Alako Wendana La Woho Wa Mbeka

Nshikikɛ awui woleki ohomba wa mbeka

Sho tshɛ mongaka la yema y’etena ka nsala wekelo w’onto ndamɛ. Ngande wakokaso ndeka nkamba dimɛna la wenya akɔ? Ntondotondo, etshaka wenya efula lo kɛnɛ kalekayɛ nanga mbadia. Wɛ ayokondja mɛtɛ wahɔ efula lo mbekaka yema y’awui tshitshɛ la yambalo tshɛ lo dihole dia mbeka awui efula lowango lowango.

Oma laasɔ, shikikɛ awui amɔtshi woleki ohomba. (Ɛf. 5:15, 16) Sɛdingola alako w’ohomba anɛ:

• Adiaka Bible lushi tshɛ. (Os. 1:2) Ekongelo kaso ka wadielo wa Bible wa lomingu la lomingu ka lo losanganya la l’atei wa lomingu ekɔ yoho mɔtshi yoleki dimɛna ya ntatɛ.

• Lɔngɔsɔlaka wekelo wa Tshoto y’Etangelo ndo nsanganya ya l’atei a lomingu. Ongaka suke dia mbisha kɔmatɛrɛ.​—Os. 22:22.

• Naka etena kekekɔ, lam’alangayɛ nsala la wolo nto dia mbadia ndo menda waa mma akina wa lo nyuma, ɛnyɛlɔ periodikɛ yaso yakahɛso anto, tovidɛo ndo diangɔ dikina diatomba lo jw.org.

• Sala ekongelo ka wekelo. Wɛ koka nsala eyangelo wendana l’okakatanu ɔmɔtshi wahomana la yɛ, dimbola diele la yɛ kana dui dimɔtshi dia lo Bible diayoyolanga nshihodia dimɛna dimɛna. Dia nkondja tokanyi, mvusola etenyi katanema lo jw.org kele l’ɔtɛ a dui ɔnɛ: “Elimu wa wekelo wa Bible.”