Keketshama oma lo ngandji
“Olange Jehowa Nzambi kayɛ l’otema ayɛ tshɛ la anima ayɛ tshɛ ndo la yimba yayɛ tshɛ.”—MATEO 22:37, NW.
1. (a) Naa waonga amɔtshi wakɛnɛmɔla Okristo na? (b) Naa dionga di’Okristo dioleki ohomba, ndo lande na?
OKRISTO kɛnɛmɔlaka waonga efula dia nde monga okambi w’oshika. Dibuku dia Tukedi mbikaka epole ɔsɛkɛ l’ohomba w’ewo, wa eokelo, ndo wa lomba. (Tukedi 2:1-10) Ɔpɔstɔlɔ Paulo akɛnya ohomba wa monga la mbetawɔ ka nge ndo l’elongamelo ka wolo. (Romo 1:16, 17; Kolosai 1:5; Heberu 10:39) Etetemalelo la ndjâkimɛ ekɔ nto ohomba efula. (Etsha 24:25; Heberu 10:36) Koko, ekɔ dionga dimɔtshi diele naka diɔ bu kete waonga akina tshɛ wele layɛ mbeyaka shishɔ kana mbetɛma anyanya. Dionga diakɔ ko: ngandji.—1 Koreto 13:1-3, 13.
2. Ngande wakɛnya Yeso ohomba wa ngandji, ndo dikambo sɔ monyiyaka wembola akɔna?
2 Yeso akɛnya ohomba wa ngandji lam’akandate ate: “Uma lu dikambu ne, antu tshe wayeya vati: Ambeki ami mbenyu, naka nyayukana ngandji.” (Joani 13:35) Lam’ele ngandji ekɔ dionga dieyama Okristo wa mɛtɛ, sho pombaka ndjaoka wembola ɛnɛ: Ngandji kɛdikɛdi na? Lande na ketɔ ohomba efula ndeka ndo waonga akina, polo ndo lo Yeso koma lo mbuta ɔnɛ oma lɔkɔ mbahomba mbeyama ambeki ande na? Ngande wakokaso monga la ngandji na? Waa na wahombaso mboka ngandji? Nyɛsɔ tɔsɛdingole wembola ɛsɔ.
Ngandji kɛdikɛdi na?
3. Ngande wakokaso nembetshiya ngandji, ndo lande na kele tɔ mendanaka la yimba ndo l’otema?
3 Lo yoho mɔtshi, ngandji nembetshiyamaka oko ‘nsaki ka ndjamamatanya, monga la lolango l’efula, monga la lɔngɛnyi kana ngɛnangɛna onto okina efula.’ Tɔ kekɔ dionga diatshutshuya anto dia salɛ anto akina ɔlɔlɔ, mbala mɔtshi lo ndjahombia akambo efula. Ngandji, oko wɔkɔndwamitɔ lo Bible, mendanaka la yimba ndo la otema. Yimba, kana diewo ekɔ ohomba efula nɛ dia onto lele la ngandji mbeyaka ohomba wa kiɛnya, lo mbeya ɔnɛ ndo nde ndo anto akina wokande ngandji wekɔ vɔ tshɛ la wɛɔdu ndo la waonga amɔtshi wakotola anto akina oya le wɔ. Diewo diekɔ nto ohomba nɛ dia ekɔ anto amɔtshi wele Okristo mbaokaka ngandji, ondo mbala mɔtshi aha oma k’ɛse kande k’otema, koko nɛ dia nde mbeyaka oma lo wadielo ande wa Bible ɔnɛ Nzambi nangaka nde sala dikambo sɔ. (Mateu 5:44; 1 Koreto 16:14) Koko, mbala efula ngandji ndjaka oma l’otema. Ngandji k’oshika oko wadiɛnya Bible hongaka tsho kɛnɛ ka mbeya onto. Tɔ nembetshiyaka nto monga la ngandji k’oma k’ɛse otema ndo k’efula.—1 Petero 1:22.
4. Lo woho akɔna wele ngandji ekɔ dimama dia wolo?
4 Anto wele l’etema wa lokaki hawotolekaka mɛtɛ monga la lɔngɛnyi loludi la ngandji nɛ dia onto lele la ngandji ekɔ suke dia mbetsha wahɔ w’anto akina la ntondo ka wahɔ ande hita. (Filipi 2:2-4) Ɛtɛkɛta waki Yeso w’ɔnɛ ‘mbisha ndeka nongola ɔngɛnɔngɛnɔ’ wekɔ mɛtɛ lo yoho ya lânde naka tshelo shɔ yayosokoyama la ngandji. (Etsha 20:35) Ngandji ekɔ dimama dia wolo. (Kolosai 3:14) Tɔ nembetshiyaka nto lɔngɛnyi, koko amama wa ngandji ndeka wa lɔngɛnyi wolo. Diɔtɔnganelo diele lam’asa omi nde la wadɛnde mbelamɛka mbala mɔtshi ɔnɛ ngandji; koko ngandji katotshutshuya Bible dia monga latɔ ndeka tshikala edja oleki kɛnɛ kakotwama onto oma lo dimɛna dia demba. Etena kokana mɛtɛ wadi l’omi ngandji, vɔ tshikalaka kâmɛ oyadi kânga diɔtɔnganelo dia l’emunyi diaya bu l’ɔtɛ w’ekakatanu wa lotshundu, kana nɛ dia ɔmɔ l’atei awɔ aya bu nto la wolo wa demba.
Ngandji ekɔ dionga dimɔtshi di’ohomba efula
5. Bonde kele ngandji ekɔ dionga di’ohomba efula le Okristo?
5 Lande na kele ngandji ekɔ dionga di’ohomba efula le Okristo na? Ntondotondo, ele nɛ dia Yeso akadjangɛ ambeki ande dia vɔ mbokana ngandji lam’asawɔ. Nde akate ate: “Naka nyu nyambutsha uku anyutelami, keti angenyi ami mbenyu. Dimi lambunyutela akambu aso dia nyu mbukana ngandji.” (Joani 15:14, 17) Dui dia hende, ele nɛ dia Jehowa ekɔ ngandji, ndo oko weso atɛmɔdi ande sho pombaka mbôkoya. (Efeso 5:1; 1 Joani 4:16) Bible mbutaka dia lɔsɛnɔ la pondjo kɛdikɛdi mbeka dia mbeya Jehowa la Yeso. Ngande wakokaso mbuta ɔnɛ sho mbeyaka Nzambi naka hatotshe dia monga oko nde na? Ɔpɔstɔlɔ Paulo akate ate: “Untu lahalangi akina, heyi [Nzambi] ne dia [Nzambi] eli ngandji.”—1 Joani 4:8.
6. Ngande wakoka ngandji tokimanyiya dia sho monga la wɛdimo l’akambo wotshikitanyi wa lo nsɛnɔ yaso?
6 Ɔkɔkɔ wa sato wele ngandji ohomba vɔ ɔnɛ: Tɔ tokimanyiyaka dia monga la wɛdimo l’akambo wotshikitanyi wa lo nsɛnɔ yaso ndo monga la tokanyi t’ɔlɔlɔ lo kɛnɛ kasalaso. Oko ɛnyɛlɔ, ekɔ ohomba tetemala la mbeka Ɔtɛkɛta waki Nzambi. Le Okristo, ewo kɛsɔ kekɔ oko mma. Tɔ mbokimanyiyaka dia tshunda ndo dia sala kɛnɛ kɔtɔnganɛ la lolango laki Nzambi. (Osambu 119:105; Mateu 4:4; 2 Timote 3:15, 16) Koko, Paulo akatewola ɔnɛ: “Ewu atutakuyaka untu, keli ngandji katuwudiaka.” (1 Koreto 8:1) Kema kɔlɔ kondja ewo k’oshika. Okakatanu wele laso ele sho tekɔ la tokanyi ta kɔlɔ. (Etatelu 8:21) Naka ngandji kaya bu la shɛngiya le onto, kete ewo kele lande kokaka mbôsha ofunu, polo lo nde fɔnya ɔnɛ nde ndeka anto akina. Onto kokaka mbewɔ dikambo sɔ naka nde ayɔsɛngiyamaka wonya tshɛ la ngandji. “Ngandji . . . hayaseme, hayambiya.” (1 Koreto 13:4) Okristo wasɛngiyama la ngandji hayadiya, oyadi kânga nde ekɔ l’ewo k’efula. Ngandji mbokimanyiyaka dia monga la ndjâkitshakitsha ndo mboshimbaka dia nde ndjayangɛ lokumu.—Osambu 138:6; Jakoba 4:6.
7, 8. Ngande watokimanyiya ngandji dia sho mbika washo l’akambo woleki ohomba?
7 Paulo akafundɛ ase Filipi ate: “Dimi lambunyolombela dia ngandji ka mamba kanyu katamanya mbula lu bewu la yimba tshe ne dia nyu mbedika akambu w’ololo.” (Filipi 1:9, 10) Ngandji k’Okristo kayotokimanyiya dia ndjela ekeketshelo kɛsɔ, mbut’ate mbeya shikikɛ akambo woleki ohomba. Tɔshi ɛnyɛlɔ k’ɛtɛkɛta waki Paulo otsha le Timɔtɛ w’ɔnɛ: “Naka untu ambuyanga ulimu w’umendji wa lu ekelizia, ndi ambulanga ulimu w’ololo.” (1 Timote 3:1) L’ɔnɔnyi w’olimu wa 2000, lofulo la tshumanelo la l’andja w’otondo lakadɛ oma lo 1502, polo lo lofulo l’oyoyo la 91487. Diɔ diakɔ dieso l’ohomba efula wa dikumanyi, ndo wanɛ wayasha dia kotsha kɛnɛ kalɔmbama dia kondja diɛsɛ sɔ pombaka mandɔma.
8 Koko, wanɛ wayanga dia koma emendji wayonga la wɛdimo naka wayeyaka wonya tshɛ oyango wa diɛsɛ sɔ. Kɛnɛ koleki ohomba lanɛ kema dia kondja lowandji kana lokumu. Dikumanyi diangɛnyangɛnya Jehowa sɛngiyamaka la ngandji kawokawɔ ndo kokawɔ anangɛwɔ. Vɔ hawoyange lokumu kana lowandji. L’ɔkɔngɔ wa ɔpɔstɔlɔ Petero ndaka dikumanyi dia l’etshumanelo dia monga la dionga di’ɔlɔlɔ, nde akatɛtɛ ohomba wa vɔ monga la ‘yimba ya ndjâkitshakitsha.’ Nde akalake ase etshumanelo tshɛ ate: “Nyuyakitshakitsha la tshina dia lunya la wulu la [Nzambi].” (1 Petero 5:1-6) Onto tshɛ lakombola diɛsɛ sɔ pombaka sɛdingola ɛnyɛlɔ ka dikumanyi efula dia l’andja w’otondo diakamba la wolo, diele la ndjâkitshakitsha, ndo diele tshondo y’ɔtshɔkɔ le tshumanelo diakiwɔ.—Heberu 13:7.
Nsaki k’ɔlɔlɔ tokimanyiyaka dia sho tetemala
9. Bonde kahohɛ Akristo ɛtshɔkɔ wakâlake Jehowa?
9 Ohomba wa sɛngiyama la ngandji mɛnamaka nto lo yoho kina. Bible ndakaka wanɛ wamamema Nzambi oma lo ngandji kawokawɔ ɛtshɔkɔ efula tatɛ oma ko kakianɛ ndo ɛtshɔkɔ waheyama nembetshiya lo nshi yayaye. (1 Timote 4:8) Okristo wele la mbetawɔ ka wolo l’alaka asɔ ndo letawɔ dia Jehowa “keli ufutshi a wane tshe watûyangaka” kimanyiyamaka dia tshikala nge lo mbetawɔ. (Heberu 11:6) Efula l’atei aso kombolaka efula dia mɛna ekotshamelo k’alaka waki Nzambi ndo wekɔ la woho wa nsaki kaki l’ɔpɔstɔlɔ Joani lakate ate: “Ayali osoku! Nkumadiondjo Jesu, uyi!” (Enyelo 22:20) Eelo, naka sho kana yimba lo ɛtshɔkɔ wele la ntondo kaso ndo naka tekɔ la kɔlamelo, kete tayokeketshama dia tetemala, oko wakakimanyiyama Yeso dia tetemala lo mbohɔ ‘ɔngɛnɔngɛnɔ wakakitshama la ntondo kande.’—Heberu 12:1, 2.
10, 11. Ngande watokimanyiya ngandji dia sho mbeya mbikikɛ?
10 Ko kayotota naka nsaki ka nsɛna l’andja w’oyoyo mbaleka totshutshuya dia kambɛ Jehowa na? Naka ɔsɔku, kete sho koka ndjoshisha esadi eto solo dia lotutsha kana ɔngɛnɔngɛnɔ lam’ayotohomana l’ekakatanu kana naka akambo hawosadimi lo woho kana l’etena kalongamɛso. Sho kokaka ndjonga lo wâle w’efula wa takɔ mboka. (Heberu 2:1; 3:12) Paulo akatɛkɛta dikambo dia Dɛmasi, wonyande ɔmɔtshi l’edjedja lakôlawɔ. Lande na kakandôlawɔ na? Nɛ dia “ndi akalangi akambu wa la kete nye.” (2 Timote 4:10) Wanɛ tshɛ wakambɛ Nzambi l’ɔtɛ wa wahɔ awɔ hita wekɔ lo wâle wa sala oko Dɛmasi. Vɔ kokaka kotwama la waaso wawasha andja ɔnɛ kakianɛ ko ndjotona sɛna lɔsɛnɔ la ndjahombia dia vɔ nongamɛ ɛtshɔkɔ wa lo nshi yayaye.
11 Kânga mbende kema kɔlɔ ndo mbakatotɔ la nsaki ka kombola nongola ɛtshɔkɔ wa lo nshi yayaye ndo nongamɛ tshungɔ oma l’ehemba, teye dia ngandji mbakeketsha lowando lakiso lo kɛnɛ kendana l’akambo wahomba mbɔsa dihole dia ntondo lo lɔsɛnɔ laso. Kɛnɛ koleki ohomba ele lolango laki Jehowa, koko aha lakiso. (Luka 22:41, 42) Eelo, ngandji tokeketshaka. Tɔ tokimanyiyaka dia mendɛ la solo dia lotutsha le Nzambi, lo ngɛnangɛna l’ɛtshɔkɔ tshɛ watoshande ndo monga la mbetawɔ ɔnɛ tayolongola kɛnɛ tshɛ kakandatolake, ndo diangɔ dikina efula l’etena kakandalɔngɔsɔla ndamɛ. (Osambu 145:16; 2 Koreto 12:8, 9) Koko, la ntondo k’akambo asɔ, ngandji tokimanyiyaka dia tetemala kamba aha la nsaki ya lokaki nɛ dia ‘ngandji . . . hatoyangaka wahɔ ande hita.’—1 Koreto 13:4, 5.
Waa na wahomba Akristo mboka ngandji?
12. Lo ndjela Yeso, waa na wahombaso mboka ngandji?
12 Yeso akasha wetshelo wendana l’onto tshɛ lo kɛnɛ kendana l’anto wahombaso mboka ngandji lam’akandavusola akambo ahende oma l’Ɛlɛmbɛ wa Mɔsɛ. Nde akate ate: “Wɛ pombaka nanga Jehowa Nzambi kayɛ l’otema ayɛ tshɛ la anima ayɛ tshɛ ndo la yimba yaye tshɛ” ndo, “Wɛ pombaka nanga onyayɛ onto oko wayalangayɛ.”—Mateo 22:37-39, NW.
13. Ngande wakokaso mbeka dia nanga Jehowa, kânga mbahatakoke mbɛna?
13 Lo ndjela ɛtɛkɛta waki Yeso ɛsɔ, mbokɛmaka hwe dia ntondotondo sho pombaka mboka Jehowa ngandji. Koko sho hatotɔ la ngandji k’efula ka Jehowa. Ɔsɔ ekɔ dionga diahombaso sala la wolo dia monga ladiɔ. Mbala ka ntondo kakatoke akambo wendana la Jehowa, takakotwama oya le nde oma l’akambo wakatoke. Yema yema, takayeyaka nganɛ wakandalɔngɔsɔla nkɛtɛ dikambo di’anto. (Etatelu 2:5-23) Takeke akambo wakandatshɛ anto ndo woho wakinde kotokalɛ koko ndamɛ akɔshi yɛdikɔ ya totshungola etena kakɔtɔ pɛkato mbala ka ntondo l’atei wa nkumbo k’anto. (Etatelu 3:1-5, 15) Nde aki la ngandji le wanɛ waki la kɔlamelo, ndo l’ɔkɔngɔ diko nde akakimɔ Ɔnande ɛtɔi lakandote dikambo di’edimanyielo ka pɛkato yaso. (Joani 3:16, 36) Ewo k’efula kɛsɔ kakatakondja akahamia lowando laso otsha le Jehowa. (Isaya 25:1) Nkumekanga Davidi akate dia nde akalangaka Jehowa oma lo woho wakandokokɛ la ngandji tshɛ. (Osambu 116:1-9) Ɛlɔ kɛnɛ, Jehowa tokanɛka, tɔlɔmbɔlaka, toshaka wolo ndo tokeketshaka. Lam’atataleke mbeka akambo wendana la nde, mbataleke ndo ngandji kawokaso pama.— Osambu 31:23; Zefaniya 3:17; Romo 8:28.
Ngande wakokaso kɛnɛmɔla ngandji kaso na?
14. Ngande wakokaso mɛnya dia tekɔ la ngandji k’oshika otsha le Nzambi?
14 Lo mɛtɛ, anto efula l’andja ɔnɛ mbutaka ɔnɛ vɔ nangaka Nzambi, koko etsha awɔ mɛnyaka dia kashi mbatawɔ. Ngande wakokaso mbeya dia sho nangaka Jehowa mɛtɛ na? Sho kokaka sawola la nde lo dɔmbɛlɔ ndo mbotɛ kɛnɛ kakanyiyaso. Ndo sho kokaka sala akambo lo yoho yakɛnɛmɔla ngandji kaso. Ɔpɔstɔlɔ Joani akate ate: “Keli, untu latulangaka diui [diaki Nzambi], mete, ngandji ka [Nzambi] kambufula l’utema andi. Dia dikambu ne mbeyasu shati: Shu teko [“kâmɛ la nde,” NW].” (1 Joani 2:5; 5:3) Ɔtɛkɛta waki Nzambi tɔlɔmbaka nto dia sho sanganaka kâmɛ ndo monga la lɔsɛnɔ ndo la lɔkɛwɔ la pudipudi. Sho mbewɔka lɔkɛwɔ la dungi pende, mbutaka akambo wa mɛtɛ, ndo namaka tokanyi taso pudipudi. (2 Koreto 7:1; Efeso 4:15; 1 Timote 1:5; Heberu 10:23-25) Sho mɛnyaka ngandji kaso lo mbisha ekimanyielo ka l’emunyi le wanɛ wele l’ohomba atɔ. (1 Joani 3:17, 18) Ndo sho hatoyakimɛ dia mbewoya anto akina awui wendana la Jehowa. Mbut’ate ndjakimɔ l’olimu w’esambishelo ka lokumu l’ɔlɔlɔ la Diolelo wasalema l’andja w’otondo. (Mateu 24:14; Romo 10:10) Naka sho kitanyiya Ɔtɛkɛta waki Nzambi l’akambo asɔ, kete tayɛnya dia sho mbokaka Jehowa ngandji ka mɛtɛ.
15, 16. Ɔnɔnyi wetshi, ngande wakonge ngandji ka Jehowa la shɛngiya lo nsɛnɔ y’anto efula?
15 Ngandji kele l’anto le Jehowa mbakimanyiyaka dia vɔ mbɔsa tɛdikɔ t’ɛlɔlɔ. Ɔnɔnyi wetshi, ngandji kɛsɔ akatshutshuya anto 288907 dia kimɔ nsɛnɔ yawɔ le nde ndo mɛnya yɛdikɔ shɔ lo batizama l’ashi. (Mateu 28:19, 20) Vɔ wakayakimɔ le nde l’oyango ɔmɔtshi. Ndjakimɔ kɛsɔ akɛnya otshikitanu wakawasale lo nsɛnɔ yawɔ. Oko ɛnyɛlɔ, Gazmend aki ɔmɔtshi l’atei w’akɛnyi wa kɛnyɔ ya ponde yelɛwɔ basketball wakaleke minyanyema lo wodja wa Albanie. Lo ɛnɔnyi ɛmɔtshi, nde la wadɛnde wakeke Bible ndo kânga mbakawahomana la wekamu efula vɔ wakayokomaka apandjudi wa Diolelo. Ɔnɔnyi wetshi, Gazmend aki l’atei w’anto 366 wakabatizama lo wodja wa Albanie l’ɔnɔnyi w’olimu wa 2000. Jurunalɛ mɔtshi yakatondja sawo dimɔ lo lokombo la nde, yakate ɔnɛ: “Lɔsɛnɔ lande laya l’oyango ɔmɔtshi, ndo l’ɔtɛ wa dikambo sɔ, nde la nkumbo kande waya lo etena koleki ɔngɛnɔngɛnɔ ka lo lɔsɛnɔ lawɔ. Le nde, kɛnɛ kaya ohomba kema dia nde ndjayangɛ wahɔ ande ndamɛ wa lo lɔsɛnɔ, koko mbeya woho wakokande kimanyiya anto akina.”
16 Woho akɔ wamɛ, lo tshunda dimɔtshi dia lo wodja wa Guanly diasondjawɔ pitilɔ wakasha kadiyɛso kɛmɔtshi kaki êke esadi wa batizama dihole dimɔtshi dia woke diaki oko tshondo y’ohemba le nde. Ɛnɔnyi efula l’ɔkɔngɔ wa nde kamba lo dihole sɔ, wakayowotɛka dia nde monga onto la ntondo l’ahɔnyi l’owandji wa tshunda sɔ, ndo nde mbaki womoto la ntondo la kamba lo dihole sɔ lakatɔngɔ tshunda diakɔ. Koko l’etena kɛsɔ ko nde amboshila kimɔ lɔsɛnɔ lande le Jehowa. Diakɔ diele, l’ɔkɔngɔ wa nde kɛtshanya l’omɛnde dikambɔ sɔ, kadiyɛso kɛsɔ akatone dihole sɔ dia lokumu diakawalange mbosha ndo akɔshi yɛdikɔ ya nyanga olimu wahatowɔsɛka wenya efula woho wa nde mbeya pama polo ndo nde koma okambi wa lo tena tshɛ, mbut’ate, ombatshi mboka. Ngandji kande otsha le Jehowa akotshutshuya dia nde mbokambɛ oko ombatshi mboka lo dihole dia nde ndjakimɔ l’eyango wa falanga wa l’andja ɔnɛ. Ɔnkɔnɛ, ngandji ka ngasɔ kɛsɔ mbakatshutshuya anto 805 205 l’andja w’otondo dia vɔ ndjakimɔ lo weho w’olimu w’ombatshi mboka l’ɔnɔnyi w’olimu wa 2000. Ambatshi mboka asɔ wakɛnya djembetelo ya mbetawɔ ndo ya ngandji!
Tambotshutshuyama dia mboka yeso ngandji
17. Naa ɛnyɛlɔ ka dimɛna kendana la ngandji kakɛnya Yeso?
17 Yeso ekɔ ɛnyɛlɔ ka dimɛna efula k’onto lakatshutshuyama la ngandji. La ntondo ka nde ndjoya lanɛ la nkɛtɛ, nde akoke She ndo anto ngandji. Oko wakinde tshondo ya lomba, nde akate ate: “Dimi, ukambi a komba, laki lasuki la [Jehowa]. Dimi lakôngenyangenyaka nshi tshe, ndu lakangenangenaka la ntundu kandi tena tshe. Dimi latongenangenaka lu kete yandi, yakuka antu mbidjase; ndu lakayala la ongenongeno ami kame l’antu.” (Tukedi 8:30, 31) Ngandji kaki la Yeso akôtshutshuya dia tshika dihole diande dia l’olongo ko ndjotɔ oko ɔn’ashashi. Nde aki la solo dia lotutsha ndo la ngandji otsha le akanga wa memakana ndo wa ndjakitshakitsha ndo akasoyama oma le atunyi waki Jehowa. L’ekomelo, nde akavu dikambo di’anto tshɛ l’otamba w’asui. (Joani 3:35; 14:30, 31; 15:12, 13; Filipi 2:5-11) Ɔsɔ aki mɛtɛ ɛnyɛlɔ ka dimɛna k’onto laki la nsaki k’ɔlɔlɔ!
18. (a) Ngande wongaso la ngandji otsha le Yeso? (b) Yoho yakɔna yɛnyaso dia sho mbokaka Yeso ngandji?
18 Lam’adia anto wele l’etema w’ɔlɔlɔ ɛkɔndɔ wa lɔsɛnɔ laki Yeso lo waa Evanjiliɔ ndo lam’akanawɔ yimba l’efula k’ɛtshɔkɔ wakondjawɔ oma lo lɔkɛwɔ lande la kɔlamelo, vɔ tshutshuyamaka dia monga la ngandji k’efula otsha le nde. Ɛlɔ kɛnɛ, ekɔ oko Petero sho mbakandatɛka ɛtɛkɛta ɛnɛ w’ɔnɛ: ‘Kânga mbahanyatɛnaka [Yeso] ndoko lushi, nyu mbolangaka.’ (1 Petero 1:8) Sho mɛnyaka ngandji kaso lam’ongaso la mbetawɔ le nde ndo lam’okoyaso yoho yande ya lɔsɛnɔ ya ndjahombia. (1 Koreto 11:1; 1 Tesalonika 1:6; 1 Petero 2:21-25) Lo Ngɔndɔ ka Nɛi 19, 2000, takohola anto 14 872 086 ɛkɔkɔ watotshutshuya dia mboka Yeso ngandji lam’akawɔtɔ lo losanganya la Eohwelo ka nyɔi kande lasalema ɔnɔnyi tshɛ. Anto efula wakɔtɔ lo losanganya lɔsɔ mɛtɛ! Ndo ekɔ mɛtɛ ekeketshelo dia mbeya ɔnɛ anto efula nangaka kondja panda oma lo tshimbo y’olambo wa Yeso! Lo mɛtɛ, sho keketshamaka oma lo ngandji kele la Jehowa nde la Yeso oya le so ndo oma lo ngandji kele laso otsha le wɔ.
19. Wembola akɔna wendana la ngandji wayotɔsɛdingola lo sawo diayela?
19 Yeso akate dia sho pombaka nanga Jehowa l’otema aso tshɛ, la anima aso tshɛ, la yimba yaso tshɛ, ndo la wolo aso tshɛ. Koko nde akate nto ate sho pombaka nanga wonyaso onto oko wayalangaso. (Mako 12:29-31) Waa na wahombaso mboka ngandji na? Ndo ngande watokimanyiya ngandji ka wonyaso onto dia monga la wɛdimo ndo la tokanyi t’ɔlɔlɔ? Tayɔsɛdingola wembola ɛnɛ lo sawo diayela.
Onde wɛ mbohɔka?
• Lande na kele ngandji ekɔ dionga di’ohomba efula?
• Ngande wakokaso mbeka dia mboka Jehowa ngandji?
• Ngande wɛnya lɔkɛwɔ laso dia sho nangaka Jehowa?
• Ngande wɛnyaso ngandji kaso otsha le Yeso?
[Esato wa lo lɛkɛ 20]
Ngandji tokimanyiyaka dia kongɛ la lotutsha tshɛ lushi layototshungɔ
[Osato wa lo lɛkɛ 22]
Olambo wa woke waki Yeso totshutshuyaka dia sho mbôka ngandji