Ambutshi le—Nyokimanyiya ananyu dia monga la mbetawɔ ka wolo

1-2. Kakɔna kahomba ambutshi salɛ ɔnawɔ looka ambola wendana la waetawɔ aso wohikami lo Bible?

ANTO efula mbetawɔka dia monga ombutshi ekɔ olimu wa wolo. Naka wɛ ekɔ l’ɔna leke dikɛnda, kete sho kaandolaka lo welo wadjayɛ dia mbokimanyiya dia nde monga la mbetawɔ ka wolo le Jehowa. (Eoh. 6:​6, 7) Etena katole ɔnayɛ, nde mbeyaka mboka ambola efula wendana la waetawɔ aso w’oma lo Bible mbidja ndo atɔndɔ wendana la lɔkɛwɔ watanema lo Bible.

² L’etatelo, wɛ mbeyaka ndjakiyanya lo dikambo dia ambola woka ɔnayɛ. Wɛ mbeyaka ndjɔsa ambola asɔ oko djembetelo yɛnya diele oko nde bu la mbetawɔ le Nzambi. Koko lo mɛtɛ, etena katoole ana, vɔ wekɔ l’ohomba wa mboka ambola dia nkeketsha waetawɔ awɔ. (1 Kɔr. 13:11) Laasɔ kɛsɔ hakoke kootsha wɔma. Wɛ koka mbɔsa ambola w’oma k’ɛse otema woka ɔnayɛ asɔ wendana la waetawɔ aso oko waaso wa mbokimanyiya dia mfudia akoka ande w’ekanelo ka yimba.

3. Kakɔna kayotɔsɛdingola lo sawo nɛ?

³ Lo sawo nɛ, tayɔsɛdingola woho wakoka ambutshi nkimanyiya ɔnawɔ kana anawɔ dia: 1) Mfudia waetawɔ awɔ, 2) mbɔsa la nɛmɔ atɔndɔ wa lo Bible wendana la lɔkɛwɔ ndo 3) mamɛ waetawɔ awɔ. Etena katatasɛdingola dui sɔ, tayɛna awui amɔtshi w’amɛna wele lo ambola woka ana, ndo awui amɔtshi wa lo nkumbo wakoka mbisha ambutshi diaaso dia nsawola la wɔ awui wendana la waetawɔ w’Okristo.

KIMANYIYA ƆNAYƐ DIA NKEKETSHA WAETAWƆ ANDE

4. Ambola akɔna wakoka ɔnayɛ mimbola, ndo lande na?

⁴ Ambutshi w’Akristo shihodiaka ɔnɛ monga la mbetawɔ le Nzambi bu dui diakoka ana mbotɔ la diɔ. Wɛ kombotɔ la mbetawɔ le Jehowa. Ndo ngasɔ mbediɔ le anayɛ. Laasɔ, ɔnayɛ mbeyaka ntatɛ mboka ambola wele oko: ‘Ngande wakokami mbeya ɔnɛ Nzambi ekɔ? Onde dimi koka mbetawɔ kɛnɛ kata Bible?’ Lo mɛtɛ, Bible tokeketshaka dia nkamba la “akoka [aso] w’ekanelo ka yimba” ndo dia ‘nsɛdingola akambo tshɛ.’ (Rɔmɔ 12:1; 1 Tɛs. 5:21) Ko laasɔ, ngande wakokayɛ nkimanyiya ɔnayɛ dia nde nkeketsha mbetawɔ kande?

5. Kakɔna kakoka ambutshi nsala dia nkimanyiya ɔnawɔ dia monga la mbetawɔ lo Bible? (Rɔmɔ 12:2)

⁵ Keketsha ɔnayɛ dia ndamɛ mbishola akambo wa mɛtɛ. (Adia Rɔmɔ 12:2.) Etena kooka ɔnayɛ ambola, kamba la diaaso sɔ dia mbɛnya woho wa ntana ekadimwelo lo nkamba la dihomɔ di’eyangelo diele oko Index des publications des Témoins de Jéhovah ndo Dibuku di’eyangelo di’Ɛmɛnyi wa Jehowa. Lo dibuku di’eyangelo sɔ lo ɔtɛ a dui “Bible,” nde koka menda “Kakasambiyama oma le Nzambi” dia mɛna dia Bible bu tsho dibuku diakafundama oma le anto. Koko diɔ diekɔ “Ɔtɛkɛta wa Nzambi.” (1 Tɛs. 2:13) Ɛnyɛlɔ, nde koka nsala eyangelo lo dikambo di’osomba w’edjedja w’ase Asuriya wa la Niniva lo ekanda aso. Lo nshi y’edjedja, waa nomb’ewo mɔtshi wakate di’osomba wa Niniva komonga. Koko l’ɛnɔnyi wa 1850, wakayosholaka emindo wa diangɔ diaki l’osomba ɔsɔ l’ɛse ka nkɛtɛ, dui diɛnya di’ɔkɔndɔ wa lo Bible ɔsɔ wekɔ mɛtɛ. (Zɛf. 2:​13-15) Dia mbeya woho wakakotsha elanyelo ka Niniva prɔfɛsiya ka lo Bible, nde mbeyaka menda sawo diele l’ɔtɛ a dui ɔnɛ: “Onde wɛ akeyaka?” lo numɛlɔ ka Tshoto y’Etangelo ya Ngɔndɔ ka dikumi l’ɔtɔi 2021. Lo mbɛdika kɛnɛ kamondeka oma l’ekanda aso la kɛnɛ kamondeka oma lo Ansiklopedi ndo lo awui akina, ɔnayɛ ayonga l’akoka wa mfudia mbetawɔ kande lo kɛnɛ kata Bible.

6. Ngande wakoka ambutshi nkeketsha akoka w’ekanelo ka yimba k’ɔnawɔ? Sha ɛnyɛlɔ. (Enda ndo osato.)

⁶ Keketsha akoka w’ɔnayɛ w’ekanelo ka yimba. Ambutshi wekɔ la waaso wotshikitanyi dia nsawola asawo wakeketsha l’ɔnawɔ lo dikambo dia Bible kana lo kɛnɛ kendana la monga la mbetawɔ le Nzambi. Waaso asɔ koka monga l’etena kembolawɔ mize kɛmɔtshi, jardɛ, kana lo wembwelo wa Bɛtɛlɛ kɛmɔtshi k’Ɛmɛnyi wa Jehowa. Ɛnyɛlɔ, etena katanyembola mize kɛmɔtshi okoko l’okoko kana lo tshimbo y’esato, wɛ koka nkotola yambalo y’ɔnayɛ lo ɛkɔndɔ ɛmɔtshi kana lo diangɔ dimɔtshi diakoka nkeketsha mbetawɔ kande ɔnɛ Bible kekɔ mɛtɛ. Onde ɔnayɛ mbeyaka lokombo la Nzambi latanema lo dive diaya ɛnɔnyi 3000 dielamɛ Dive di’ase Mɔaba? Dive di’ase Mɔaba sɔ, tanemaka lo mize ka la Louvre l’osomba wa Paris, la France. Ndo nto, ɛnyɛlɔ ka Dive di’ase Mɔaba sɔ diekɔ lo tanema lo mize “Bible ndo lokombo la Nzambi” katanema lo Mbalasa kalɔmbɔla olimu w’Ɛmɛnyi wa Jehowa l’andja w’otondo ka la Warwick, la New York. Dive di’ase Mɔaba sɔ mbutaka dia Nkumekanga Mesha ka Mɔaba akatɔmbɔkwɛ Isariyɛlɛ. Ndo kɛsɔ mbɔtɔnɛka la kɛnɛ kata Bible. (2 Nku. 3:​4, 5) Etena kɛna ɔnayɛ la washo ande awui wa mɛtɛ wa lo Bible, mbetawɔ kande keketalaka.—Ɛdika la 2 Ɛkɔndɔ 9:6.

7-8. a) Kakɔna kakokaso mbeka oma lo diangɔ di’elangala diele lo etongelo? Sha ɛnyɛlɔ. (Enda ndo osato.) b) Ambola akɔna wakoka nkimanyiya ɔnayɛ dia nkeketsha mbetawɔ kande le Otungi?

⁷ Keketsha ɔnayɛ dia kanaka yimba la etongelo. Etena katanyakɛndakɛnda l’okonda kana lo jardɛ, kotola yambalo y’ɔnayɛ lo diangɔ dia diambo diakoka mɛnama lo etongelo. Lande na? Nɛ dia diangɔ sɔ kɛnɛmɔlaka yimba ndo lomba l’Otungi adiɔ. Ɛnyɛlɔ asango amɔtshi wele oko ɛkɔlɔ welɛwɔ spirale wakekama l’edja k’ɛnɔnyi efula oma le ambeyi wa siansɛ. Ombeyi wa siansɛ Nicola Fameli nembetshiyaka di’etena kadiayɛ lofulo la spirales yatanema lo etongelo, wɛ mbisholaka dia yekɔ efula ka mamba. Ndo lofulo lɔsɔ mbelamɛka Suite de Fibonacci. Bɛnyɛlɔ dia spirales koka mɛnama lo diangɔ efula, ɛnyɛlɔ: Woho wonga waa galaksi mɔtshi, lo mposo ya dikɔlɔ, lo akatshi w’esongo ndo lo alɛmbɔlɛmbɔ amɔtshi.a

⁸ La kalasa, ɔnayɛ koka mbeka diangɔ dimɔtshi diafɔna diatanema l’etongelo. Ɛnyɛlɔ, esongo efula wekɔ la ntahe yele la ntahe kina yahɔnyi. Ntahe kɔhama l’otondo w’osongo ndo mongaka l’asɔdi. Woho wakɔhama ntahe shɔ mbelamɛka ɔnɛ fractales. Bɛnyɛlɔ dia fractales tanemaka nto lo diangɔ dimɔtshi dia l’etongelo. Ko akasale dia diangɔ sɔ monga elangala ngasɔ? Ko akatonge diangɔ di’elangala sɔ? Lam’ayotalekaka ɔnayɛ nkana yimba lo ambola asɔ, mbayondotalekaka mfudia dietawɔ diande le Nzambi kakatonge diangɔ di’elangala sɔ tshɛ. (Hɛb. 3:4) L’etena kɛmɔtshi, wɛ koka ndjowoka dimbola nɛ: “Naka Nzambi kakatotonge, onde hatokoke mbuta dia nde akatosha nto ɛlɛmbɛ wendana la lɔkɛwɔ lo woho wa monga l’ɔngɛnɔngɛnɔ?” Wɛ koka mbolembetshiya dia Nzambi akatosha Bible dia tɛnya woho wakokaso monga l’ɔngɛnɔngɛnɔ.

NASA, ESA ndo Hubble Heritage (STScl/AURA)-ESA/Hubble Collaboration

ONGA LA LOWANDO L’ƆTƐ W’ATƆNDƆ WA LO BIBLE WENDANA LA LƆKƐWƆ

9. Kakɔna kakoka nkonya ɔnayɛ dia mboka ambola lo kɛnɛ kendana la nɛmɔ diele l’atɔndɔ wa lo Bible wendana la lɔkɛwɔ?

⁹ Naka ɔnayɛ ekɔ lo mboka ambola lo nɛmɔ diele l’atɔndɔ wa lo Bible wendana la lɔkɛwɔ, kete sala la wolo dia mbeya ɛkɔkɔ wawotshutshuya dia mboka ambola asɔ. Onde nde tonaka atɔndɔ wa lo Bible wendana la lɔkɛwɔ, ko kana onde nde heye nembetshiya dietawɔ diande di’Okristo etena kasawolande l’anto akina? Lo yoho kina, wɛ koka nkimanyiya ɔnayɛ dia nde mɛnya lowando lande l’atɔndɔ wendana la lɔkɛwɔ lo mbekaka dibuku Ngɛnangɛnaka la lɔsɛnɔ pondjo pondjo!b

10. Ngande wakokayɛ nkimanyiya ɔnayɛ dia nkanyiya lo dikambo dia diɔtɔnganelo diasande la Jehowa?

¹⁰ Keketsha ɔnayɛ dia mfudia diɔtɔnganelo diasande la Jehowa. Etena katayeke l’ɔnayɛ Bible, kotola yambalo yande lo ambola wakoka mbokonya dia mbisha kanyi yande ndo l’esato watanema lo dibuku Ngɛnangɛnaka la lɔsɛnɔ pondjo pondjo! (Tok. 20:5) Ɛnyɛlɔ, wekelo 8 mbɛdikaka Jehowa la ɔngɛnyi wayakiyanya dikambo di’ɔngɛnyi ande lo woho watoshande waohwelo wakoka tokokɛ ndo tokimanyiya. L’ɔkɔngɔ wa nyu nkɛtshanya 1 Joani 5:​3, wɛ koka mboka dimbola oko nɛ: “Lo mbeya dia Jehowa ekɔ Ɔngɛnyi wa dimɛna, ngande wakokaso mbɔsa kɛnɛ katotɛnde?” Dimbola sɔ koka mɛnama oko wɔdu, koko diɔ koka nkimanyiya ɔnayɛ dia mbɔsa ɛlɛmbɛ wa Nzambi oko ndjembetelo ya ngandji kande oya le so.—Isa. 48:​17, 18.

11. Ngande wakokayɛ nkimanyiya ɔnayɛ dia monga la lowando lo nɛmɔ diele l’atɔndɔ wa lo Bible? (Tokedi 2:​10, 11)

¹¹ Nyɔkɛtshanya wahɔ wakondjaso lo nkamba l’atɔndɔ wa lo Bible. Etena kadianyu Bible kana kasɛdingolanyu divɛsa dia lushi la lushi kaamɛ, nyɔkɛtshanya woho wakakimanyiya atɔndɔ wa lo Bible nkumbo kanyu. Ɛnyɛlɔ, onde ɔnayɛ mɛnaka wahɔ wakondjaso lo monga l’ohetoheto ndo la losembwe? (Hɛb. 13:18) Wɛ koka mbika epole ɔsɛkɛ lo woho wele nkamba l’atɔndɔ wa lo Bible tokokɛka lo demba ndo lo yimba. (Tok. 14:​29, 30) Sɛdingola atɔndɔ asɔ ayokimanyiya ɔnayɛ dia nyomoleka monga la lowando lo alako wa lo Bible ndo mbakitanyiya.—Adia Tokedi 2:​10, 11.

12. Ngande wakimanyiya papa kɛmɔtshi ɔnande dia monga la lowando lo nɛmɔ diele l’atɔndɔ wa lo Bible?

¹² Papa kɛmɔtshi kandjasɛ la France kelɛwɔ Steve, nembetshiyaka woho wakawakimanyiya nde la wadɛnde ɔnawɔ la mangase lelɛwɔ Ethan, lo mɛna ngandji kele lo ɛlɛmbɛ wa Jehowa lo mbuta ate: “Sho mbookaka ambola wele oko wanɛ: ‘Lande na katɔlɔmba Jehowa dia nɛmiya atɔndɔ ande? Ngande watɛnya dui nɛ dia Jehowa tokaka ngandji? Kakɔna kakoka ntomba naka wɛ hakambi la tɔndɔ nɛ?’” Asawo wa ngasɔ akakimanyiya Ethan dia monga la mbetawɔ ka wolo ɔnɛ kɛnɛ kata Jehowa kekɔ mɛtɛ. Steve kotshaka ate: “Oyango aso ele wa nkimanyiya Ethan dia mɛna dia lomba lele lo Bible ndeka la fwa lomba l’ana w’anto.”

13. Ngande wakoka ambutshi ndowanya anawɔ dia nkamba l’atɔndɔ wa lo Bible? Sha ɛnyɛlɔ.

¹³ Lowanya ɔnayɛ dia nkamba l’atɔndɔ wa lo Bible. Diaaso dimɔtshi diakokayɛ nsala dui sɔ ele etena kalongola ɔnayɛ ɔkɛndɛ wa tadia dibuku dimɔtshi la kalasa. Koka monga ko anto watɛkɛtama lo dibuku diakɔ wekɔ lo nsala awui wahangɛnyangɛnya Jehowa, ɛnyɛlɔ, vɔ mbeyaka ndjasha l’awui wa mindo wa dieyanelo ndo l’awui wa ngala. Koko dibuku sɔ diakafundama lo yoho yɛnya dia awui wa lɔkɔ bu kɔlɔ ndo ambadi adiɔ koka mbaokoya. Wɛ koka nkimanyiya ɔnayɛ dia nkana yimba lo etsha w’anto watɛkɛtama lo dibuku diakɔ lo mbɛdika l’atɔndɔ wa lo Bible. (Tok. 22:​24, 25; 1 Kɔr. 15:33; Flpɛ. 4:8) Kɛsɔ koka monga kɛnɛ kende la tɔ ohomba dia nsambisha ombetsha ande kana asekande wa la kalasa etena kakɛtshanyawɔ ɔkɛndɛ wakawawosha.

ETSHA ƆNAYƐ DIA MAMƐ WAETAWƆ ANDE

14. Dui diakɔna diakoka mbotsha Okristo w’ɔlɔngɔlɔngɔ wɔma, ndo lande na?

¹⁴ Tena dimɔtshi ɛlɔngɔlɔngɔ w’Akristo koka mboka wɔma mbutɛ anto awui wendana la dietawɔ diawɔ. Ɛnyɛlɔ, vɔ koka mboka wɔma etena katɛkɛtawɔ awui wendana l’ohilwelo la kalasa. Lande na? Ombetsha awɔ mbeyaka mbaetsha dia wetshelo wendana l’ohilwelo ekɔ dui dia mɛtɛ. Naka wɛ ekɔ ombutshi, ngande wakokayɛ nkimanyiya ɔnayɛ dia monga l’eshikikelo ɔnɛ kɛnɛ ketawɔnde kekɔ mɛtɛ?

15. Kakɔna kakoka nkimanyiya ɔlɔngɔlɔngɔ w’Okristo dia ndeka monga l’eshikikelo lo kɛnɛ ketawɔnde?

¹⁵ Kimanyiya ɔnayɛ dia ndeka monga l’eshikelo lo kɛnɛ ketawɔnde. Ɔnayɛ hakoke mboka nsɔnyi l’ɔtɛ wamondeya awui wa mɛtɛ wendana l’etongelo. (2 Tim. 1:8) Lande na? Nɛ dia ndo ambeyi wa siansɛ shihodiaka dia lɔsɛnɔ koondja oyaya kana lo kamula ka sso. Ambeyi wa siansɛ asɔ mbeyaka dia onto lakatonge diangɔ tshɛ ekɔ la yimba y’efula. Etombelo wonga la dui sɔ ele vɔ hawetawɔ wetshelo w’ohilwelo wetshama l’andja w’otondo. Ɔnayɛ koka nkeketsha dietawɔ diande lo nkanyiya ɛkɔkɔ wakakimanyiya anangɛso l’akadiyɛso dia mbetawɔ dia lɔsɛnɔ lakatongama.c

16. Ngande wakoka ambutshi nkimanyiya ɔnawɔ dia nde mbeya mamɛ dietawɔ diele la nde le Otungi? (1 Pe. 3:15) (Enda ndo osato.)

¹⁶ Kimanyiya ɔnayɛ dia mbeya mamɛ dietawɔ diele la nde le Otungi. (Adia 1 Petero 3:15.) Wɛ koka mɛna ohomba wa nyu nsɛdingola kaamɛ asawo wele lo jw.org wa lo serie “Les jeunes s’interrongent—Création ou évolution?” Oma laasɔ ɔnayɛ koka nsɔna elembetshielo ɛmɔtshi wɛnande ohomba dia nkimanyiya anto akina dia nshihodia ɔnɛ Otungi ɔmɔtshi ekɔ. Oholande dia nde hahombe mana l’asekande wa la kasala. Keketshande dia nkamba l’elembetshielo wa wɔdu ndo wosembwe naka onto ɔmɔtshi nangaka dia nsawola lo dikambo diakɔ. Ɛnyɛlɔ, osekande koka mbotɛ ate: “Dimi mbetawɔka paka kɛnɛ kɛnami, ndo latɛnaka Nzambi.” Okristo w’ɔlɔngɔlɔngɔ koka mbokadimola ate: “Ohokanyiya dia wɛ ekɔ lo teteta l’okonda wanganyi etale efula l’anto, ko wɛ ambotokoma l’oduwa ɔmɔtshi wakawatshime. Kakɔna kayokoyɛ lo yimba? Wɛ ayota ɔnɛ ekɔ onto ɔmɔtshi mbakatshime oduwa akɔ. Woho akɔ waamɛ mbele, ekɔ onto ɔmɔtshi lakatonge planɛtɛ kaso ndo kɛnɛ tshɛ kasɛna kele lɔkɔ!”

17. Ngande wakoka ambutshi nkimanyiya ɔnawɔ dia nyanga waaso wa mbetsha anto akambo wa mɛtɛ w’oma lo Bible? Sha ɛnyɛlɔ.

¹⁷ Keketsha ɔnayɛ dia nyanga waaso wa mbetsha anto akina akambo wa mɛtɛ w’oma lo Bible. (Rɔmɔ 10:10) Wɛ koka mbɛdika woho wetshaso anto akina akambo wendana la Bible la woho weka onto dia mpoma mishiki. L’etatelo, ombeki koka mbeka woho wa mpoma mishiki wa wɔdu. L’edjedja ka wonya, mpoma mishiki ndjokomaka wɔdu efula. Woho akɔ waamɛ mbele, ɔlɔngɔlɔngɔ w’Okristo koka ntatɛ la nkamba la toho ta wɔdu etena kasambishande anto akina. Ɛnyɛlɔ nde koka mimbola osekande la la kalasa ate: “Onde wɛ mbeyaka dia waa ɛjɛniɛrɛ mbokoyaka mbala efula diangɔ diakatongama? Konga kɛnya vidɛo ya diambo efula.” Oma l’ɔkɔngɔ wa mbɛnya vidɛo y’oma lo seri Onde akatongama kana akaye oyaya? nde mbeyaka mbombola ɔnɛ: “Naka ombeyi wa siansɛ nongolaka lotombo lo ɛngɔ kakandasangola oma l’etongelo, onto akɔna akoka ndeka nongola lotombo l’ɔtɛ wa kɛnɛ kɛnaso lo etongelo?” Yoho ya wɔdu shɔ koka nkimanyiya asekayɛ wa la kalasa dia mbeka awui efula wendana la Jehowa.

TETEMALA NKIMANYIYA ƆNAYƐ DIA NKEKETSHA MBETAWƆ KANDE

18. Ngande wakoka ambutshi ntetemala nkeketsha mbetawɔ k’ɔnawɔ le Nzambi?

¹⁸ Tekɔ lo nsɛna l’andja wele anto bu la mbetawɔ le Jehowa. (2 Pe. 3:3) Diakɔ diele ambutshi le, etena kekanyu Bible l’ɔnayu, nyowokeketsha dia mbeka awui wayofudia dilɛmiɛlɔ diande l’Ɔtɛkɛta wa Nzambi ndo l’atɔndɔ wendana la lɔkɛwɔ. Keketsha akoka ande w’ekanelo ka yimba lo mbɛnya awui wa diambo wele lo etongelo ka Jehowa. Kimanyiyande dia nshihodia prɔfɛsiya ya diambo yele lo Bible yamboshilaka kotshama. Ndo kɛnɛ koleki tshɛ, lɔmbaka kaamɛ l’ɔnayɛ ndo lo dikambo diande. Etena kasalayɛ ngasɔ, wɛ koka monga l’eshikikelo ɔnɛ Jehowa ayɔtshɔkɔla welo wadjayɛ dia nkimanyiya ɔnayɛ dia nkeketsha mbetawɔ kande.—2 Ɛk. 15:7.