Hemɔ ka lo yimba kambokokanɛ l’andja w’otondo
“Dimi mongaka wonya tshɛ la yema y’okiyanu, kaanga etena kodjashimi dimɛ lo luudu.”
“Etena kalekami ndjaoka dimɛna efula, dimi mbokaka wɔma. Nɛ dia dimi mbeyaka oma lo kɛnɛ katokomɛka dia etena kayaokami dimɛna efula, kete keema edja layanga monga ‘l’okiyanu w’efula.’”
“Dimi tohembaka ndeka mbidja yimba lo kɛnɛ kasalema lushi tshɛ. Koko mbala mɔtshi ekiyanu w’awui akina efula ndjɛkami la shashimoya.”
Ɛtɛkɛta ɛsɔ ndja oma le anto wadiɛnɛ la hemɔ ya lo yimba. Onde wɛ kana onto ɔmɔtshi lokayɛ ngandji amboyaokaka woho akɔ waamɛ?
Onga l’eshikikelo dia wɛ bu wɛ mamɛ. Ɛlɔ kɛnɛ anto efula wekɔ l’okakatanu wendana la hemɔ ka lo yimba, oyadi le wɔ vɔamɛ kana le wakiwɔ wa ngandji.
Aha la taamu, tekɔ lo nsɛna lo “tena dia paa dia wolo mbikikɛ” diasha anto ekiyanu efula wa weho la weho. (2 Timɔte 3:1) Wekelo ɔmɔtshi wakasalema, mɛnyaka dia l’andja w’otondo, onto ɔtɔi l’anto enanɛi ekɔ lo ndɔshana la hemɔ ka lo yimba. L’ɔtɛ wa hemɔ ka COVID-19, lo 2020 pursa y’anto oko ndekana 26 yakadiɛnɛ l’ekiyanu oleki lo 2019 ndo pursa oko ndekana 28 y’anto wakasowe la hemɔ k’ɔkɔmwɛlɔ oleki lo 2019.
Ekɔ ohomba mbeya anto angana wadiɛnɛ ɛlɔ kɛnɛ l’ekiyanu ndo l’ɔkɔmwɛlɔ. Koko kɛnɛ koleki ohomba ele mbeya woho wakokayɛ wɛ la wakiyɛ wa ngandji ndjaoka dimɛna.
Hemɔ ka lo yimba kɛdikɛdi na?
Etena keyɛ la yoonge ya dimɛna ya lo yimba, keyɛ dimɛna ndo kayaokayɛ dimɛna. Wɛ koka ndɔshana l’ekiyanu watongaka l’onto tshɛ, nkamba olimu dimɛna ndo ngɛnangɛna la lɔsɛnɔ.
Hemɔ ka lo yimba . . .
KEEMA etombelo w’oma lo wɛɔdu ɛmɔtshi wele l’onto.
EKƆ dui diendana l’aseka enganga diakonya onto l’ekiyanu w’efula ndo fukutanyaka ekanelo kande ka yimba ndo lɔkɛwɔ lande.
Tɔ koka nkonya onto mbala efula l’okakatanu wa mbɔtɔnɛ l’anto akina ndo nkandola ekakatanu wa lo lɔsɛnɔ wa lushi la lushi.
Tɔ koka monga la shɛngiya le anto wa lo nɔnga tshɛ, mbekelo, lokoho la demba, dioho, ɔtɛmwɛlɔ, kalasa yakɔtɔ onto kana anto wele l’ekondjelo.
Woho wa nkondja ekimanyielo oma lo hemɔ ka lo yimba
Ntena dimɔtshi naka etshikitanu wambosalema mbala kakɔ ɔtɔi le onto ɔmɔtshi, mbuta ate ambotatɛ ndala djɔ efula kana hayoleka ndala djɔ, ambotatɛ ndɛ efula kana hayɔlɛ efula oko wakandalɛka ntondo kana ambotatɛ monga l’ekiyanu kana la lonyangu ndo ɔkɛyi. Naka tolembetelo tɔsɔ tambɛnama, kete ondo onto ɔsɔ ekɔ l’ohomba w’onto ɔmɔtshi lakalongola olowanyelo w’aseka enganga dia mbokimanyiya dia nde nshihodia kɛnɛ kele lo kiɔkɔ y’etshikitanu ɛsɔ ndo mbeya woho wa nkandola okakatanu akɔ. Ko lende akokayɛ nkondja ekimanyielo?
Yeso Kristo, onto loleki yimba tshɛ akate ate: “Anto wele alemba ki hawotoyangaka onganga, paka anto wele la hemɔ.” (Mateo 9:12) Wanɛ walɔshana l’ekakatanu wendana la hemɔ ka lo yimba walongola esakelo w’amɛna w’aseka enganga ndo ekanga ɛsɔ koka nkitshakitsha tolembetelo ta hemɔ yawɔ ndo dui sɔ kokaka mbakimanyiya dia vɔ nsɛna lɔsɛnɔ la dimɛna ndo l’ɔngɛnɔngɛnɔ. Ekɔ dui dia lomba le anto wele la hemɔ kɛsɔ diaha vɔ ntshimbatshimba dia nyanga esakelo naka wambɛna tolembetelo ta wolo kana tolembetelo takɔ tamboviya.a
Kaanga mbele Bible bu dibuku di’aseka enganga, awui wa lɔkɔ koka tokimanyiya dia monga la yoonge ya dimɛna ya lo yimba. Tambokɔlɔmba la ngandji tshɛ dia wɛ nsɛdingola asawo wayela wɛnya woho wakoka Bible tokimanyiya dia ndɔshana la hemɔ ka lo yimba.
a Tshoto y’Etangelo hasha ndooko yoho mɔtshi y’osakelo wa laande. Onto tshɛ pombaka nsɛdingola ɔsɔnwɛlɔ wahombande nsala la yambalo tshɛ la ntondo ka nde mbɔsa yɛdikɔ yande hita.