‘Tetemala ndjela’ Yeso l’ɔkɔngɔ wa batisimu

1-2. Ngande wonga lɔsɛnɔ dimɛna l’ɔkɔngɔ wa batisimu?

EKƆ dui di’ɔngɛnɔngɛnɔ batizama ndo nkoma ose nkumbo ka Jehowa. Wanɛ wakakondja diɛsɛ sɔ mbetawɔka ɛtɛkɛta waki omembi w’esambo Davidɛ lakate ate: “Ɔngɛnɔngɛnɔ le ɔnɛ lasɔnayɛ [wɛ Jehowa] ndo lelayɛ suke dia mbidjasɛ lo asɛkɛ ayɛ.”—Os. 65:4.

² Jehowa aha onto tshɛ mbetawɔnde dia mbidjasɛ l’asɛkɛ ande. Oko wakadiɛnya sawo di’etshi, nde sɔnaka dia ndjasukanya la wanɛ wɛnya dia vɔ kombolaka dia ndjasukanya lande. (Jak. 4:8) Etena kayakimɔyɛ le Jehowa ndo kabatizamayɛ, wɛ ndjasukanyaka la Jehowa lo yoho ya laande. Wɛ koka monga l’eshikikelo dia l’ɔkɔngɔ wa wɛ batizama, nde ‘ayokohongolɛ ɔtshɔkɔ polo ndo ndooko ɛngɔ kahombama.’—Mal. 3:10; Jɛr. 17:​7, 8.

3. Ɔkɛndɛ akɔna wa woke efula wele l’Akristo wakayakimɔ ndo wakabatizama? (Ondaki 5:​4, 5)

³ Lo mɛtɛ, batisimu ekɔ tsho etatelo. L’ɔkɔngɔ wa wɛ ntakola nna sɔ, wɛ ayokombola nsala kɛnɛ tshɛ koleki dimɛna dia nsɛna lo yoho yɔtɔnɛ la dɔkɔlɔkɔ dia ndjakimɔ kayɛ, kaanga la ntondo k’ehemba kana kɔtɔ mbetawɔ kayɛ l’ohemba. (Adia Ondaki 5:​4, 5.) Oko ombeki wa Yeso, wɛ ayoyela ɛnyɛlɔ ka Yeso ndo wadjango ande lo nna ndo lo nna naka kokaka. (Mat. 28:​19, 20; 1 Pe. 2:21) Sawo nɛ diayokokimanyiya dia nsala dui sɔ.

‘TETEMALA NDJELA’ YESO KAANGA LA NTONDO K’EHEMBA

4. Lo yoho yakɔna yɛmba ambeki wa Yeso “otamba w’asui”? (Luka 9:23)

⁴ Tɔfɔnyake dia lɔsɛnɔ layɛ halotonga l’ekakatanu l’ɔkɔngɔ wa wɛ batizama. Yeso akɛnya hwe dia ambeki ande wayohomba mɛmba “otamba ande w’asui.” Lo mɛtɛ, vɔ wayohomba salaka dui sɔ “lushi la lushi.” (Adia Luka 9:23.) Onde Yeso akate di’ambeki ande wayohombaka sowaka mbala la mbala? Ndooko. Nde akakaka tsho epole ɔsɛkɛ dia laadiko di’ɛtshɔkɔ wayowokondja, vɔ wayohomba mpomana l’ekakatanu. Ekakatanu ɛmɔtshi l’atei awɔ mbeyaka mbisha paa efula.—2 Tim. 3:12.

5. Ɛtshɔkɔ akɔna wakalake Yeso wanɛ wayahondja?

⁵ Ondo wɛ amboshilaka mpomana l’ɔlɔshamelo oma le ase nkumbo kayɛ kana ondo wɛ akayahondja diangɔ dimɔtshi dia l’emunyi l’oyango wa mbetsha wahɔ wa Diolelo lo dihole dia ntondo. (Mat. 6:33) Naka ngasɔ mbediɔ, kete onga l’eshikikelo dia Jehowa ekɔ lo mɛna olimu ayɛ wa la kɔlamelo. (Hɛb. 6:10) Ondo wɛ ambɛna mɛtɛ k’ɛtɛkɛta wa Yeso wata ɔnɛ: “Ndooko onto lakatshike luudu kana anango kana akadiyɛnde kana nyango kana she kana ana kana dikambɔ l’ɔtɛ ami ndo l’ɔtɛ wa lokumu l’ɔlɔlɔ, lahatokondja mvudu, anango, akadiyɛnde, nyango, ana ndo dikambɔ mbala 100 l’etena kɛnɛ kaamɛ l’ɛhɛnyɔhɛnyɔ ko lo dikongɛ di’akambo diayaye lɔsɛnɔ la pondjo.” (Makɔ 10:​29, 30) Ɛtshɔkɔ wamboyokondja ndeka la fwa ɛngɔ tshɛ kakayayahondja.—Os. 37:4.

6. Lande na kayoyonga l’ohomba wa ndɔshana la “nsaki ka demba” l’ɔkɔngɔ wa batisimu kayɛ?

⁶ Wɛ ayotetemala ndɔshana “la nsaki ka demba” l’ɔkɔngɔ wa batisimu kayɛ. (1 Jni. 2:16) Ohɔka dia wɛ ekɔ kanula y’Adama yakahowɔ pɛkato. Lo tena dimɔtshi ondo wɛ toyaokaka woho wakayaoke ɔpɔstɔlɔ Pɔɔlɔ. Nde akafunde ate: “Dimi mɛtɛ ngɛnangɛnaka ɛlɛmbɛ wa Nzambi lo ndjela woho w’onto wemi l’etei, koko dimi mɛnaka ɔlɛmbɛ okina wele l’etei ka demba diami walɔshana la ɔlɛmbɛ wele lo yimba yami ndo wambetɛ mfumbe ka ɔlɛmbɛ wa pɛkato wele l’etei ka demba diami.” (Rɔmɔ 7:​22, 23) Ondo wɛ mbeyaka nkɔmɔ l’ɔtɛ wahombayɛ ndɔshana la nsaki ka nsala kɔlɔ. Koko, lo nkana yimba la daka diakayalake Jehowa etena kakayayakimɔ le nde, ayokeketsha yɛdikɔ yayɛ ya ndɔshana l’ehemba. Kɛnɛ kele mɛtɛ ele etena kahomanayɛ l’ehemba, dɔkɔlɔkɔ diayɛ dia ndjakimɔ diayetɛ lɔsɛnɔ layɛ wɔdu. Lo woho akɔna?

7. Ngande wele ndjakimɔ kayɛ le Jehowa ayokokimanyiya dia wɛ ntetemala ntshikala la kɔlamelo le nde?

⁷ Etena kayakimɔyɛ le Jehowa, wɛ ndjasɛkaka. Dui sɔ nembetshiyaka dia wɛ mbutaka ndooko lo nsaki ndo l’awui tshɛ wakoka nyangiya Jehowa. (Mat. 16:24) Ɔnkɔnɛ etena kayoyohomana l’ohemba, wɛ hatonga l’ohomba wa mbɔsa etena ka nkana yimba lo kɛnɛ kayoyohomba nsala. Wɛ amboshilaka mbɔsa yɛdikɔ lo kɛnɛ kayoyosala, mbuta ate ntshikala la kɔlamelo le Jehowa. Wɛ ayotetemala mbɔsa yɛdikɔ ya ngɛnyangɛnya Jehowa. Lo yoho mɔtshi wɛ ayonga oko Jɔbɔ. Kaanga mbakandahomana l’ehemba wa wolo efula, nde akashile mbɔsa yɛdikɔ lo mbuta ɔnɛ: “Dimi hantotshika olowanyi ami!”—Jɔbɔ 27:5.

8. Ngande wele kanaka yimba la ndjakimɔ kayɛ ayokokimanyiya dia wɛ nshika ntanga la ntondo k’ohemba?

⁸ Lo kanaka yimba lo dɔmbɛlɔ dia ndjakimɔ kayɛ le Jehowa, wɛ ayokondja wolo wa nshika ntanga l’oseka ohemba tshɛ. Ɛnyɛlɔ, onde wɛ ambotatɛ mɛnyanya ngandji l’onto okina lele bu olonganyi ayɛ? Ndooko mɛtɛ! Wɛ amboshilaka mbuta ndooko lo dikambo sɔ. Wɛ ayoyanganya la lɔkɔnyɔ laya lo ndɔshana la nsaki ya kɔlɔ l’ɔkɔngɔ wa yɔ mbika edio. Wɛ ayokadimɔ oma lo “mboka ka akanga wa kɔlɔ.”—Tok. 4:​14, 15.

9. Ngande wakoka nkana yimba lo dɔmbɛlɔ dia ndjakimɔ kayɛ kokimanyiyaka nto dia ntetemala mbetɛ elimu wa lo nyuma lo dihole dia ntondo?

⁹ Kakɔna kayoyosala naka wambokosha olimu ɔmɔtshi wayokodjɛka wekamu waha mbɔtɔka lo nsanganya y’Akristo mbala la mbala? Wɛ ayohomba mbeya kɛnɛ kayoyosala. Edja efula la ntondo ka wɛ ntana olimu ɔsɔ, wɛ amboshilaka mbuta ndooko lo woho w’olimu wa ngasɔ. Ɔnkɔnɛ, wɛ hatohembama dia mbetawɔ woho w’olimu ɔsɔ ndo oma laasɔ nyanga yoho mɔtshi ya ntetemala mbetsha Jehowa lo dihole dia ntondo. Lo nkana yimba la yɛdikɔ yaki la Yeso ya ngɛnyangɛnya She, wɛ hatotshimbatshimba ndo ayotona mbala kakɔ ɔtɔi ɛngɔ tshɛ kayohomba nyangiya Nzambi lakayayakimɔ le nde.—Mat. 4:10; Jni. 8:29.

10. Ngande wayokokimanyiya Jehowa l’ɔkɔngɔ wa batisimu kayɛ dia wɛ “ntetemala ndjela” Yeso?

¹⁰ Kɛnɛ kele mɛtɛ ele, ehemba mbishaka diaaso dia mɛnya dia wɛ amboyashikikɛ dia “ntetemala ndjela” Yeso. Lo nsala ngasɔ, wɛ koka ndjashikikɛ dia Jehowa ayokokimanyiya. Bible mbutaka ɔnɛ: “Nzambi ekɔ la kɔlamelo ndo nde hatetawɔ dia nyu pembama oleki kɛnɛ kakokanyu mbikikɛ, koko lam’ayonyokomɛ ohemba, nde ayonyatɛ mboka dia nyu monga l’akoka wa mbikikɛ ohemba akɔ.”—1 Kɔr. 10:13.

WOHO WA NTETEMALA NDJELA YESO

11. Naa yoho mɔtshi yoleki dimɛna ya ntetemala ndjela Yeso? (Enda ndo osato.)

¹¹ Yeso aki l’ohetoheto ndo nde akatetemala ndjasukanya la Jehowa lo dɔmbɛlɔ. (Luka 6:12) Lo mɛtɛ, yoho mɔtshi yoleki dimɛna yakokayɛ ntetemala ndjela Yeso l’ɔkɔngɔ wa batisimu ele lo ntetemala nsala awui wayokosukanya la Jehowa. Bible mbutaka ɔnɛ: “Oyadi lo yɛdikɔ yakɔna yambotohama, totetemale ntshɔ otsha la ntondo lo yoho ya dimɛna lo ndjela lokolo lakɔ laamɛ.” (Flpɛ. 3:16) Tena la tena wɛ ayohokamɛka awui wakakomɛ anangɛso l’akadiyɛso wakakotsha oyango awɔ wa mpamia olimu awɔ otsha le Jehowa. Ondo vɔ wakɔtɔ lo Kalasa k’Esambisha wa Diolelo kana wakonɔ otsha lɛnɛ ewɔ l’ohomba efula w’apandjudi. Naka wɛ koka ndjadjɛ oyango ɔsɔ, sala tshɛ kakokayɛ nsala dia mbokotsha. Ekambi wa Jehowa nomɔlomɔka dia mpamia olimu awɔ w’esambishelo. (Ets. 16:9) Kakɔna kayoyosala naka wɛ bu l’akoka wa nsala dui sɔ l’etena kɛnɛ? Tɔfɔnyake dia wɛ ekɔ l’ɛse lo ndjaɛdika l’anto wakoka nsala dui sɔ. Kɛnɛ kele ohomba ele ntetemala mbikikɛ. (Mat. 10:22) Tɔnyɔlake nɛmɔ diele la yɛ dia kambɛ Jehowa lo yoho yɔtɔnɛ l’akoka ayɛ ndo awui wele layɛ. Ɔsɔ ekɔ yoho mɔtshi y’ohomba yakokayɛ ntetemala ndjela Yeso l’ɔkɔngɔ wa batisimu.—Os. 26:1.

12-13. Kakɔna kakokayɛ nsala naka ohetoheto ayɛ wambotatɛ nkitakita? (1 Kɔrɛtɔ 9:​16, 17) (Enda ndo kiombo yele l’ɔtɛ a dui ɔnɛ: “Totetemale ndawɔ.”)

¹² Kakɔna kayoyosala naka wɛ amboka dia alɔmbɛlɔ ayɛ hawoyoya oma k’ɛse otema kana wɛ aya bu l’ɔngɛnɔngɛnɔ l’olimu ayɛ w’esambishelo oko wakiyɛ lawɔ ntondo? Kakɔna kayoyosala naka wadielo ayɛ wa Bible ɛnama diele oko hawoyokokondjiyɛ wahɔ oko wakayakondjaka ntondo? Naka awui wa ngasɔ wambokokomɛ l’ɔkɔngɔ wa batisimu kayɛ, totake dia wɛ amboshishɛ nyuma k’ekila ka Jehowa. Oko onto lele keema kokele, nsaki yayɛ koka ntshikitana tena la tena. Naka ohetoheto ayɛ wambotatɛ nkitakita, kana yimba l’ɛnyɛlɔ k’ɔpɔstɔlɔ Pɔɔlɔ. Kaanga mbakandahembe dia mbokoya Yeso, nde akeyaka dia l’etena kɛmɔtshi nde komonga la nsaki kakɔ kaamɛ oko wakinde latɔ ntondo lo tena dikina. (Adia 1 Kɔrɛtɔ 9:​16, 17.) Nde mbutaka ate: “Oyadi kaanga dimi nsala dui sɔ aha la lolango lami, dimi lekɔ la ɔkɛndɛ wakamalongola.” L’ɛtɛkɛta ekina, Pɔɔlɔ akayashikikɛ dia nkotsha olimu ande w’esambishelo oyadi woho akɔna wakandayaokaka l’etena kɛsɔ.

¹³ Woho akɔ waamɛ mbele, tetawɔke dia nsaki yayɛ yele keema kokele kokonya dia wɛ mbɔsa yɛdikɔ. Yashikikɛ dia wɛ ayosala kɛnɛ kele ɔlɔlɔ oyadi woho wayaokayɛ. Naka wɛ ntetemala nsala kɛnɛ kele ɔlɔlɔ, lo tena la tena nsaki yayɛ mbeyaka ntshikitana. Oyadi dui diakɔna tshɛ, tetemala monga la mbekelo y’amɛna ya lo nyuma yayokokimanyiya dia wɛ ntetemala ndjela Yeso l’ɔkɔngɔ wa batisimu kayɛ. Etena kayɛna ananyɔ l’akadiyɛyɛ ekikelo kayɛ lo kambɛ Jehowa, vɔ wayokeketshama.—1 Tɛs. 5:11.

“NYOTETEMALE NDJASƐDINGOLA . . . NYOTETEMALE MƐNYA WOHO W’ANTO W’ENYU”

14. Kakɔna kahombayɛ sɛdingolaka mbala la mbala ndo lande na? (2 Kɔrɛtɔ 13:5)

¹⁴ Dui sɔ diayokokimanyiya nto naka l’ɔkɔngɔ wa batisimu kayɛ wɛ ndjasɛdingolaka mbala la mbala. (Adia 2 Kɔrɛtɔ 13:5.) Tena la tena, sɛdingolaka lɔsɛnɔ layɛ la yambalo tshɛ ndo mbekelo yayɛ dia menda kana wɛ nɔmbaka lushi la lushi, mbadiaka ndo mbekaka Bible, mbɔtɔka lo nsanganya ndo ndjashaka l’esambishelo. Shola yoho mɔtshi l’awui asɔ yayoleka kokondjiyɛ wahɔ. Ɛnyɛlɔ, yaoka ambola wele oko wanɛ: ‘Onde dimi koka nembetshiya anto akina wetshelo w’etatelo w’oma lo Bible? Onde ekɔ toho tokina takokami nyomoleka ngɛnangɛna la olimu ami w’esambishelo? Onde alɔmbɛlɔ ami wekɔ wa shikaa ndo vɔ mɛnyakami dia dimi ndjaɛkɛka tshɛ lo tshɛ le Jehowa? Onde dimi mbɔtɔka mbala la mbala lo nsanganya y’Akristo? Ngande wakokami ndowanya wɔtwɛlɔ ami wa lo nsanganya ndo woshelo wa kɔmatɛrɛ?’

15-16. Wetshelo akɔna wamboyokondja oma lo kɛnɛ kakakomɛ ɔnangɛso ɔmɔtshi lo woho wakandashike ntanga la ntondo k’ohemba?

¹⁵ Wɛ pombaka nto ndjasɛdingola l’otema ɔtɔi lo kɛnɛ kendana la wɛɔdu ayɛ. Ɔnangɛso Robert kɔndɔlaka kɛnɛ kakokomɛ ndo shikikɛka mɛtɛ ka dikambo sɔ ɔnɛ: “Etena kakamakotsha ɛnɔnyi 20, lakakambaka olimu waki kɔmbɔsɛkami lushi l’otondo. Lushi lɔmɔtshi l’ɔkɔngɔ w’olimu, osekami ɔmɔtshi la l’olimu la womoto akambelɛ lakande. Nde akate dia tayonga paka dimi lande ato ndo nde aki l’eyango ekina, mbuta ate wa dimi mbeyana la nde. L’etatelo, lakashaka yema ya tɛkɛnɛndɛ, koko l’ekomelo lakayotaka nte ndooko ndo lakoolembetshiya lande na.” Robert akashike ntanga la ntondo k’ohemba ndo dui sɔ diaki dimɛna efula. Oma laasɔ, etena kakaloyande washo l’ɔkɔngɔ lo kɛnɛ kakookomɛ kɛsɔ nde akɛnyi yoho yoleki dimɛna yakandahombe nkandola dui sɔ. Nde mbetawɔka ate: “Dimi kotona l’eshikikelo tshɛ ndo mbala kakɔ ɔtɔi oko wakasale Yɔsɛfu otsha le wadi aki Pɔtifara. (Eta. 39:​7-9) Lakaambe woho waki okakatanu ɔsɔ wolo le mi dia mbotondoya. Kɛnɛ kakankomɛ kɛsɔ kakamɛnya dia lekɔ l’ohomba wa nkeketsha diɔtɔnganelo diasami la Jehowa.”

¹⁶ Wɛ mbeyaka nkondja wahɔ lo ndjasɛdingolaka woho wakasale Robert. Kaanga etena katondoyayɛ lo nshika ntanga la ntondo k’ohemba ɔmɔtshi, yambola wate: ‘Edja ka ngande kaketshi la ntondo ka dimi ndjota nte ndooko?’ Naka wɛ ekɔ lo mɛna ohomba wa nyomoleka ndjalowanya lo dui sɔ, kete tɔkɔmɔke. Ngɛnangɛna nɛ dia kakianɛ wɛ ambeya wɔdu ayɛ ɔsɔ. Dja dui diakɔ lo dɔmbɛlɔ ndo takola wanya wayokokimanyiya dia wɛ nkeketsha yɛdikɔ yayɛ ya nsɛna lo ndjela atɔndɔ wa Jehowa wendana la lɔkɛwɔ.—Os. 139:​23, 24.

17. Ngande wele kɛnɛ kakakomɛ Robert kakatombola lokombo la Jehowa?

¹⁷ Ekɔ nto dui dikina diakokaso nkondja wetshelo oma lo kɛnɛ kakakomɛ Robert. Nde tetemalaka mbuta ate: “L’ɔkɔngɔ wa dimi ntona leeta lakambelɛ osekami la l’olimu, womoto akɔ akambutɛ ate: ‘Wɛ ambotondoya ohemba!’ Lakawombola kɛnɛ kakandalange mbuta. Womoto akɔ akanembetshiya dia osekande ɔmɔtshi, laki ntondo Ɔmɛnyi, akawotɛ dia ɛlɔngɔlɔngɔ l’esekaseka tshɛ w’Ɛmɛnyi wa Jehowa sɛnaka lɔsɛnɔ la dungi pende ndo naka vɔ wambotana diaaso vɔ salaka kɛnɛ kele kɔlɔ. Ko womoto akɔ akatɛ osekande dia nde ayohemba dui sɔ le mi. L’ɔkɔngɔ wa nshihodia dui sɔ laki l’ɔngɛnɔngɛnɔ lo ndjashikikɛ polo lo yɛdikɔ yakɔna yakamatombola lokombo la Jehowa.”

18. Kakɔna kamboyoyashikikɛ dia nsala l’ɔkɔngɔ wa batisimu kayɛ? (Enda ndo kiombo yele l’ɔtɛ a dui ɔnɛ: “Asawo ahende wayonyɔngɛnangɛna la wɔ.”)

¹⁸ Etena kayakimɔyɛ le Jehowa ndo kalongolayɛ batisimu, wɛ mɛnyaka dia wɛ kombolaka nkidia lokombo lande oyadi kakɔna kayotomba. Ndo wɛ koka monga l’eshikikelo dia Jehowa mbeyaka ehemba wahomana la yɛ ndo woho washikayɛ ntanga l’ehemba akɔ. Nde ayɔtshɔkɔla welo ayɛ wa ntetemala ntshikala la kɔlamelo. Wɛ koka ndjashikikɛ dia lo tshimbo ya nyuma kande k’ekila, nde ayokoka kosha wolo wa nsala dui sɔ. (Luka 11:​11-13) L’ekimanyielo ka Jehowa, wɛ ayonga l’akoka wa ntetemala ndjela Yeso l’ɔkɔngɔ wa batisimu kayɛ.