YASHA L’OLIMU W’ESAMBISHELO
Tolowanya akoka aso wa nsambisha—Lɔngɔsɔla mbɔtwɛlɔ kayɛ hita dia mbisha anto periodikɛ
OHOMBA WA DIKOKA SƆ: Kaanga mbele bɛnyɛlɔ dia mbɔtwɛlɔ diɛnyami lo dikatshi dia losangaya mbishaka tokanyi t’amɛna, hatotokamba ladiɔ tshɛkɛta lo tshɛkɛta. Wɛ pombaka nkamba l’ɛtɛkɛta ayɛ hita. Ondo wɛ ayokombola nkamba la mbɔtwɛlɔ kɛmɔtshi kotshikitanyi kana la dui dikina diayoleka nkotola yambalo y’anto wa l’ɛtshi kayɛ ka nkɛtɛ. Naka ngasɔ, kete l’ɔkɔngɔ wa wɛ mbadia periodikɛ, nsɛdingola bɛnyɛlɔ dia mbɔtwɛlɔ ndo enda vidɛo ya woho wa mbisha anto periodikɛ, wɛ koka nkamba l’alako wayela anɛ dia wɛ nɔngɔsɔla mbɔtwɛlɔ kayɛ hita.
WOHO WA NSALA DUI SƆ:
Yambola wate: ‘Onde dimi nangaka nkamba l’ɛnyɛlɔ kɛmɔtshi ka mbɔtwɛlɔ?’
EELO
Lɔngɔsɔla ɛtɛkɛta ayɛ wa mbɔtwɛlɔ. L’ɔkɔngɔ wa mbisha onto mɔyɔ wa woho washanawɔ l’ɛtshi kanyu ka nkɛtɛ, tɛnde lo tshena pe ɛkɔkɔ woyeyɛ dia ndjowembola. (Ɛnyɛlɔ: “Dimi lakaye lanɛ l’ɔtɛ wa . . .”)
Sɛdingola kɛnɛ kayoyosalaka dia mbeta oma lo dimbola otsha lo divɛsa, ndo oma lo divɛsa otsha l’okanda wayoyosha onto. (Ɛnyɛlɔ: Dia wɛ mbɔtshiya divɛsa wɛ kokaka mbuta wate: “Okadimwelo wa dimɛna wa dimbola sɔ koka ntanema lanɛ.”)
NDOOKO
Sɔna sawo dimɔtshi di’oma lo periodikɛ diakɔngɛnyangɛnya ndo diayokotola yambalo y’anto wa l’ɛtshi kayɛ ka nkɛtɛ
Sɔna dimbola dimɔtshi diatshutshuya onto dia mbisha kanyi, koko aha dimbola diayodja ompokami l’okandokando. (Ɛnyɛlɔ: Oko ambola watanema lo lk. 2 la periodikɛ.)
Sɔna divɛsa dia mbadia. (Naka Réveillez-vous ! mbalangɛ mbisha onto, kete wɛ koka mbadia divɛsa dimɔtshi naka wɛ alanga, nɛ dia periodikɛ kɛnɛ kakatondjama lo wahɔ wa wanɛ wele la ewo ka tshitshɛ k’awui wa lo Bible ndo wele ondo hawoyoyasha l’awui w’ɔtɛmwɛlɔ.)
Ta dikambo ɔtɔi kana ahende walembetshiya woho wakoka ompokami nkondja wahɔ oma lo wadielo wa sawo diakɔ
LO YOHO KINA
Lɔngɔsɔla dimbola dia mbotshikɛ dia ndjokadimola lo wendelo w’oyoyo
Ɔsa nɔtɛ kayokokimanyiya dia ndjohɔ kɛnɛ kayoyolanga mbuta mbala kayaye