Tshɛ kɛsɔ paka l’ɔtɛ w’ɔmɔnɔmɔnɔ!

WAMATO ahende w’esekaseka wakatakɛndakɛndaka lo dihole diandawɔ okanda l’osomba wa Baguio lo Philippines. Vɔ wakɛnyi Ɛmɛnyi wa Jehowa wasambisha la prezatwara koko vɔ kosukana lawɔ. Kadiyɛso Helen lakemala suke la prezatwara, akaamɔnɛmɔnɛ. Wamato asɔ wakatetemala la lɔkɛndɔ, koko woho wakaamɔnɛmɔnɛ Helen akawawambiya.

L’ɔkɔngɔ diko, etena kakatakalolaka wamato asɔ lo bisi otsha la ngelo, vɔ wakɛnyi logo la woke la jw.org lo Mbalasa ka Diolelo. Vɔ wakohɔ dia wakatɛnyi efundelo ɛsɔ etena kakasambishaki akadiyɛso la prezatwara. Vɔ akɔ ahende wakakite oma lo bisi ndo wakende dikongelo dia nsanganya ya tshumanelo diotshikitanyi diakawafunde lo soko dia Mbalasa ka Diolelo.

Wamato akɔ ahende wakɔtɔ lo losanganya lɔmɔtshi lakayelana. Onde nyu mbeyaka onto lakawɛnyi etena kakawayɔtɔka lo Mbalasa ka Diolelo? Helen! Mbala kakɔ ɔtɔi wakeye dia nde mbakamɔnɛmɔnɛka. Helen akate ate: “Etena kakawayayaka oya le mi lakayakiyanya yema, lakafɔnya dia lakasale dui dimɔtshi dia kɔlɔ.” Koko wamato asɔ wakalembetshiya Helen ɔnɛ vɔ wakawɛnyi emadi la prezatwara.

Esekaseka ɛsɔ wakangɛnangɛna losanganya lɔsɔ ndo wakayaoke dimɛna lo monga kaamɛ l’anangɛso l’akadiyɛso. Etena kakawɛnyi anto akina wɔɔmba Mbalasa l’ɔkɔngɔ wa losanganya, vɔ wakalɔmbɛ dia vɔ lawɔ mbisha lonya. Womoto ɔmɔtshi l’atei awɔ hayodjasɛ la Philippines, koko womoto okina ekɔ lo mbɔtɔ nsanganya ndo akatatɛ mbeka Bible. Tshɛ kɛsɔ paka l’ɔtɛ wɔmɔnɔmɔnɔ!