Lande na kambofulanɛ lohetsho?

Lande na kambofulanɛ lohetsho l’andja ɔnɛ? Dia mbeya ɔkɔkɔ wa dui sɔ, ekɔ ohomba sho nshihodia kɛnɛ kalembetshiya lohetsho, lande na katatɛ anto petshana ndo woho wadiangana lohetsho.

Lohetsho kɛdikɛdi na?

Lohetsho ekɔ ntona ɛngɔ kɛmɔtshi la wolo tshɛ kana monga la lutunu l’efula otsha le onto okina kana olui w’anto. Lɔ ndeka ndo monga la nkɛlɛ otsha le onto ɔmɔtshi lo tshanda mɔtshi.

LANDE NA KATATƐ ANTO PETSHANA?

Anto tatɛka petshana l’ɔtɛ w’ɛkɔkɔ efula. Lohetsho konyaka mbala efula dia mpetsha anto akina, aha tsho l’ɔtɛ wa kɛnɛ kasalawɔ, koko l’ɔtɛ wa woho w’anto wewɔ. Wanɛ wahetshama mbeyaka mbɔsama oma le anto akina oko anto wa kɔlɔ, wele la kanyi ya nsala kɔlɔ, kana oko anto wele hawokoke ntshikitana. Vɔ mbeyaka mbɔsama oko anto wahɔsama la nɛmɔ, oko anto wele waale kana oko wanɛ watondja ekakatanu. Wanɛ wahetshana ndjokomaka dia mpetsha anto akina l’ɔtɛ wakawaasalɛ awui wa ngala, wa wɛngiya kana wa dui dikina diakonɛ lohetsho l’etema awɔ.

WOHO WA DIANGANA LOHETSHO

Tena dimɔtshi anto petshaka anto akina wewɔ watɛnanaka kaanga mɛna. Ɛnyɛlɔ, onto ɔmɔtshi kokaka aha la mbeya sɛngiyama la tokanyi ta kɔlɔ tele l’anto walɛmiyande ndo waleka mbokana la nde. Ɔnkɔnɛ, lohetsho koka diangana esadi eto ndo sambiyama le olui w’anto w’otondo.

Etena kashihodiaso woho wadiangana lohetsho esadi esadi, sho shihodiaka lande na kahetsha anto efula anto akina. Koko dia mbidja lohetsho otshumba l’andja aso ɔnɛ, sho pombaka mbeka woho wakatatɛ lohetsho. Bible totɛka oma lɛnɛ oye lohetsho.

BIBLE MBISHOLAKA KIƆKƆ YA LOHETSHO

Diagramɛ diɛnya akɔnga ahende watshimbana, wele lo kiɔkɔ ya lohetsho. 1. Nsango ya kashi, mbidja ndo shɛngiya y’olui w’anto, rɛzo sɔsio, ndo nsango y’eyoyo. 2. Haweye mbekelo y’anto akina, lokoho la demba, kana ɔtɛmwɛlɔ. 3. Wɔma w’etshikitanu, wa nshisha kɛnɛ kele lawɔ, kana kɛnɛ kakoka mbakomɛ aha la vɔ mbeya. 4. Lohetsho, mbidja ndo kananɛ kɔlɔ, kɔngɔdi, ndo awui wa ngala.

LOHETSHO KONDJA OMA LE ANTO. Lɔ lakatatɛ etena kaki ondjelo ɔmɔtshi l’olongo, wakayelamɛka Satana Diabolo tɔmbɔkwɛ Nzambi. Diabolo “aki ondjakanyi oma ko lam’akandatatɛ” la ɔtɔmbɔkwɛlɔ ande. Oko wende “kanga kashi ndo she kashi,” nde ekɔ lo ntetemala ntshutshuya anto dia petshana ndo salanɛ awui wa ngala. (Joani 8:44; 1 Joani 3:11, 12) Bible mɛnyaka dia nde ekɔ kanga kɔlɔ, kanga nkɛlɛ ndo kanga ngala.—Jɔb 2:7; Ɛnyɛlɔ 12:9, 12, 17.

ANTO WELE KEEMA KOKELE WAMBOYOHOWƆ YIMBA YA LOHETSHO. Pami ka ntondo, Adama akayele Satana lo mboka kande ka kɔlɔ. Etombelo wambonga la dui sɔ ele, anto tshɛ wakahowɔ pɛkato ndo wakakome anto wele keema kokele. (Rɔmɔ 5:12) Ɔna la pami la ntondo laki Adama, Kɛna akalole la lohetsho ko akadiake Aabɛlɛ w’ɔnango. (1 Joani 3:12) Kɛnɛ kele mɛtɛ ele, anto efula wekɔ lo mɛnyana ngandji ndo kɛtshi. Koko lam’ele takahowɔ pɛkato, miliyɔ y’anto yaya la lokaki, ɔkɔmiya ndo l’otako, waonga watshutshuya lo lohetsho.—2 Timɔte 3:1-5.

ONTO LATONA ANTO AKINA WOTSHIKITANYI LA NDE KOMAKA MBALA EFULA DIA MPETSHA ANTO AKINA. Andja wasɛnaso woludi la lohetsho tshutshuyaka anto diaha mbokana kɛtshi ndo monga la waonga ndo la nkɛwɔ ya kɔlɔ. Mbekelo ka kananɛ kɔlɔ, ntɛngɔ, ata ndo ndanyanɛ diangɔ aya awui wambofulanɛ nɛ dia “andja w’otondo wekɔ lo nɔmbɔma oma le kanga kɔlɔ,” Satana Diabolo.—1 Joani 5:19.

Koko, Bible hakomɛ tsho lo mɛnya kiɔkɔ ya lohetsho. Tɔ mɛnyaka nto awui wahombaso nsala dia minya lohetsho.