Onde wɛ aya suke dia ndjakimɔ le Jehowa?

1-2. Kakɔna kahomba onto nsala la ntondo ka nde batizama?

L’ƐNƆNYI etanu wetshi, anto ndekana miliyɔ ɔtɔi wakabatizama oko Ɛmɛnyi wa Jehowa. Efula ka l’atei awɔ, l’ɛnyɛlɔ ka Timɔte ombeki wa lo ntambe ka ntondo, wakeke akambo wa mɛtɛ ‘oma ko tɔkɛndakɛnda tawɔ.’ (2 Tim. 3:​14, 15) Amɔtshi wakeke akambo wendana la Jehowa waya epalanga, akina etena kayawɔ esombe. Ɛnɔnyi efula wambeta, womoto ɔmɔtshi lakeke Bible l’Ɛmɛnyi wa Jehowa akabatizama ele l’ɛnɔnyi 97!

² Naka wɛ ekɔ ombeki wa Bible kana akodiama oma le ambutshi wele Ɛmɛnyi, onde wɛ kanyiyaka dia ndjakimɔ ndo batizama? Ɔsɔ ekɔ oyango wa dimɛna efula! La ntondo ka wɛ batizama, wɛ pombaka ndjakimɔ le Jehowa. Sawo nɛ diayɛnya kɛnɛ kalembetshiya ndjakimɔ. Diɔ diayokokimanyiya nto dia wɛ mɛna lande na kahayakoke mengenga dia ntakola nna sɔ, lo nongola batisimu etena kayoyonga suke dia nsala dui sɔ.

KAKƆNA KALEMBETSHIYA NDJAKIMƆ?

3. Sha bɛnyɛlɔ dia lo Bible di’anto wakayakimɔ le Jehowa.

³ Lo Bible, ndjakimɔ nembetshiyaka ndjaakitsha laande dikambo di’oyango ɔmɔtshi w’ekila. Ase Isariyɛlɛ waki wodja wakayakimɔ le Jehowa. Koko anto amɔtshi wa l’atei wa wodja ɔsɔ wakayakimɔ le Jehowa lo yoho ya laande. Ɛnyɛlɔ, Arɔna akalɔtɛ “djembetelo y’ekila ya ndjakimɔ,” mbuta ate lokaka la ngaingai la paonyi la ntondo ka dihɔndɔ diakandadinge l’ɔtɛ ande. Lokaka la paonyi lɔsɔ lakɛnyaka dia nde akakitshama laande dia kambaka lo yoho ya laande, mbuta ate oko ɔlɔmbɛdi a laadiko l’Isariyɛlɛ. (Lɛw. 8:9) Akidiami vɔ lawɔ wakayakimɔka le Jehowa lo yoho ya laande. Tshɛkɛta “Okidiami,” ndja oma lo tshɛkɛta ya lo Hɛbɛru ka nazirʹ, yalembetshiya “Ɔnɛ lambokakitɔna,” kana “Ɔnɛ lamboyakimɔ.” Akidiami wakahombaka nkitanyiya lo yoho ya laande wadjango wakafundama l’Ɛlɛmbɛ wa Mɔsɛ.—Wal. 6:​2-8.

4. a) Lo yoho yakɔna yele wanɛ wakayakimɔ le Jehowa kitshama laande l’oyango w’ekila? b) Kakɔna kalembetshiya “ndjasɛka”? (Enda ndo osato.)

⁴ Etena kayakimɔyɛ le Jehowa, wɛ sɔnaka dia nkoma ombeki wa Yeso Kristo ndo wɛ mbetɛka osalelo wa lolango la Nzambi dui dioleki ohomba lo lɔsɛnɔ layɛ. Kakɔna kalɔmba ndjakimɔ k’Okristo le yɛ? Yeso akate ɔnɛ: “Naka onto nangaka ndjelami, nde ayasɛkɛ.” (Mat. 16:24) Etelo ka lo Grɛkɛ kakakadimɔma ɔnɛ “nde ayasɛkɛ” koka nto nembetshiya “dia nde pombaka mbuta ndooko lo dikambo diande ndamɛ.” Oko okambi wa Jehowa wakayakimɔ, wɛ ayonga l’ohomba wa mbuta ndooko l’oseka dui tshɛ diahɔtɔnɛ la lolango lande. (2 Kɔr. 5:​14, 15) Kɛsɔ nembetshiyaka nto dia wɛ ayota ndooko “l’etsha wa demba,” ɛnyɛlɔ oko awui wa mindo wa dieyanelo. (Ngal. 5:​19-21; 1 Kɔr. 6:18) Onde nkitanyiya wadjango asɔ koka mbela ekakatanu lo lɔsɛnɔ layɛ? Ndooko naka wɛ mbokaka Jehowa ngandji ndo wɛ shikikɛka dia ɛlɛmbɛ ande wekɔ mɛtɛ lo dikambo dia wahɔ ayɛ hita. (Os. 119:97; Isa. 48:​17, 18) Ɔnangɛso lelɛwɔ Nicholas akɛnyi mɛtɛ ka dikambo sɔ lo mbuta ɔnɛ: “Wɛ mbeyaka mbɔsa di’atɔndɔ wa Jehowa wekɔ oko lokanu lakoshimba diaha wɛ nsala kɛnɛ tshɛ kakokayɛ nsala kana oko dihole di’ombawɔ ntambwɛ diakokokɛ oma lo waale.”

5. a) Ngande wayakimɔyɛ le Jehowa? b) Otshikitanu akɔna wele lam’asa ndjakimɔ ndo batisimu? (Enda ndo osato.)

⁵ Ngande wayakimɔyɛ le Jehowa? Wɛ mbolakaka lo dɔmbɛlɔ dia wɛ ayowɔtɛmɔlaka paka ndamɛ oto ndo wɛ ayetɛka lolango lande dui dioleki ohomba lo lɔsɛnɔ layɛ. Lo mɛtɛ, wɛ ndakaka Jehowa dia wɛ ayotetemala mbooka ngandji “l’otema ayɛ tshɛ, la anima ayɛ tshɛ, la yimba yayɛ tshɛ ndo la wolo ayɛ tshɛ.” (Makɔ 12:30) Ndjakimɔ kayɛ salemaka lo woshɛshɛ lam’asayɛ la Jehowa. Lo yoho yotshikitanyi, batisimu ekɔ djembetelo yɛnya lo sɛkɛ dia wɛ akashile ndjakimɔ; mbuta ate mɛnya anto akina dia wɛ amboshilaka la ndjakimɔ. Ndjakimɔ kayɛ ekɔ dɔkɔlɔkɔ di’ekila ndo Jehowa kombolaka dia wɛ sɛnaka lo yoho yɔtɔnɛ la diɔ paka oko walongamɛyɛ nsala dui sɔ le yɛ wɛmɛ.—Ond. 5:​4, 5.

LANDE NA KAHOMBAYƐ NDJAKIMƆ LE JEHOWA?

6. Kakɔna katshutshuya onto dia ndjakimɔ le Jehowa?

⁶ Ɔkɔkɔ woleki woke wayakimɔyɛ le Jehowa ele nɛ dia wɛ mbookaka ngandji. Ngandji kayɛ hahikami oma lo nsaki kayɛ tɔamɛmɛ. Koko, tɔ mbika edio lo “ewo k’oshika” ndo lo “eokelo ka lo nyuma,” k’awui wakayeke wendana la Jehowa wakotshutshuya dia wɛ mpamia ngandji kawokayɛ. (Kɔl. 1:9) Wekelo ayɛ wa Bible wakakoshikikɛ, 1) dia Jehowa ekɔ onto la mɛtɛ, 2) dia Bible kekɔ Ɔtɛkɛta ande wakasambiyama ndo 3) dia nde ekɔ lo nkamba l’okongamelo ande dia nkotsha lolango lande.

7. Kakɔna kahombaso nsala la ntondo ka sho ndjakimɔ le Nzambi?

⁷ Wanɛ wayakimɔ le Jehowa pombaka mbeya wetshelo w’etatelo watanema l’Ɔtɛkɛta wa Nzambi ndo sɛnaka lo yoho yɔtɔnɛ l’atɔndɔ wa lɔkɔ. Vɔ salaka kɛnɛ tshɛ kakokawɔ nsala dia mbutɛ anto akina awui wakaweke. (Mat. 28:​19, 20) Ngandji kokawɔ Jehowa pamaka ndo vɔ kɛnɛmɔlaka nsaki kawɔ k’oma k’ɛse otema ka mbɔtɛmɔlaka paka ndamɛ oto. Ngasɔ mbediɔ ndo lo dikambo diayɛ? Naka wɛ monga la woho wa ngandji ka ngasɔ, kete wɛ hatɔsa ndjakimɔ ndo batisimu kayɛ oko dui dimɔtshi diakombolayɛ nsala paka dia ngɛnyangɛnya ombetsha ayɛ wa Bible kana ambutshi ayɛ; kana dui dimɔtshi diakombolayɛ nsala dia wɛ mongaka kaamɛ l’angɛnyi ayɛ.

8. Ngande wɛnyayɛ lowando layɛ lo yɛdikɔ yayɛ ya ndjakimɔ le Jehowa? (Osambo 116:​12-14)

⁸ Yɛdikɔ yayɛ ya ndjakimɔ le Jehowa ndjaaka etena kakanyiyayɛ awui tshɛ wamondokosalɛ. (Adia Osambo 116:​12-14.) Sunganaka dia Bible mbelɛ Jehowa ɔnɛ Ombishi wa “losha tshɛ l’ɔlɔlɔ ndo woshasha tshɛ wa kokele.” (Jak. 1:17) Woshasha woleki tshɛ lo weshasha ɛsɔ ele olambo wa Ɔnande, Yeso. Ohokana yimba la woshasha wa diambo ɔsɔ! Oshinga w’etshungwelo wambokokimanyiya dia wɛ monga la diɔtɔnganelo dia ma ma la Jehowa. Ndo vɔ wambokosha elongamelo ka lɔsɛnɔ la pondjo. (1 Jni. 4:​9, 10, 19) Ndjakimɔ le Jehowa ekɔ yoho mɔtshi ya mɛnya lowando layɛ lo tshelo yoleki tshɛ ya ngandji yakandɛnya yende atɛnyaka, mbidja ndo ɛtshɔkɔ ekina tshɛ wambokosha Jehowa. (Eoh. 16:17; 2 Kɔr. 5:15) Lowando lɔsɔ tɔtɔmiyama lo wekelo 46, lo dui di’ohomba 4, dia lo dibuku Ngɛnangɛnaka la lɔsɛnɔ pondjo pondjo!, diele ndo la vidɛo yele la minitɛ shato yele l’ɔtɛ a dui ɔnɛ: Kimɔka weshasha ayɛ le Nzambi.

ONDE WƐ AYA SUKE DIA NDJAKIMƆ NDO BATIZAMA?

9. Lande na kahahombe onto ndjaoka dia wekɔ lo mbootshutshuya dia nde ndjakimɔ?

⁹ Ondo wɛ mbeyaka ndjaoka dia wɛ atonge suke dia ndjakimɔ ndo batizama. Ondo wɛ eke l’ohomba wa nsala etshikitanu lo lɔsɛnɔ layɛ dia liɔtɔnganyiya l’atɔndɔ wa Jehowa kana ondo wɛ eke l’ohomba wa nyomɔsa etena ka nkeketsha mbetawɔ kayɛ. (Kɔl. 2:​6, 7) Aha ambeki wa Bible tshɛ mbatohamaka woho akɔ waamɛ ndo aha ɛlɔngɔlɔngɔ kana esekaseka tshɛ mbonga suke dia ndjakimɔ ndo batizama l’ɛnɔnyi akɔ waamɛ. Hemba dia nsɛdingola ehamelo ayɛ wa lo nyuma lo yoho yɔtɔnɛ l’akoka ayɛ wa nsala dui sɔ koko aha lo ndjaɛdika l’onto okina.—Ngal. 6:​4, 5.

10. Kakɔna kakokayɛ nsala naka wɛ ambɛna dia wɛ atonge suke dia ndjakimɔ ndo batizama? (Enda ndo kiombo yele l’ɔtɛ a dui ɔnɛ: “Le wanɛ wakodiama l’akambo wa mɛtɛ.”)

¹⁰ Kaanga naka wɛ amboshikikɛ dia wɛ atonge suke dia ndjakimɔ le Jehowa, tetemala ntakola wanya wayokokonya l’oyango ɔsɔ. Lɔmba Jehowa dia nde ntshɔkɔla welo wadjayɛ wa nsala etshikitanu wele ohomba. (Flpɛ. 2:13; 3:16) Wɛ koka monga l’eshikikelo dia nde ayohokamɛ dɔmbɛlɔ diayɛ ndo ayokokadimola.—1 Jni. 5:14.

LANDE NA KENGENGA ANTO AMƆTSHI

11. Ngande wayotokimanyiya Jehowa dia sho ntetemala ntshikala la kɔlamelo otsha le nde?

¹¹ Anto amɔtshi waya suke dia ndjakimɔ ndo batizama mengengaka. Ondo vɔ mbeyaka ndjambola ɔnɛ: ‘Kakɔna kayomosala naka lamboyosala pɛkato ka woke l’ɔkɔngɔ wa dimi nongola batisimu ndo kana lamboyotshanyema?’ Naka wɛ ekɔ la wɔma wa ngasɔ, kete yashikikɛ dia Jehowa ayokosha kɛnɛ tshɛ kele la yɛ ohomba dia “nkɛndakɛnda lo yoho yalanga[nde] dia mbɔngɛnyangɛnya lo akambo tshɛ.” (Kɔl. 1:10) Nde ayokosha nto wolo wa nsala kɛnɛ kele ɔlɔlɔ. Nde amboshilaka mɛnya dia nde koka nsala dui sɔ lo woho wakandashile salɛ anto akina akambo efula. (1 Kɔr. 10:13) Ɔsɔ ekɔ ɔkɔkɔ ɔmɔtshi wele anto angana ato mbatshanyema oma l’etshumanelo k’Akristo. Jehowa mbishaka anto ande kɛnɛ tshɛ kewɔ latɔ ohomba dia ntetemala ntshikala la kɔlamelo.

12. Ngande wakokayɛ mbewɔ dia ndjosala pɛkato ka woke?

¹² Onto tshɛ lele keema kokele pembamaka dia nsala kɛnɛ kele kɔlɔ. (Jak. 1:14) Koko wɛ pombaka nsɔna kɛnɛ kayoyosala etena kahembamayɛ. Ko l’ekomelo a shimu wɛmɛ mbayɔsɔna yoho ya lɔsɛnɔ yayoyokombola nsɛna. Anto amɔtshi mbutaka dia sho hatokoke mbahemɛ nsaki yaso ndo kɛnɛ kakokaso nsala, koko dui sɔ diekɔ kashi, eka dia mbahemɛ nsaki yayɛ ya kɔlɔ, laasɔ kaanga naka etena kahembamayɛ, wɛ koka nsɔna diaha nsala dui dia kɔlɔ. Dia nsala dui sɔ, lɔmbaka lushi tshɛ. Tetemala la mbekelo y’amɛna ya wekelo w’onto ndamɛ w’Ɔtɛkɛta wa Nzambi. Ɔtɔka lo nsanganya y’Akristo. Sambishaka anto akina. Nsala awui asɔ mbala la mbala ayokosha wolo wa wɛ ntetemala ntshikala la kɔlamelo le Jehowa. Ndo tohɛke pondjo dia Jehowa ayokokimanyiya dia wɛ ntetemala nsala dui sɔ.—Ngal. 5:16.

13. Ɛnyɛlɔ ka dimɛna ka ngande kakatotshikɛ Yɔsɛfu?

¹³ Ayonga dui dia wɔdu dia nsɛna lo yoho yɔtɔnɛ la ndjakimɔ kayɛ naka wɛ nsala dui sɔ la ntondo ka wɛ mbɔsa yɛdikɔ ya kɛnɛ kayoyosala etena kayoyohomana l’ohemba. Bible tɛkɛtaka di’anto wakasale dui sɔ, kaanga mbakiwɔ ndo vɔ lawɔ anto wele keema kokele. Ɛnyɛlɔ wadi aki Pɔtifara akahembaka nkɔsha Yɔsɛfu mbala la mbala. Koko Yɔsɛfu akashile mbeya kɛnɛ kakandahombe nsala. Bible totɛka dia “nde akatone,” ndo nde akate ɔnɛ: “Ngande wakokami nsala kɔlɔ ka woke kɛsɔ ndo salɛ Nzambi pɛkato?” (Eta. 39:​8-10) Mbokɛmaka hwe dia Yɔsɛfu akeyaka kɛnɛ kakandahombe nsala la ntondo ka wadi aki Pɔtifara ndjohemba. Dui sɔ diaki wɔdu le nde dia nsala kɛnɛ kele ɔlɔlɔ etena kakandahembama.

14. Ngande wakokayɛ mbeka dia mbuta ndooko etena keyɛ la ntondo k’ehemba?

¹⁴ Ngande wakokayɛ mɛnya yoho y’eshikikelo kakɔ kaamɛ kakɛnya Yɔsɛfu? Wɛ koka mbɔsa yɛdikɔ oma ko kakianɛ lo kɛnɛ kayoyosala etena kayoyohembama. Eka dia mbuta ndooko aha la ntshimbatshimba lo awui tshɛ wakoka nyangiya Jehowa ndo ntona kaanga kanyiyaka awui akɔ. (Os. 97:10; 119:165) Lo nsala ngasɔ, wɛ hatosala pɛkato etena kayoyohembama. Wɛ amboshilaka mbeya kɛnɛ kayoyosala.

15. Ngande wakoka onto mɛnya dia nde ekɔ lo ‘nyanga Jehowa l’otema ɔtɔi’? (Hɛbɛru 11:6)

¹⁵ Lo wedi ayɛ, ondo wɛ mbetawɔka di’ambosholaka akambo wa mɛtɛ ndo wɛ kombolaka kambɛ Jehowa l’otema ayɛ tshɛ, koko dui dimɔtshi diekɔ lo koshimba dia wɛ ndjakimɔ ndo batizama. Wɛ koka nsala kɛnɛ kakasale nkumekanga Davidɛ. Wɛ koka nsɛngasɛnga Jehowa ɔnɛ: “Nzambi le, onshishime ndo eya otema ami. Ɔnsɛdingole ndo eya tokanyi tankiyanya. Enda kana mboka kɛmɔtshi ka kɔlɔ kekɔ le mi ndo ɔnɔmbɔlɛ lo mboka ka pondjo.” (Os. 139:​23, 24) Jehowa tshɔkɔlaka wanɛ “wooyanga l’otema ɔtɔi.” Welo wadjayɛ dia nkotsha oyango ayɛ wa ndjakimɔ ndo batizama kɛnyaka dia wɛ ekɔ lo nsala dui sɔ.—Adia Hɛbɛru 11:6.

TETEMALA NDJASUKANYA LA JEHOWA

16-17. Ngande wakoka wanɛ wakoodiama l’akambo wa mɛtɛ ndjasukanya la Jehowa? (Joani 6:44)

¹⁶ Yeso akate di’ambeki ande wakakotwama oma le Jehowa. (Adia Joani 6:44.) Kana yimba efula lo kɛnɛ kendana la dui dia diambo sɔ ndo kɛnɛ kalembetshiyadiɔ le yɛ. Jehowa mɛnaka ɛngɔ kɛmɔtshi k’ɔlɔlɔ le onto l’onto lakotolande oya le nde. Nde mbɔsaka onto l’onto oko “ɛngɔ kande ka nɛmɔ.” (Eoh. 7:6; nɔtɛ.) Ngasɔ mbediɔ ndo lo dikambo diayɛ.

¹⁷ Mbeyaka monga ko wɛ ekɔ ɔlɔngɔlɔngɔ wakoodiama l’akambo wa mɛtɛ. Koko wɛ koka ndjaoka oko wɛ ekɔ lo kambɛ Jehowa paka l’ɔtɛ wele ambutshi ayɛ salaka dui sɔ, koko aha l’ɔtɛ wakakokotola Jehowa oya le nde. Kaanga mbediɔ ngasɔ, Bible mbutaka ɔnɛ: “Nyoyasukanya la Nzambi, ko nde ayoyasukanya la nyu.” (Jak. 4:8; 1 Ɛk. 28:9) Etena kɔsayɛ yɛdikɔ ya ndjasukanya la Jehowa, nde lawɔ ndjasukanyaka la yɛ. Jehowa hakɔshi tsho oko onto lele l’atei w’olui ɔmɔtshi. Nde kotolaka onto l’onto, mbidja ndo onto tshɛ lakoodiama lo akambo wa mɛtɛ. Etena kɔsa onto ɔmɔtshi yɛdikɔ ya ndjasukanya la Jehowa, Nde kadimolaka oko wofundamidiɔ lo Jakɔba 4:8.—Ɛdika la 2 Tɛsalɔnika 2:13.

18. Kakɔna kayotɛna lo sawo diayela? (Osambo 40:8)

¹⁸ Etena kayakimɔyɛ le Jehowa ndo kabatizamayɛ, wɛ mongaka la kanyi yele oko nyɛ yaki la Yeso. Nde akayakimɔ la lolango lande le She. (Adia Osambo 40:8; Hɛb. 10:7) Lo sawo diayela, tayɔkɛtshanya kɛnɛ kayokokimanyiya dia wɛ ntetemala kambɛ Jehowa la kɔlamelo l’ɔkɔngɔ wa batisimu kayɛ.