la wahɔ le wɔ ko oma lâsɔ sho ndjowasha dibuku Bible etshatɔ l’ɔkɔngɔ wa sho nomialomia nsaki kawɔ.
3. Lande na kahombaso monga la diewo di’efula dia mbeya nkamba la dihomɔ diaso di’esambishelo?
3 Afundelo mandolaka wanɛ wakamba olimu awɔ l’etete. (Tuk. 22:29) Lo mɛtɛ, ndoko olimu woleki ohomba ɛlɔ kɛnɛ oko ‘olimu w’ekila wa lokumu l’ɔlɔlɔ.’ (Romo 15:16) Dia monga “usi ulimu laha la dikambu dia mbutshama sonyi,” tosale la wolo dia monga la diewo di’efula dia mbeya nkamba la tobukubuku taso.—2 Tim. 2:15.