Ɛtshɔkɔ wakondja wanɛ wakimanyiya onto ɔmɔtshi lele lo dihombo

Anto efula wele l’andja ɔnɛ wekɔ l’ohomba wa mbo ya ndɛ ndo dihole dia ndala. Amɔtshi wekɔ tsho l’ohomba wa elongamelo kendana la nshi yayaye. Ngande wele welo wadjaso dia nkimanyiya anto asɔ tokonyaka dia sho mbetawɔma le Nzambi ndo tshɔkwama oma le nde?

KƐNƐ KATA AFUNDELO W’EKILA

“Onto loka mbolambola kɛtshi ekɔ lo nsɔndja Jehowa diangɔ, ndo Nde ayowofuta l’ɔtɛ wa kɛnɛ kasalande.”​—TOKEDI 19:17.

KƐNƐ KALEMBETSHIYA NKIMANYIYA ONTO ƆMƆTSHI LELE LO DIHOMBO

Yeso akasha ɔkɔndɔ wendana la pami kakakɔmama oma le apɔtwanyi ndo kakawatshike lasa eko la nyɔi. (Luka 10:29-37) Ɔngɛndangɛnda ɔmɔtshi akemala ndo akakimanyiya pami kakawakɔmɔla ndo kakawahomuya efula kɛsɔ. Nde akasale dui sɔ aha la mbidja yimba lo dioho diakinde.

Pami k’ɔlɔlɔ kɛsɔ kombosakɛ tsho lo mpota yande koko nde akawosha, osukɔ wa l’emunyi, akokeketsha ndo akokimanyiya lo lɔkɔnyɔ laki lande.

Wetshelo akɔna wakondjaso oma l’ɔkɔndɔ ɔnɛ? Yeso akɛnyaka dia sho pombaka nkimanyiya wanɛ wele lo dihombo lo ndjela akoka aso. (Tokedi 14:31) Afundelo w’ekila tetshaka dia keema edja Nzambi ayokomiya wola ndo asui. Sho mbeyaka ndjambola ɔnɛ ngande ndo etena kakɔna kayosala Nzambi dui sɔ? Lo sawo diayela tayɛna ɛtshɔkɔ wambokoombɛ Otungi ayɛ wa ngandji.