BIBLIƆTƐKƐ WA LO ƐTƐRNƐTƐ wa Watchtower
Watchtower
BIBLIƆTƐKƐ WA LO ƐTƐRNƐTƐ
Ɔtɛtɛla
  • BIBLE
  • EKANDA
  • NSANGANYA
  • w24 Ngɔndɔ ka dikumi lk. 12-17
  • Tokondja wetshelo oma lo nshi 40 y’ekomelo ya Yeso lanɛ la nkɛtɛ

Ndooko vidɛo yele lo kɛnɛ kɔsɔnyiyɛ.

Otokimwe, munga kakongi etena kakayatelesharjɛki vidɛo.

  • Tokondja wetshelo oma lo nshi 40 y’ekomelo ya Yeso lanɛ la nkɛtɛ
  • Tshoto y’Etangelo Mbewoyaka Diolelo diaki Jehowa (wekelo)—2024
  • Ɛtɛ w'awui wahɔnyi
  • Awui wa woho akɔ
  • KEKETSHA ANTO AKINA
  • KANA YIMBA L’AFUNDELO
  • KIMANYIYA ANANGƐSO DIA VƆ NKOMA “APAMI WELE OKO WESHASHA”
  • Okoya ohetoheto wa Yeso l’olimu w’esambishelo
    Tshoto y’Etangelo Mbewoyaka Diolelo diaki Jehowa (wekelo)—2025
  • Onga l’ɔngɛnɔngɛnɔ w’efula waya lo mbisha
    Tshoto y’Etangelo Mbewoyaka Diolelo diaki Jehowa (wekelo)—2024
  • Tɛdikɔ tɛnya dia sho ndjaɛkɛka le Jehowa
    Lɔsɛnɔ ndo olimu aso w’Okristo​—Dikatshi dia losanganya​—2023
  • Anangɛso le​—Onde nyekɔ lo nkotsha kɛnɛ kalɔmbama dia nkamba oko dikumanyi?
    Tshoto y’Etangelo Mbewoyaka Diolelo diaki Jehowa (wekelo)—2024
Enda awui akina
Tshoto y’Etangelo Mbewoyaka Diolelo diaki Jehowa (wekelo)—2024
w24 Ngɔndɔ ka dikumi lk. 12-17

SAWO DIA WEKELO 41

OSAMBO 13 Kristo ekɔ Ɛnyɛlɔ kaso

Tokondja wetshelo oma lo nshi 40 y’ekomelo ya Yeso lanɛ la nkɛtɛ

“Vɔ wakawɛnyi l’edja ka nshi 40 ndo nde akatɛkɛtaka akambo wendana la Diolelo dia Nzambi.”—ETS. 1:3.

KƐNƐ KAYOTEKA

Woho wakokaso mbokoya ɛnyɛlɔ kakatshike Yeso lo nshi 40 yande y’ekomelo lanɛ la nkɛtɛ.

1-2. Kakɔna kakatombe etena kakatatshɔka ambeki ahende wa Yeso otsha la Emayo?

TEKƆ lo Nisana 16, 33 T.D. Ambeki wa Yeso waki la lɔkɔnyɔ ndo la wɔma. Ahende l’atei awɔ wakamɔ oma la Jerusalɛma otsha la Emayo, ngielongelo yaki mangana kilɔmɛtrɛ 11 la Jerusalɛma. Apami asɔ wakakɔmɔ l’ɔtɛ wakawadiake Yeso, pami kakawatayelaka. Vɔ waki l’elongamelo dia Mɛsiya ayowasalɛ akambo efula, koko kakianɛ nde ambovɔ. Koko dui dia diambo efula diaki suke la nkomɛ apami asɔ.

2 Pami kɛmɔtshi akaye lalewɔ ndo akatatɛ nkɛndakɛnda kaamɛ la wɔ. Ambeki wakatatɛ mbotɛ lonyangu laki la wɔ l’ɔtɛ wa dui dia kɔlɔ diakakomɛ Yeso. Pami kakɔ akatatɛ mbatɛ akambo wakiwɔ kokoka mbohɛ pondjo. “Ntatɛ oma le Mɔsɛ ndo Amvutshi tshɛ,” nde akalembetshiya lande na kakahombe Mɛsiya nsowa ndo mvɔ. Etena kakakome apami akɔ asato la Emayo, pami kakɔ akawatɛ aakinde, mbuta ate Yeso lakoolɔ! Ande ɔngɛnɔngɛnɔ wakakoke monga l’ambeki lo mbeya dia Mɛsiya aki la lɔsɛnɔ lee!—Luka 24:​13-35.

3-4. Kakɔna kakakomɛ ambeki wa Yeso ndo kakɔna kayotɔsɛdingola lo sawo nɛ? (Etsha 1:3)

3 Yeso akɛnama le ambeki ande mbala ko mbala l’edja ka nshi 40 yande y’ekomelo lanɛ la nkɛtɛ. (Adia Etsha 1:3.) L’etena kɛsɔ, ɔkɛyi ndo wɔma waki l’ambeki wa Yeso wakakadimɔ ɔngɛnɔngɛnɔ, ndo wakayashikikɛ la dihonga tshɛ dia nsambisha awui wendana la Diolelo.a

4 Sho kako nkondja wetshelo lo mbeka kɛnɛ kakasale Yeso l’etena kɛsɔ. Lo sawo nɛ, tayɛna woho wakakambe Yeso la etena kɛsɔ 1) dia nkeketsha ambeki ande, 2) dia mfudia eokelo kawɔ k’Afundelo ndo 3) dia mbalowanya dia vɔ mɛmba ɛkɛndɛ wa weke. Lo dikambo la dikambo, tayɛna woho wakokaso mbokoya ɛnyɛlɔ ka Yeso.

KEKETSHA ANTO AKINA

5. Lande na kaki ambeki wa Yeso l’ohomba w’ekeketshelo?

5 Ambeki wa Yeso waki l’ohomba w’ekeketshelo. Lande na? Amɔtshi wakatshike ngelo yawɔ, nkumbo yawɔ ndo elimu awɔ l’oyango wa ndjela Yeso lɛnɛ tshɛ akandatatshɔɔka. (Mat. 19:27) Amɔtshi wakasɔkishama l’ɔtɛ wakawakome ambeki wa Yeso. (Jni. 9:22) Vɔ wakayahondja ngasɔ nɛ dia vɔ waketawɔ dia Yeso mbaki Mɛsiya wakalakema. (Mat. 16:16) Koko lam’akandadiakema, elongamelo kawɔ kakashishɔ ndo vɔ wakakɔmɔ.

6. Kakɔna kakasale Yeso l’ɔkɔngɔ wa eolwelo kande?

6 Aha la taamu, Yeso kɔmbɔsa ɔkɛyi w’ambeki ande oko wɔɔdu wa lo nyuma koko aki l’ɔtɛ wakandavu. Diakɔ diele oma ko lushi lakandolɔ, nde akatatɛ nkeketsha ambeki ande. Ɛnyɛlɔ, nde akɛnama le Mariya w’ose Mangadala etena kakandalelaka la diombo diande. (Jni. 20:​11, 16) Nde akɛnama nto le ambeki ahende wakatatɛkɛtshi l’etatelo ka sawo nɛ. Ndo nde akɛnama le ɔpɔstɔlɔ Petero. (Luka 24:34) Kakɔna kakokaso mbeka oma l’ɛnyɛlɔ ka Yeso? Tɔsɛdingole kɛnɛ kakatombe etena kakandɛnama mbala ka ntondo.

7. Oko wɔkɔndwamidiɔ lo Joani 20:​11-16, kakɔna kakɛnyi Yeso Mariya asala la pindju ka pɛɛ lo Nisana 16, ndo kakɔna kakandoosalɛ? (Enda ndo osato.)

7 Adia Joani 20:​11-16. La pindju ka pɛɛ lo Nisana nshi 16, djui ya wamato wa kɔlamelo wakatshu lɛnɛ akawakundɛ Yeso. (Luka 24:​1, 10) Nyɛsɔ tɔsɛdingole kɛnɛ kakakomɛ ɔmɔtshi la l’atei awɔ, mbuta ate Mariya w’ose Mangadala. Etena kakakome Mariya la diombo, nde akatane dia diɔ diaya hwe. Nde akalawɔ dia totɛ Petero la Joani ndo vɔ wakalawɔ otsha lo diombo ndo nde akaayele. L’ɔkɔngɔ wa vɔ mbishola dia diombo diaya hwe, apami akɔ wakakalola otsha la ngelo. Koko Mariya kokalola. Nde akatshikala laawɔ alela. Nde kombeyaka dia Yeso akawendaka. Nde akɛnaka woho wakakɛdiaka womoto la kɔlamelo ɔsɔ asɔyi ndo akanandema lo yɛdikɔ y’efula. Ɔnkɔnɛ nde akɛnama le Mariya ndo oma laasɔ, nde akasale dui dimɔtshi diakookeketsha efula. Nde akatɛkɛta la nde ndo akawosha ɔkɛndɛ w’ohomba efula, mbuta ate mbewoya losango la eolwelo kande le anango.—Jni. 20:​17, 18.

Yeso lakolwama atɛkɛta la Mariya w’ose Mangadala l’andja wa diombo diele hwe.

Okoya Yeso lo sɛdingolaka ndo lo mbokaka wanɛ wambɔkɔmɔ kɛtshi. (Enda odingɔ 7)


8. Ngande wakokaso mbokoya Yeso?

8 Ngande wakokaso mbokoya Yeso? Sho koka nsala awui efula dia nkimanyiya anangɛso l’akadiyɛso dia ntetemala kambɛ Jehowa naka, l’ɛnyɛlɔ ka Yeso, sho mbidja yimba l’ekiyanu awɔ ndo ntɛkɛta la wɔ la kɛtshi. Tɔsɛdingole kɛnɛ kakakomɛ kadiyɛso kelɛwɔ Jocelyn, lele kadiyɛnde akavu l’aksida. Nde mbutaka ate: “Lakadiɛnɛka la lɔkɔnyɔ l’edja ka ngɔndɔ efula ndo lakayaokaka kɔlɔ l’etena k’otale.” Koko, atshukanyi amɔtshi wakawelɛ lakawɔ, wakoohokamɛ la kɛtshi tshɛ ndo wakooshikikɛ dia nde ekɔ la nɛmɔ lo washo wa Nzambi. Jocelyn mbutaka ate: “Lakooke oko Jehowa akakambe la wɔ dia shimbɛmi. Vɔ wakakimanyiya dia dimi nyomonga la nsaki ka kambɛ Jehowa.” Sho lawɔ koka nkeketsha anto akina lo mbahokamɛka la yambalo tshɛ etena katɔkɛnɛmɔlɛwɔ nsaki yele l’etema awɔ ndo lo ntɛkɛta la wɔ la kɛtshi tshɛ l’oyango wa mbakeketsha dia vɔ ntetemala kambɛ Nzambi.—Rɔmɔ 12:15.

KANA YIMBA L’AFUNDELO

9. Okakatanu akɔna wakahomana l’ambeki wa Yeso ndo ngande wakandaakimanyiya?

9 Ambeki wa Yeso waketawɔ Ɔtɛkɛta wa Nzambi ndo wakasale la wolo tshɛ dia nkamba la wɔ lo lɔsɛnɔ lawɔ. (Jni. 17:6) Koko nyɔi ka Yeso oko ondjakanyi l’otamba w’asui, kakawadje l’okandokando. Yeso akeyaka dia ambeki ande waki la mbetawɔ ndo wakalangaka Jehowa koko nde akɛnyi dia vɔ waki l’ohomba wa nshihodia Afundelo dimɛna. (Luka 9:​44, 45; Jni. 20:9) Diakɔ diakandawaetsha dia vɔ kanaka yimba l’Afundelo. Tɔsɛdingole woho wakandasale dui sɔ etena kakandɛnama le ambeki ande ahende lo mboka k’otsha la Emayo.

10. Ngande waketawoya Yeso ambeki ande dia nde mbaki mɛtɛ Mɛsiya? (Luka 24:​18-27)

10 Adia Luka 24:​18-27. Tolembete dia Yeso kombatɛ mbala kakɔ ɔtɔi woho w’onto wakinde. Lo dihole dia nsala ngasɔ, nde akawaoke ambola. Lande na? Ondo nde akalange dia vɔ nkɛnɛmɔla kɛnɛ kaki lo yimba ndo l’etema awɔ. Ndo kɛsɔ mbakawasale. Vɔ wakawotɛ dia vɔ wakalongamɛka dia Yeso monga Nkumekanga k’Isariyɛlɛ ndo mbatshungola oma lo lɔhɔmbɔ l’ase Rɔmɔ. L’ɔkɔngɔ wa vɔ nkɛnɛmɔla tokanyi tawɔ, Yeso akakambe l’Afundelo dia mbakimanyiya dia nshihodia kɛnɛ kakete.b Yema tshitshɛ la dikɔlɔ sɔ, nde akɔshi yema y’etena dia nembetshiya ambeki ande akina akambo wa mɛtɛ asɔ. (Luka 24:​33-48) Kakɔna kakokaso mbeka oma l’ɔkɔndɔ ɔnɛ?

11-12. a) Wetshelo akɔna wakokaso nkondja lo yoho yaketsha Yeso akambo wa mɛtɛ wa lo Bible? (Enda ndo esato.) b) Ngande wakakimanyiyama Nortey oma le ombetsha ande wa Bible?

11 Ngande wakokaso mbokoya Yeso? Ntondotondo, etena kekaso l’ambeki aso Bible, okawɔ ambola wa l’ɔkɔmi l’oyango wa nkɛnɛmɔla tokanyi ndo nsaki yele l’etema awɔ. (Tok. 20:5) L’ɔkɔngɔ wa wɛ nshihodia woho wayaokawɔ, ɛnyawɔ woho wa vɔ ntana avɛsa amɔtshi shikaa wakoka mbakimanyiya l’akambo wele la wɔ. Ewɔ dia mbatɛ kɛnɛ kahombawɔ nsala. Koko, kimanyiyawɔ dia vɔ nkana yimba l’Afundelo ndo nshihodia woho wakokawɔ nkamba l’atɔndɔ wa lo Bible lo lɔsɛnɔ lawɔ. Tɔsɛdingole kɛnɛ kakakomɛ ɔnangɛsɔ ɔmɔtshi ladjasɛ lo wodja wa Ghana lelɛwɔ Nortey.

12 Etena kaki Nortey l’ɛnɔnyi 16, nde akatatɛ mbeka Bible. Koko kombeta edja, ase nkumbo kande wakatatɛ mbɔlɔsha. Kakɔna kakookimanyiya dia nshika ntanga? Ombetsha ande wa Bible akookimanyiya lo nkamba la Mateo tshapita ya 10 dia mbɛɛnya di’Akristo wa mɛtɛ wayɔhɛnyahɛnyama. Nortey mbutaka ate: “Etena kakatatɛ ɛhɛnyɔhɛnyɔ, laki l’eshikikelo dia lakashola akambo wa mɛtɛ.” Ombetsha ande wa Bible akookimanyiya nto dia nkana yimba la Mateo 10:16 l’oyango wa nde monga la yewo ndo la dilɛmiɛlɔ etena katɛkɛtawɔ akambo w’ɔtɛmwɛlɔ lo nkumbo kawɔ. L’ɔkɔngɔ wa batisimu kande, Nortey akalange nkamba olimu w’ombatshi mboka, koko she akalongamɛka dia nde mbɔtɔ l’inivɛrsite. Lo dihole dia mbutɛ Nortey kɛnɛ kakandahombe nsala, ombetsha ande akakambe la ambola dia mbokimanyiya dia nde nkana yimba l’atɔndɔ wa lo Bible. Etombelo akɔna waki la dui sɔ? Nortey akɔshi yɛdikɔ ya nde nkamba olimu wa lo tena tshɛ. She akawotshanya oma la ngelo. Ngande wakahombe Nortey ndjaoka l’ɔtɛ w’akambo wakookomɛ asɔ? Nde mbutaka ate: “Lekɔ l’eshikikelo dia lakasale ɔsɔnwɛlɔ wa dimɛna.” Etena kakimanyiyaso anto akina dia vɔ nkana yimba l’Afundelo, sho koka mbakimanyiya dia vɔ nkoma Akristo wambotshunda.—Ɛf. 3:​16-19.

Esato womamatanyi: 1. Ɔnangɛso ɔmɔtshi ekokana yimba la pami kɛmɔtshi la divɛsa dimɔtshi dia lo Bible etena kekawɔ. 2. Pami kakɔ akasha alɛmbɔlɛmbɔ ande wendana la fɛtɛ ka Nɔɛlɛ.

Okoya Yeso lo nkimanyiya anto akina dia vɔ kanaka yimba l’Afundelo (Enda odingɔ 11)e


KIMANYIYA ANANGƐSO DIA VƆ NKOMA “APAMI WELE OKO WESHASHA”

13. Kakɔna kakasale Yeso dia ndjaashikikɛ di’olimu wa She ntetemala kambema l’ɔkɔngɔ wa nde nkalola otsha l’olongo? (Ɛfɛsɔ 4:8)

13 Etena kakinde la nkɛtɛ, Yeso akakotsha lo yoho ya kokele olimu wakawosha She dia nsala. (Jni. 17:4) Koko Yeso komonga la kanyi y’ɔnɛ, ‘naka wɛ nangaka nsala dikambo dimɔtshi dimɛna, kete wɛ pombaka disala wɛmɛ.’ L’edja k’ɛnɔnyi esato l’etenyi w’olimu ande la nkɛtɛ, nde akalowanya anto akina dia vɔ nkamba olimu. La ntondo ka nde nkalola l’olongo, Yeso akasha ambeki ande wele amɔtshi waki l’ɛnɔnyi akumi ahende l’ɛmɔtshi, ɔkɛndɛ wa nkokɛ ɛkɔkɔ wa Jehowa ndo mbalɔmbɔla l’olimu w’esambishelo ndo wa wetshelo. (Adia Ɛfɛsɔ 4:8.) Ngande wakakambe Yeso la nshi 40 yande y’ekomelo dia nkimanyiya apami wakayakimɔ waki la kɔlamelo ndo wakakambaka olimu efula dia nkoma “apami wele oko weshasha”?—Ɛfɛsɔ 4:8.

14. Ngande wakakimanyiya Yeso ambeki dia mpama lo nyuma l’etena ka nshi 40 yande y’ekomelo lanɛ la nkɛtɛ? (Enda ndo osato.)

14 Yeso akasha ambeki ande alako wokɛma hwe koko wa la ngandji. Ɛnyɛlɔ, nde akɛnyi dia amɔtshi l’atei awɔ waki la taamu ko nde akaalake. (Luka 24:​25-27; Jni. 20:27) Nde akawaɛnya ohomba wa ndeka ndjasha l’olimu wa nkokɛ ɛkɔkɔ lo dihole dia ndjasha l’elimu wa l’emunyi. (Jni. 21:15) Nde akawaohola diaha mbika washo lo dikambo di’ɛkɛndɛ wakahombe anto akina monga la wɔ l’olimu wa Jehowa. (Jni. 21:​20-22) Ndo nde akangola tokanyi ta kɔlɔ taki la wɔ lo dikambo dia Diolelo ndo akaakimanyiya dia vɔ ndjasha l’esambishelo ka lokumu l’ɔlɔlɔ. (Ets. 1:​6-8) Wetshelo akɔna wakoka nkondja dikumanyi oma le Yeso?

Yeso atɛkɛta l’ambeki ande l’omamu wa ndjale etena kafumbawɔ nse.

Okoya Yeso lo nkimanyiya apami dia vɔ monga l’akoka wa mɛmba ɛkɛndɛ ekina (Enda odingɔ wa 14)


15-16. a) Lo toho takɔna takoka dikumanyi mbokoya Yeso? Lembetshiya. b) Wahɔ akɔna wakakondja Patrick oma lo dako?

15 Ngande wakoka dikumanyi mbokoya Yeso? Vɔ pombaka ndowanya ndo nkimanyiya apami, mbidja ndo wanɛ weke ɛlɔngɔlɔngɔ dia vɔ monga l’akoka wa mɛmba ɛkɛndɛ wa weke.c Dikumanyi hawokoke nongamɛ dia wanɛ walowanyawɔ nkoma kokele. Vɔ pombaka mbasha alako wa la ngandji l’oyango w’ɛlɔngɔlɔngɔ ɛsɔ nkondja diewo ndo mɛna ohomba wa monga l’okitshakitsha, kɔlamelo ndo monga suke dia kambɛ anto akina.—1 Tim. 3:1; 2 Tim. 2:2; 1 Pe. 5:5.

16 Tɔsɛdingole ɛnyɛlɔ k’ɔnangɛso Patrick lakakondja wahɔ oma lo dako. Oko ɔlɔngɔlɔngɔ, nde akatondjanɛka ɛtɛkɛta wa kɔlɔ ndo akasalɛka kaanga akadiyɛso akambo l’epetenge. Ekumanyi kɛmɔtshi kambotshunda lo nyuma akɛnyi wɔdu waki Patrick ndo akawosha dako dia dimɛna ndo diosembwe tɔɔ. Patrick mbutaka ate: “Lekɔ l’ɔngɛnɔngɛnɔ lo woho wakandasale ngasɔ. Lakakɔmɔka etena kakamɛnaka anangɛso akina walongola ɛkɛndɛ wakamakombolaka. Koko dako di’ekumanyi kɛsɔ diakakimanyiya dia mɛna ohomba wa kambɛ anangɛso l’akadiyɛso l’okitshakitsha tshɛ lo dihole dia nongamɛ dia nkondja ɛkɛndɛ kana ahole wa lokumu l’etshumanelo.” Etombelo waki la dui sɔ ele, Patrick akayɔsɔnamaka oko ekumanyi etena kakinde l’ɛnɔnyi 23.—Tok. 27:9.

17. Ngande wakɛnya Yeso dia nde akayaɛkɛka le ambeki ande?

17 Yeso akasha ambeki ande ɔkɛndɛ aha paka wa nsambisha oto koko ndo wa mbetsha. (Mat. 28:20.) Ambeki waki Yeso wakakoke ndjaoka dia vɔ bu l’akoka wa mɛmba ɔkɛndɛ ɔsɔ. Koko Yeso komonga la taamu di’ɔnɛ vɔ koka nsala olimu ɔsɔ ndo nde akawatɛ dui sɔ. Lo ndjaɛkɛ tshɛ le wɔ, Yeso akate ate: “Oko wakantome Papa, dimi lawɔ lambonyotoma.”—Jni. 20:21.

18. Ngande wakoka dikumanyi mbokoya Yeso?

18 Ngande wakoka dikumanyi mbokoya Yeso? Dikumanyi diambohokɔ akambo ndowanyaka anto akina dia vɔ mɛmba ɛkɛndɛ. (Flpɛ. 2:​19-22) Ɛnyɛlɔ, dikumanyi koka ndowanya ɛlɔngɔlɔngɔ dia mbishaka lonya l’osolelo ndo l’ɔlɔngɔswɛlɔ wa Mbalasa ka Diolelo. L’ɔkɔngɔ wa mbisha olimu ɔmɔtshi, vɔ koka mɛnya dia vɔ ndjaɛkɛka le anto wakawasha ɛkɛndɛ akɔ dia mɛmba lo mbalowanya ndo lo ndjaɛkɛ le wɔ ɔnɛ vɔ koka nkamba elimu akɔ dimɛna. Ekumanyi keke oma la nsɔnama kelɛwɔ Matthew mbutaka dia nde mandolaka dikumanyi diambohokɔ akambo diawolowanya dimɛna dimɛna dia nkotsha ɔkɛndɛ ndo woho wayaɛkɛwɔ le nde dia nkotsha ɔkɛndɛ akɔ. Nde mbutaka ate: “Lakakondjaka wahɔ etena kakawɔsaka wandja wakamasalaka oko etenyi kɛmɔtshi k’olowanyelo ndo wandja asɔ wakakimanyiyaka dia dimi ndjaalowanya.”d

19. Kakɔna kahombaso ndjaashikikɛ dia nsala?

19 Yeso akakambe la nshi 40 yande y’ekomelo lanɛ la nkɛtɛ dia nkeketsha, mbetsha ndo ndowanya anto akina. Sho koka ndjashikikɛ dia ndjela ɛnyɛlɔ kande nna lo nna. (1 Pe. 2:21) Nde ayotokimanyiya dia nsala dui sɔ. Laadiko dia laasɔ, nde akatolake ate: “Dimi lekɔ la nyu nshi tshɛ polo l’etena k’ekomelo ka dikongɛ di’akambo.”—Mat. 28:20.

NGANDE WAKAKAMBE YESO LA NSHI 40 YANDE Y’EKOMELO LANƐ LA NKƐTƐ . . .

  • dia nkeketsha anto akina?

  • dia mbetsha anto akina dia nkana yimba l’Afundelo?

  • dia ndowanya apami dia monga l’akoka wa mɛmba ɛkɛndɛ wa weke?

OSAMBO 15 Totombole Ɔnaki Jehowa l’enondo

a Evanjiliɔ ndo abuku akina wa lo Bible kɔndɔlaka waaso efula wakɛnama Yeso etena kakandolɔ le anto akina ɛnyɛlɔ oko: Le Mariya w’ose Mangadala (Jni. 20:​11-18); le wamato akina (Mat. 28:​8-10; Luka 24:​8-11); le ambeki 2 (Luka 24:​13-15); le Petero (Luka 24:34); le apɔstɔlɔ etena kaki Tɔma komonga laawɔ (Jni. 20:​19-24); le apɔstɔlɔ etena kaki ndo Tɔma laawɔ (Jni. 20:26); le ambeki 7 (Jni. 21:​1, 2); le ambeki ndekana 500 (Mat. 28:16; 1 Kɔr. 15:6); le Jakɔba y’ɔnango (1 Kɔr. 15:7); le apɔstɔlɔ tshɛ (Ets. 1:4); ndo le apɔstɔlɔ suke la Bɛtaniya. (Luka 24:​50-52) Nde akɛnama tena dikina le ambeki ande, koko Bible hakɔndɔla.—Jni. 21:25.

b Dia ntana listɛ la prɔfɛsiya yendana la Mɛsiya, enda lo jw.org sawo diele l’ɔtɛ a dui ɔnɛ: “Onde prɔfɛsiya yendana la Mɛsiya mɛnyaka dia Yeso mbaki Mɛsiya?”

c Lo tena dimɔtshi, apami wele l’akoka wele l’ɛnɔnyi lam’asa 25 la 30 koka sɔnama oko emendji w’etshimbedi. Koko apami asɔ pombaka ntondo nkamba wolo dia monga la diewo oko dikumanyi.

d Dia ntana alako akina wa woho wa nkimanyiya ɛlɔngɔlɔngɔ dia vɔ monga l’akoka wa mɛmba ɛkɛndɛ, adia sawo diele lo Tshoto y’Etangelo ya Ngɔndɔ k’enanɛi 2018 lk. 11-12, od. 15-17, ndo sawo diele lo Tshoto y’Etangelo ya Ngɔndɔ ka nɛi 15, 2015, lk. 3-13.

e ELEMBETSHIELO W’OSATO WA LO: L’ɔkɔngɔ wa vɔ mbokimanyiya dia nkana yimba la divɛsa, ombeki wa Bible ambɔsa yɛdikɔ ya mbikasha alɛmbɔlɛmbɔ wa fɛtɛ ka Nɔɛlɛ.

    Ekanda wa l’Ɔtɛtɛla (1983-2025)
    Tomba
    Ɔtɔ
    • Ɔtɛtɛla
    • Kahana l'onto
    • Nango
    • Copyright © 2025 Watch Tower Bible and Tract Society of Pennsylvania
    • Ɛlɛmbɛ w'okambelo
    • Awui wa sheke
    • Paramètres de confidentialité
    • JW.ORG
    • Ɔtɔ
    Kahana l'onto