Onde wɛ ayolanga ndodia dɛmandɛ di’otsha lo Kalasa k’esambisha wa Diolelo?

Onde wɛ aya l’ɛnɔnyi oma lo 23 polo 65 ndo wɛ ekɔ l’olimu wa lo tena tshɛ? Onde wɛ ekɔ la yoonge ya dimɛna ndo wɛ ekɔ nsuke dia ntshɔ dia tokamba lɛnɛ ele ohomba efula? Naka wɛ kadimola ɔnɛ eelo lo ambola asɔ, kete onde wɛ koka ndodia dɛmandɛ di’otsha lo Kalasa k’esambisha wa Diolelo? Ntatɛ lo kasala ka ntondo, nunu di’atshukanyi, di’anangɛso w’enyemba ndo di’akadiyɛso w’enyemba wakalodia dɛmandɛ sɔ. Koko, tekɔ l’ohomba efula w’anangɛso w’enyemba dia ndodia dɛmandɛ sɔ. Lɔmba Jehowa dia nde mpamia nsaki kayɛ ka mbɔngɛnyangɛnya ndo ka mbokoya Ɔnande. (Os 40:8; Mat 20:28; Hɛb 10:7) Ɔnkɔnɛ, sɛdingola toho takokayɛ nkitshakitsha elimu ayɛ kana awui wele la yɛ l’oyango wa wɛ nkotsha kɛnɛ kalɔmbama.

Lo toho takɔna ndo l’ahole akɔna wakoka wanɛ wakalongola olowanyelo wa teokrasi ɔsɔ tokamba? Amɔtshi wakalongola olowanyelo ɔsɔ wakatomama dia tokamba lo bɛtshi dia nkɛtɛ diatɛkɛtawɔ ɔtɛkɛta okina kana dia tosha lonya l’esambishelo ka laande ka lo sɛkɛ. Akina kambaka oko ɛhɛna w’emendji w’etshimbedi, oko emendji w’etshimbedi kana oko waa misiɔnɛrɛ. Etena kakanayɛ yimba l’awui wakokayɛ nsala l’olimu wa Jehowa, wɛ mbeyaka monga la nkanyi yele oko nyɛ yaki la omvutshi Isaya lakate ɔnɛ: “Dimi ɔnɛ, ontome!”​—Isa 6:8.

NYENDE VIDƐO YELE L’ƆTƐ A DUI ƆNƐ: WAA MISIƆNƐRƐ​—EKAMBI L’OLIMU WA DINELA NDO OMA LAASƆ, NYOKADIMOLE AMBOLA WAYELA ANƐ:

• 

  Ngande wasɔnama waa misiɔnɛrɛ?

• 

  Naa olimu wa dimɛna wasala waa misiɔnɛrɛ?

• 

  Naa ɛtshɔkɔ ɛmɔtshi wele l’olimu wa misiɔnɛrɛ?