WOHO WA MBIDJA LOHETSHO OTSHUMBA

2 | Tokaloyake kɔlɔ lo kɔlɔ

Bible mbutaka ɔnɛ:

“Tanyokaloyake kɔlɔ lo kɔlɔ. . . . Naka kokaka, lo edja tshɛ kaakadialemanɛ la nyu, nyodjasɛ l’anto tshɛ ki. Tanyɔsɔmbɔyake nyuamɛ, . . . nɛ dia akafundama ɔnɛ: ‘Nsɔmbɔya ekɔ dikambo diami. Dimi kayɔsɔmbɔya,’ mbata Jehowa.”—RƆMƆ 12:17-19.

Kɛnɛ kalembetshiya divɛsa nɛ:

Kaanga mbakatotɔ la mbekelo ka mboka nkɛlɛ etena katosalɛwɔ kɔlɔ, Nzambi halange dia sho nsɔmbɔya kɔlɔ lo kɔlɔ. Koko, nde tokeketshaka dia kongɛ le nde nɛ dia keema edja nde ayanga nɔngɔsɔla akambo wa kɔlɔ tshɛ.—Osambo 37:7, 10.

Kɛnɛ kakokayɛ nsala:

Etena kakaloyana anto wele keema kokele kɔlɔ lo kɔlɔ, dui sɔ konyaka lo lohetsho l’efula. Koko, naka onto ɔmɔtshi akakonyangiya kana akakosalɛ kɔlɔ, tokaloyake kɔlɔ lo kɔlɔ. Sala la wolo dia mbahemɛ nsaki yayɛ ndo kadimolande la wɔlamu tshɛ. Lo awui amɔtshi, ondo ayoleka dimɛna mbohɛ kɛnɛ kakawakosalɛ. (Tokedi 19:11) Lo ntena dimɔtshi, ayonga dimɛna mbita kɛnɛ kakatombe. Ɛnyɛlɔ, lo ntena dimɔtshi naka wambokosalɛ awui wa ngala, wɛ mbeyaka nsɔna dia mbewoya apulushi kana ewandji ekina awui akɔ.

Kaloya kɔlɔ lo kɔlɔ ekɔ waale efula le so shɔamɛ

Ko kakɔna kayoyosala naka wɛ hɛnyi ndooko yoho ya wɔladi ya nkandola okakatanu ɔsɔ? Kana kakɔna kayoyosala naka wɛ ambosala kɛnɛ tshɛ kakokayɛ nsala dia nkandola okakatanu akɔ lo wɔladi? Tokaloyake kɔlɔ lo kɔlɔ. Dui sɔ mbeyaka nkonya lo kɔlɔ ka ditshi. Koko naka wɛ ntona dia nkaloya kɔlɔ lo kɔlɔ kete wɛ ayokimanyiya dia minya lohetsho. Wɛ koka mbeka woho wa ndjaɛkɛ lo yoho yakandola Nzambi akambo. “Yaɛkɛ le nde, ko nde ayosala akambo lo wahɔ ayɛ.”—Osambo 37:3-5.

Dikambo dimɔtshi dia mɛtɛ diakete lo lɔsɛnɔ—ADRIÁN

Akadje nsaki ka nkaloya kɔlɔ lo kɔlɔ otshumba

Etena kakinde ɔlɔngɔlɔngɔ, Adrián akayoyasha lo awui wa ngala ndo akalole la lohetsho ndo nde akakombolaka salɛ onto tshɛ lakosalɛka kɔlɔ kɔlɔ. Nde kɔndɔlaka ɔnɛ: “Tena dimɔtshi, lakalɔka ata wa la ekoma ndo mbala efula lakahomɔka efula ndo lakatshikalaka l’asa eko la nyɔi lo shinga.”

Adrián akatatɛ mbeka Bible etena kakinde l’ɛnɔnyi 16. Nde kotshaka ate: “Lakatatɛ mpama lo wekelo ami wa Bible ndo lakɛnyi ohomba wa ntshikitanya lonto lami.” Nde aki l’ohomba wa ntshika lohetsho ndo awui wa ngala. Nde akakondja wahɔ djekoleko oma lo kɛnɛ kakandeke lo Rɔmɔ 12:17-19 lo kɛnɛ kendana la ntshika nkaloya kɔlɔ lo kɔlɔ. Nde mbutaka ate: “Lakayetawɔka dia Jehowa ayodja yimba lo awui wa wɛngiya lo yoho ndo lo etena kalangande. Yema yema lakayotshikaka lɔsɛnɔ lami la ngala.”

La dikɔlɔ dimɔtshi, Olui ɔmɔtshi w’ɛlɔngɔlɔngɔ wa dengalenga w’oma l’olui wakalɔshanaka la nde ntondo wakɔlɔsha. Owandji w’olui akɔ akate la dui dia wolo ate: “Oyakokɛka!” Adrián mbetawɔka ate: “Lakayaoke dia laki la wolo efula wa nsɔmbɔya.” Koko lo dihole dia nsɔmbɔya, nde akasale dɔmbɛlɔ dia lo tshena pe le Jehowa ndo nde akaatshike.

Adrián tetemalaka ɔnɛ: “La wedi a pindju, lakayohomanaka l’owandji awɔ ndamɛ. Lakoke nkɛlɛ k’efula ndo lakalange nsɔmbɔya, ndo mbala kɛsɔ nto lakalɔmbɛ Jehowa nto l’otema dia nde kimanyiyami dia dimi ndjakimɛ. Dui dia diambo ko, ɔlɔngɔlɔngɔ ɔsɔ akaye le mi aha la ntshimbatshimba ndo akambutɛ ate: ‘Odimanyiya lo kɛnɛ kakete l’otsho wa loyi. Kɛnɛ kele mɛtɛ ele dimi nangaka nkoma oko wɛ. Dimi nangaka mbeka Bible.’ Ande ɔngɛnɔngɛnɔ waki la mi lo woho wakamayakimɛ lee! Diɛsɛ la dui sɔ, nde la wɔ akatatɛ mbeka Bible.”