Tetsha anto akambo wa mɛtɛ

Ntatɛ lo Ngɔndɔ ka divwa, Dikatshi dia Losanganya la Lɔsɛnɔ ndo olimu aso diayongaka la mbɔtwɛlɔ kɛmɔtshi k’oyoyo kele l’ɔtɛ a dui ɔnɛ: “Tetsha anto akambo wa mɛtɛ.” Oyango aso ayonga wa mbika epole ɔsɛkɛ lo dui dimɔtshi dia mɛtɛ dia lo Bible lo nkamba la dimbola ndo divɛsa.

Naka tambɛna di’onto ambɛnya nsaki, sho koka nomialomia nsaki kande dikambo dia wendelo okina lo tawotshike okanda ɔmɔtshi kana tawɛnyisha vidɛo mɔtshi y’oma lo jw.org. Sho pombaka nsala la wolo dia nkalola l’ɔkɔngɔ wa nshi ngana dia ndjotetemala la sawo dia mbala ketshi. Mbɔtwɛlɔ y’eyoyo ndo ɛkɛndɛ w’ambeki wayɔsamaka oma lo awui wa lo tshena pe wa lo totshapita ta lo dibuku Kakɔna kakoka Bible tetsha? Lɛkɔ sho koka ntana ambola akina ndo avɛsa wayotokimanyiya dia sho nsala wendelo w’eyoyo kana nɔmbɔla wekelo wa Bible lo nkamba la Bible keto.

Ekɔ paka mboka ɔtɔi keto mbatɔla otsha lo lɔsɛnɔ. (Mat 7:13, 14) Lam’ele sho sambishaka anto wa l’ɛtɛmwɛlɔ wotshikitanyi ndo wakalongola wetshelo wotshikitanyi, sho pombaka mbatɛ akambo wa mɛtɛ wa lo Bible wayɔngɛnyangɛnya onto l’onto. (1Ti 2:4) Naka tosawola l’onto asawo wotshikitanyi wa lo Bible ndo tambolowanya akoka aso “walembetshiya ɔtɛkɛta w’akambo wa mɛtɛ dimɛna,” kete ɔngɛnɔngɛnɔ aso wayofula ndo tayotondoya lo mbetsha anto akina akambo wa mɛtɛ.—2Ti 2:15.