Wɛ koka ngɛnangɛna la ɛtshɔkɔ wa pondjo w’oma le Otungi aso

Nzambi akalake omvutshi Abrahama dia kanula yande mɔtshi yayela ɛtshɔkɔ le “wedja tshɛ wa la nkɛtɛ.” (Etatelo 22:18) Onto akɔna akahombe ndjonga kanula shɔ?

Aya suke l’ɛnɔnyi 2 000 wambeta, wele Nzambi akasha Yeso laki kanula ya Abrahama, wolo wa nsala ahindo wa diambo. Ahindo asɔ wakɛnyaka dia daka diakawalake Abrahama diakahombe ndjokotshama le wedja lo tshimbo ya Yeso.​—Ngalatiya 3:14.

Ahindo wakasale Yeso wakakimanyiya anto dia mboweya oko onto lakasɔnama oma le Nzambi dia ntshɔkɔla anto ndo wakɛnyaka nto woho wayokamba Nzambi la nde dia ntshɔkɔla anto pondjo pondjo. Tende woho wakalekaka tɔtɔmiya ahindo wakasalaka Yeso waonga ande amɔtshi w’amɛna.

Nde aki la ngandji​—Yeso akakɔnɔla wanɛ waki la hemɔ.

Etena kɛmɔtshi, kanga sudi ɔmɔtshi akasɛngansɛnga Yeso dia mbɔkɔnɔla. Yeso akawonanda ndo akawotɛ ate: “Dimi nangaka!” mbala kakɔ ɔtɔi kanga sudi ɔsɔ akakɔnɔ.​—Makɔ 1:40-42.

Nde aki la lokaho​—Yeso akalesha anto waki la ndjala.

Yeso kokombolaka di’anto monga la ndjala. Lo waaso efula, nde akalesha nunu di’anto lo dihindo lo mfudia mapa engana la tosese tongana. (Mateo 14:17-21; 15:32-38) L’ɔkɔngɔ wa vɔ ndɛ, vɔ tshɛ wakalote ndo diangɔ dia ndɛ efula diakatshikala.

Nde aki la kɛtshi​—Yeso akolola anto.

“La kɛtshi tshɛ,” Yeso akolola tshɔi y’ɔna pami ya wadi aki odo laki l’ɔkɛyi, laki ndooko l’onto lakakoke ndjokimanyiya l’ɔkɔngɔ.​—Luka 7:12-15.