Tetemala mfudia ngandji kayɛ

1. Naa akambo wa mɛtɛ wakayeke lam’akayatatɛ mbeka Bible?

ONDE wɛ ekɔ lo mbohɔ akambo tshɛ wakayeke etena kakayatatɛ mbeka Bible? Ondo wɛ akaambe lo mbeya dia Nzambi ekɔ la lokombo. Ondo wɛ akakeketshama dia mbeya dia Nzambi hahɛnyahɛnya anto l’ifɛrnɔ. Ndo ondo wɛ akangɛnangɛna la elongamelo ka mɛna woho wayolɔ wakiyɛ wa ngandji ndo woho wayoyɔsɛna lawɔ lo paradiso ka la nkɛtɛ.

2. Laadiko dia mbeka akambo wa mɛtɛ, naa ehamelo ekina wakayasale? (Ɛfɛsɔ 5:1, 2)

² Etena tshɛ kakayatalekaka mbeka Ɔtɛkɛta wa Nzambi mbakatalekaka ngandji kokayɛ Jehowa mfula. Ngandji kɛsɔ kakakotshutshuya dia wɛ nkamba la kɛnɛ kakayeke. Wɛ akɔshi tɛdikɔ t’amɛna efula tohikami l’atɔndɔ wa lo Bible. Wɛ akalowanya dionga ndo lɔkɛwɔ layɛ nɛ dia wɛ akakombolaka ngɛnyangɛnya Nzambi. Oko watokoyaka ɔna ombutshi ande wa ngandji, wɛ akokoya Shɔ kayɛ lele l’olongo.​—Adia Ɛfɛsɔ 5:1, 2.

3. Ambola akɔna wakokaso ndjaoka?

³ Sho koka ndjambola ɔnɛ: ‘Onde ngandji kokami Jehowa ɛlɔ kɛnɛ kamboleka kɛnɛ kakamawokaka lam’akamakome Okristo? Ntatɛ oma lo batisimu kami, onde yoho yami ya nkanyiya ndo ya nsala akambo yamboleka mfɔna la ya Jehowa, djekoleko lo kɛnɛ kendana la mboka anangɛso ndo akadiyɛso ngandji?’ Naka “ngandji kaki layɛ ntondo” kambɔla yema, kete tɔkɔmɔke. Dui dia ngasɔ diakakomɛ Akristo wa lo ntambe ka ntondo. Yeso kombasɛka ndo nde hatɔsɛkaki pondjo. (Ɛny. 2:4, 7) Nde mbeyaka dia sho koka nyomonga la ngandji kakiso la tɔ etena kakatatatɛ mbeka akambo wa mɛtɛ mbala ka ntondo.

4. Kakɔna kayotɔsɛdingola lo sawo nɛ?

⁴ Lo sawo nɛ, tayɔsɛdingola woho wakokaso ntetemala mfudia ngandji kaso otsha le Jehowa ndo otsha le anto akina. Oma laasɔ, tayɛna ɛtshɔkɔ ɛmɔtshi wakokaso nkondja sho l’anto akina naka sho mboka Jehowa ndo anangɛso l’akadiyɛso ngandji k’efula.

MFUDIA NGANDJI KOKAYƐ JEHOWA

5-6. Ekakatanu akɔna wakahomana la Pɔɔlɔ l’olimu ande? Ko kakɔna kakotshutshuya dia nde ntetemala kambɛ Jehowa?

⁵ Ɔpɔstɔlɔ Pɔɔlɔ aki l’ɔngɛnɔngɛnɔ l’olimu wa Jehowa, koko nde akahomana l’ekakatanu efula wakandahombe nkandola. Mbala efula, Pɔɔlɔ akande nkɛndɔ y’etale ndo munda nkɛndɔ komonga wɔdu lo nshi yande shɔ. Lo nkɛndɔ yande, ntena dimɔtshi Pɔɔlɔ “aki lo waale lo nkushi” ndo “lo waale w’oma le apɔtwanyi.” Lo ntena dimɔtshi nto, atunyi ande wakɔkɔmɔla. (2 Kɔr. 11:23-27) Ndo aha mbala tshɛ mbaki anango w’Akristo la lowando le nde l’ɔtɛ w’akambo w’ɛlɔlɔ wakandasalaka dia mbaakimanyiya.​—2 Kɔr. 10:10; Flpɛ. 4:15.

⁶ Kakɔna kakakimanyiya Pɔɔlɔ dia ntetemala kambɛ Jehowa? Pɔɔlɔ akeke awui efula lo kɛnɛ kendana la lonto la Jehowa oma l’Afundelo ndo oma l’awui wakokomɛ. Pɔɔlɔ akayonga l’eshikikelo dia Jehowa Nzambi mbookaka ngandji. (Rɔmɔ 8:38, 39; Ɛf. 2:4, 5) Ndo nde akayokoma lo mboka Jehowa ngandji k’efula. Pɔɔlɔ akɛnya ngandji kakandokaka Jehowa lo ‘kambɛ ekilami ndo lo ntetemala mbakambɛ.’​—Hɛb. 6:10.

7. Naa yoho mɔtshi yakokaso nkeketsha ngandji kokaso Jehowa?

⁷ Sho koka mfudia ngandji kokaso Nzambi lo mbekaka Ɔtɛkɛta ande l’etete tshɛ. Etena kadiayɛ Bible, yanga dia nshihodia kɛnɛ kakotɛ divɛsa tshɛ lo kɛnɛ kendana la Jehowa. Yambola wate: ‘Ngande wɛnya ɔkɔndɔ ɔnɛ dia Jehowa mbokakami ngandji? Ɛkɔkɔ akɔna wambisha ɔkɔndɔ ɔnɛ dia dimi mboka Jehowa ngandji?’

8. Ngande wakoka dɔmbɛlɔ tokimanyiya dia mfudia ngandji kokaso Nzambi?

⁸ Yoho kina yakokaso mfudia ngandji kokaso Jehowa ele lo mbodiholɛka otema lo dɔmbɛlɔ mbala la mbala. (Os. 25:4, 5) Jehowa lo wedi ande ayokadimola alɔmbɛlɔ aso. (1 Jni. 3:21, 22) Khanh, kadiyɛso kɛmɔtshi ka l’Asie mbutaka ate: “Ngandji kokami Jehowa kakahikama ntondo lo ewo, koko ngandji kɛsɔ kakatalekaka mfula etena kakamɛnyi woho wakandakadimolaka alɔmbɛlɔ ami. Dui sɔ diakatshutshuya dia nsala akambo w’ɔngɛnyangɛnya.”b

MFUDIA NGANDJI KOKAYƐ ANTO AKINA

9. Ngande wakɛnya Timɔte dia nde ekɔ lo tahame lo kɛnɛ kendana la mboka anango l’akadiyɛnde ngandji?

⁹ Ɛnɔnyi ɛmɔtshi l’ɔkɔngɔ wa nde nkoma Okristo, Pɔɔlɔ akahomana l’ɔlɔngɔlɔngɔ ɔmɔtshi wa dimɛna wakawelɛka Timɔte. Timɔte akokaka Jehowa ndo anto ngandji. Pɔɔlɔ akatɛ ase Filipɛ ate: “Dimi ndooko la onto okina lele la dionga diele oko [Timɔte] layoyakiyanya l’otema ɔtɔi lo dikambo dianyu.” (Flpɛ. 2:20) Lanɛ, Pɔɔlɔ kɔtɛkɛtaka dikambo di’akoka waki la Timɔte wendana la nkongɛ akambo kana wa mbisha asawo wa lo sɛkɛ. Koko Pɔɔlɔ akambiyama mɛtɛ oma lo ngandji k’efula kakokaka Timɔte anango l’akadiyɛnde. Aha la taamu, tshumanelo diakembɔmaka oma le Timɔte diakakongɛka wembwelo ande l’asolo walomɔlomɔ.​—1 Kɔr. 4:17.

10. Ngande wakɛnya Anna nde l’omɛnde ngandji kawɔ otsha le anangɛwɔ l’akadiyɛwɔ?

¹⁰ Sho lawɔ nyangaka toho ta nkimanyiya anangɛso l’akadiyɛso w’Akristo. (Hɛb. 13:16) Tɔsɛdingole ɛnyɛlɔ kaki Anna lakatatɛkɛta dikambo diande lo sawo diakete. L’ɔkɔngɔ wa lɔpɛpɛ la wolo lɔmɔtshi, nde l’omɛnde wakembola nkumbo kɛmɔtshi k’Ɛmɛnyi ko wakɛnyi dia nsambe ka luudu laki nkumbo kɛsɔ kakalana. L’ɔtɛ wa mpokoso kɛsɔ, ase nkumbo kɛsɔ komonga ndooko la dihɔndɔ dia pudipudi dia ndɔta. Anna mbutaka ate: “Sho takɔshi ahɔndɔ awɔ ndo takaasole, takaakɔmɛ, takawaɔmbɛwɔ ko sho mbakaloyɛwɔ. Le so, ɔsɔ komonga ekimanyielo ka woke, koko kɛnɛ kakatasale kɛsɔ kakatokimanyiya dia nkoma angɛnyi w’eshika polo ndo ɛlɔ kɛnɛ.” Ngandji kaki Anna nde l’omɛnde otsha le anangɛso l’akadiyɛso mbakaatshutshuya dia mbisha nkumbo kɛsɔ ekimanyielo k’oshika.​—1 Jni. 3:17, 18.

11. a) Mbala efula ngande watoyaokaka anto akina etena kɛnawɔ dia sho mbaokaka ngandji? b) Lo ndjela Tokedi 19:17, kakɔna kasala Jehowa etena kokaso anto akina ngandji?

¹¹ Etena kasalɛso anto akina akambo la ngandji ndo l’ɔlɔlɔ tshɛ, mbala efula vɔ mɛnaka welo wadjaso dia mbokoya toho ta Jehowa ta nkanyiya ndo ta nsala akambo. Ndo vɔ mbeyaka ngɛnangɛna etsha aso w’ɛlɔlɔ lo yoho yahateyaki pondjo dui sɔ. Khanh, lakatatɛkɛtshi dikambo diande l’etatelo, mbohɔka dimɛna wanɛ wakookimanyiya. Nde mbutaka ate: “Lekɔ la lowando l’efula le akadiyɛso tshɛ wa ngandji wanɛ wakambɔshi dia ntomba la mi l’esambishelo. Vɔ wakaye lakami dia ndjɔmbɔsa, wakambelɛ dia dimi tɔlɛ lawɔ yangɔ ndo wakakaloyaka lakami la ki. Lakɛnyi dia dui sɔ komonga y’ana ya dikambo le wɔ. Ndo ngandji mbakaatshutshuya dia nsala dui sɔ. Lo mɛtɛ, aha onto tshɛ mbayotoka losaka lo kɛnɛ kosalɛso. Khanh mbutaka lo dikambo dia wanɛ wakookimanyiya ate: “Dimi kombolaka mbafuta l’ɔtɛ w’awui tshɛ w’ɛlɔlɔ wakawasalɛ, koko handeye l’ahole akɔna wodjashiwɔ. Koko Jehowa salaka dui sɔ ndo dimi nɔmbaka dia Jehowa mbafuta l’ɔtɛ ami.” Khanh ekɔ la shadiya. Jehowa mɛnaka kaanga vwuiwui y’ɔlɔlɔ yasalɛso anto akina. Nde mbɔsaka tshelo shɔ oko olambo ndo oko dibasa diahombande mfuta.​—Adia Tokedi 19:17.

12. Ngande wakoka anangɛso mɛnya ngandji kokawɔ etshumanelo? (Enda ndo esato.)

¹² Naka wɛ ekɔ ɔnangɛso, ngande wakokayɛ mɛnya anto akina ngandji kawawokayɛ ndo nyanga toho takokayɛ mbaakimanyiya? Ɔnangɛso ɔmɔtshi l’ɔlɔngɔlɔngɔ lelɛwɔ Jordan akambola ɔnangɛso ɔmɔtshi l’opalanga kɛnɛ kakokande nsala dia nkimanyiya etshumanelo lo yɛdikɔ y’efula. Ekumanyi akawandola l’ɔtɛ w’ehamelo wamondoshila nsala ndo akawosha yema y’alako lo woho wakokande ndeka ndjasha l’olimu. Ɛnyɛlɔ, nde akasha Jordan kanyi ya komaka kɔlɔmɔ lo Mbalasa ka Diolelo ndo mbishaka anto akina mɔyɔ, mbishaka kɔmatɛrɛ lo nsanganya, sambishaka mbala la mbala l’ase olui ande w’esambishelo ndo nkanyiya awui shikaa wakokande nsala dia nkimanyiya anto akina. Etena kakakambe Jordan la dako nɛ, nde akeke woho wa nsala awui amɔtshi ndo woho wa mbeka dia mboka anango l’akadiyɛnde ngandji efula. Jordan akeke dia etena kakoma ɔnangɛso okambi wakimanyiya, nde hatatɛ nkimanyiya anto akina, koko nde tetemalaka mbaakimanyiya.​—1 Tim. 3:8-10, 13.

13. Ngande wakatshutshuya ngandji ɔnangɛso lelɛwɔ Christian dia nkotsha kɛnɛ kalɔmbama dia nyomokoma nto ekumanyi?

¹³ Ko kayotota naka wɛ akakambaka ntondo oko okambi wakimanyiya kana oko ekumanyi? Jehowa mbohɔka olimu wakayakambe lo nshi yakete ndo ngandji kakakotshutshuya dia nkamba olimu ɔsɔ. (1 Kɔr. 15:58) Nde mɛnaka nto ngandji katetemalayɛ nkɛnɛmɔla. Ɔnangɛso ɔmɔtshi lelɛwɔ Christian akakɔmɔ etena kakandashisha ɔkɛndɛ ande w’ekumanyi. Koko nde mbutaka ate: “Lakɔshi yɛdikɔ ya nsala tshɛ kakamakoke nsala dia kambɛ Jehowa l’ɔtɛ wa ngandji kawokami, oyadi dimi monga ekumanyi kana bu.” L’edjedja ka wonya, nde akayɔsɔnamaka nto oko ekumanyi. Christian suyaka ate: “Laki la yema ya wɔma dia nkamba nto oko ekumanyi. Koko lakate nte, naka l’ɔtɛ wa kɛtshi kande, Jehowa nangaka dia dimi nkamba nto oko ekumanyi, kete layosala dui sɔ l’ɔtɛ wa ngandji kawokami ndo l’ɔtɛ wa ngandji kokami anangɛmi la akadiyɛmi.”

14. Wetshelo akɔna wakondjayɛ oma l’ɛtɛkɛta waki kadiyɛso kadjasɛ la Georgie?

¹⁴ Ekambi wa Jehowa mɛnyaka nto ngandji kawɔ otsha le wanyawɔ anto. (Mat. 22:37-39) Ɛnyɛlɔ, Elena, kadiyɛso kɛmɔtshi ka lo wodja wa Georgie mbutaka ate: “L’etatelo, dui ɔtɔi diakatshutshuyaka dia nsambisha aki ngandji kokami Jehowa. Koko lam’akatafulaka ngandji kokami Shɔmi lele l’olongo, ngandji kokami anto akina kakatafulaka ndo tɔ lawɔ. Lakasale la wolo dia nkanyiya ekakatanu wakahomanaka l’anto ndo lo weho w’asawo wakoka minanda etema awɔ. Lo yɛdikɔ yakamalekaka nkanyiya dikambo diawɔ, mbakamalekaka nkombola mbaakimanyia.”​—Rɔmɔ 10:13-15.

JEHOWA AYOTƆTSHƆKƆLA NAKA SHO MBOKA ANTO AKINA NGANDJI

15-16. Oko wadiɛnya esato, ɛtshɔkɔ akɔna waya lo mɛnya anto akina ngandji kawaokaso?

¹⁵ Etena kɛnyaso anangɛso ngandji kawaokaso, aha vɔ ato mbakondja wahɔ oma lo dikambo sɔ. Lam’akatatɛ hemɔ ka COVID-19, ɔnangɛso ɔmɔtshi lelɛwɔ Paolo la wadɛnde wakakimanyiya akadiyɛso efula w’esombe dia mbeya woho wa nkamba la telefɔnɛ, tablɛtɛ kana ɔrdinatɛrɛ dia nsambisha. Kadiyɛso kɛmɔtshi kaki ntondo l’okakatanu dia nkamba la dihomɔ ɔsɔ, akayokanga l’akoka wa nsala dui sɔ. Nde akonge l’akoka wa nkamba la dihomɔ diakɔ dia mbelɛ ewotɔ ande oya lo Eohwelo. Anto akumi asamalo l’atei w’ewotɔ ande wakayele Eohwelo lo vidɛo kɔferansɛ. Kadiyɛso nde l’ewotɔ ande tshɛ wakakondja wahɔ oma lo welo wakadje Paolo nde la wadɛnde. L’ɔkɔngɔ diko, kadiyɛso akafundɛ Paolo ate: “Losaka lo woho wakayatetsha sho esombe w’anto. Hambohɛki pondjo woho wayakiyanya Jehowa lo dikambo diaso ndo welo w’efula wakanyadje dia tokimanyiya.”

¹⁶ Bɛnyɛlɔ diele oko ɛnyɛlɔ kɛnɛ diakasha Paolo wetshelo w’ohomba efula. Dui sɔ diakawohola dia ngandji ndeka ewo kana dikoka dimɔtshi dia lootɔ ohomba. Nde mbutaka ate: “Lakakambe mbala efula oko omendji w’otshimbedi. Lambɛna ɛlɔ kɛnɛ dia kaanga mbakoka anangɛso l’akadiyɛso mbohɛ asawo wakamashaka, vɔ hawotohɛ pondjo ekimanyielo k’oshika kakamawasha.”

17. Onto akɔna nto ayokondja wahɔ etena kakɛnɛmɔlaso ngandji?

¹⁷ Etena kɛnyaso anto akina ngandji kawaokaso, sho ndjakondjiyɛka wahɔ lo toho tahatalongamɛ. Jonathan, ladjasɛ la Nouvelle-Zélande shikikɛka dikambo sɔ. Lushi la samalo lɔmɔtshi laki yanyi efula l’ɔkɔngɔ a midi, nde akɛnyi ɔnangɛso ɔmɔtshi lele ombatshi mboka atasambisha ndaamɛ lo shinga. Jonathan akɔshi yɛdikɔ ya nsambisha kaamɛ la nde l’akɔlɔ wa nshi ya samalo tshɛ. Nde kombeya dia nde ayokondja wahɔ efula oma lo tshelo yande ya ngandji shɔ. Jonathan mbutaka ate: “Lo etena kɛmɔtshi ka lo lɔsɛnɔ lami, dimi kɔngɛnangɛnaka olimu w’esambishelo. Koko lam’akamendaka yoho yaketshaka ombatshi mboka ɔsɔ ndo lam’akamɛnaka etombelo w’amɛna wakandakondjaka l’esambishelo, lakayotatɛ ngɛnangɛna olimu w’esambishelo. Lakakondja nto ɔngɛnyi w’oshika wakakimanyiya dia dimi mpama lo nyuma, ngɛnangɛna l’olimu w’esambishelo ndo ndjasukanya suke suke la Jehowa.”

18. Kakɔna kalanga Jehowa dia sho nsala?

¹⁸ Jehowa nangaka dia sho tshɛ mfudia ngandji kawokaso ndo kokaso anto akina. Oko wambotodieka, sho koka nkeketsha ngandji kokaso Jehowa lo mbadiaka Ɔtɛkɛta ande ndo lo kanaka yimba lɔkɔ ndo lo sawolaka la nde mbala la mbala lo dɔmbɛlɔ. Sho koka mfudia ngandji kokaso anangɛso l’akadiyɛso lo mbaakimanyiyaka lo toho ta shikaa. Etena kayotafulaka ngandji kaso, mbayototalekaka ndjasukanya suke suke la Jehowa ndo la nkumbo kaso ka lo nyuma. Ndo tayɔngɛnangɛnaka la lɔngɛnyi lɔsɔ pondjo pondjo!