AKAMBO W’OHOMBA W’OMA L’ƆTƐKƐTA WA NZAMBI | KƆLƆSAYI 1-4
Nyokolole lonto l’edjedja ndo nyɔlɔtɛ lonto l’oyoyo
Onde wɛ akasale etshikitanu efula lo lonto layɛ etena kakayeye akambo wa mɛtɛ? Wɛ koka monga l’eshikikelo dia Jehowa akangɛnangɛna welo wakayadje. (Ɛzk 33:11) Koko, wɛ pombaka ntetemala mbidja welo diaha awui wendana la lonto layɛ l’edjedja kahemɛ ndo wɛ pombaka ntetemala nkɛnɛmɔla lonto l’oyoyo. Kadimola ambola wayela anɛ dia mbeya awui wahombayɛ nsala etshikitanu:
Onde lekɔ lo ntetemala momalɛ onto ɔmɔtshi l’ɔtɛ wakandasalɛ dui dia kɔlɔ?
Onde dimi mongaka la solo dia lotutsha kaanga etena kakomɛ dui dimɔtshi dia wanyandja kana kemi l’ɔlɛmbɛlɔ?
Naka tokanyi ta mindo tambondjɛ, onde dimi tinyaka aha la ntshimbatshimba?
Onde lekɔ la tokanyi ta kɔlɔ otsha le anto wele la lokoho la demba lokina kana w’oma lo wedja ekina?
Onde atete edja kakamatondjɛ onto ɛtɛkɛta wa kɔlɔ kana kakimi komonga la ndjakimɛ?