LƆSƐNƆ L’OKRISTO
Jehowa shimbɛka wanɛ wele la lɔkɔnyɔ lo yimba
Onto tshɛ mongaka la lɔkɔnyɔ lo tena dimɔtshi. Monga la lɔkɔnyɔ halembetshiya di’onto bu la mbetawɔ le Jehowa. Kaanga Jehowa akɛnya dia nde la wɔ aki la lɔkɔnyɔ l’etena kɛmɔtshi. (Eta 6:5, 6) Ko kayotota naka mbala mɔtshi kana lo tena tshɛ sho mongaka la lɔkɔnyɔ?
Lɔmba Jehowa ekimanyelo. Jehowa mbidjaka yimba lo woho wayaokaso. Nde mbeyaka etena keso l’ɔngɛnɔngɛnɔ ndo keso la lɔkɔnyɔ. Nde shihodiaka lande na kayaokaso kana kakanyiyaso woho ɔmɔtshi. (Os 7:9b) Kɛnɛ koleki ele, Jehowa ndjakiyanyaka dikambo diaso ndo nde koka tokimanyiya dia ndɔshana la lɔkɔnyɔ kana ɔkɔmwɛlɔ.—Os 34:18.
Kokɛ yimba yayɛ. Etena kakɔmɔso, hatoyala tsho la lonyangu, koko dui sɔ koka monga la shɛngiya lo diɔtɔnganelo diasaso la Jehowa. Diakɔ dele, sho pombaka namaka otema aso, mbuta ate loto laso la l’etei.—Tok 4:23.
NYENDE VIDƐO YELE L’ƆTƐ A DUI ƆNƐ: WOHO WELE ANANGƐSO LA WƆLADI KAANGA LA NTONDO K’ƆKƆMWƐLƆ NDO OMA LAASO, NYOKADIMOLE LO AMBOLA WAYELA ANƐ:
Naa awui amɔtshi shikaa wakasale Nikki wakokimanyiya dia ndɔshana l’ɔkɔmwɛlɔ?
Lande na kakate Nikki dia nde aki l’ohomba w’esakelo?—Mat 9:12
Lo toho takɔna takayaɛkɛ Nikki le Jehowa dia nde mbokimanyiya?