Woho wa nkamba kaamɛ dia nsambisha l’ɛtshi ka nkɛtɛ katɛkɛtama ɛtɛkɛta efula

Mbala efula anto ndekaka monga suke dia mpokamɛ losango la Diolelo etena kaliokawɔ l’ɔtɛkɛta awɔ wa lootɔ. Ondo l’ɔtɛ akɔ mbele lo Pɛntɛkɔsta ka 33 T.D., Jehowa akalɔngɔsɔla dia “ase Juda wakokaka Nzambi wɔma w’oma lo wedja tshɛ wa l’ɛse olongo” mpokamɛ lokumu l’ɔlɔlɔ lo ‘ɔtɛkɛta awɔ wa lootɔ,’ kaanga mbele ondo vɔ wakatɛkɛtaka ɔtɛkɛta wakalekaka anto tshɛ ntɛkɛta, ɛnyɛlɔ Hɛbɛru kana Grɛkɛ. (Ets 2:5, 8) Lo ahole efula watɛkɛtama ɛtɛkɛta efula ɛlɔ kɛnɛ, tshumanelo diasala nsanganya lo ɛtɛkɛta wotshikitanyi mbeyaka monga l’ɛtshi ka nkɛtɛ kaamɛ l’asekawɔ akina. Ngande wakoka apandjudi wa lo tshumanelo dia ngasɔ nkamba kaamɛ dia nsambisha onto tshɛ ko l’etena kakɔ kaamɛ mbewɔ esambishelo ka lofunge kakoka momadia ampokami?

• 

  Nyɔkɛtshanya kaamɛ (Tok 15:22): Emendji w’olimu pombaka nkɛtshanya lam’asawɔ dia ntana yoho ya nsambisha lokumu l’ɔlɔlɔ lo yoho yoleki dimɛna le tshumanelo tshɛ diendana la dui sɔ. Naka ɛtshi ka nkɛtɛ kekɔ tshitshɛ kete ondo tshumanelo diasambisha l’ɛtɛkɛta ekina wayonyɔlɔmba dia nyu ntamba mvudu yele l’anto watɛkɛta ɛtɛkɛta wa lo tshumanelo diawɔ. Koko, naka vɔ bu l’akoka wa nkindjakindja ɛtshi kawɔ ka nkɛtɛ k’otondo mbala la mbala l’ɔtɛ wetɔ woke efula, vɔ mbeyaka mɛna ɔlɔlɔ diaha nyu ntamba ndooko luudu, koko mbatɛ etena kɛnya onto ɔmɔtshi la l’ɛtshi kawɔ ka nkɛtɛ nsaki. (od 93 od. 37) Kana vɔ mbeyaka nɔmba etshumanelo kanyu dia mbakimanyiya dia ntana anto watɛkɛta ɔtɛkɛta wa l’etshumanelo kawɔ ndo wele adrɛsɛ awɔ kokaka tomama lo ɛtshi kawɔ ka nkɛtɛ. (km 7/12 5, kiombo) Tolembete dia luudu ɔtɔi mbeyaka monga l’anto watɛkɛta ɛtɛkɛta efula. Tɛdikɔ ta nkindjakindja ɛtshi ka nkɛtɛ k’otondo pombaka mbɔtɔnganɛ l’ɛlɛmbɛ wendana la woho wa nkondja awui amɔtshi wendana l’anto.

• 

  Nyokambe kaamɛ (Ɛf 4:16): Nyoyele la yambalo tshɛ ɛlɔmbwɛlɔ tshɛ k’oma le omendji w’olimu wa l’etshumanelo kanyu. Onde wɛ ekɔ lo mbeka Bible l’onto ɔmɔtshi lahaleke ngɛnangɛna ɔtɛkɛta wa l’etshumanelo kanyu? Ondo ombeki ayohama esadi esadi naka wɛ mboyangɛ onto okina lele l’etshumanelo kana l’olui wele suke latɛkɛta ɔtɛkɛta ande dia nde mbeka la nde Bible.

• 

  Nyoyalɔngɔsɔlɛ (Tok 15:28; 16:1): Naka wɛ ambohomana l’onto ɔmɔtshi latɛkɛta ɔtɛkɛta okina l’ɛtshi kanyu ka nkɛtɛ, sala la wolo dia mbosambisha lokumu l’ɔlɔlɔ. Wɛ mbeyaka tayalɔngɔsɔdi lo mbeya la ntondo ɛtɛkɛta watɛkɛtama l’ɛtshi kanyu ka nkɛtɛ ndo lo telesharjɛ la ntondo dikadimwelo dia Bible ndo tovidɛo lo telefɔnɛ, tablɛtɛ, kana ɔrdinatɛrɛ ayɛ. Wɛ koka nto nkamba la JW Language dia mbeka woho wa mbisha onto mɔyɔ l’ɛtɛkɛta ɛmɔtshi.