Toyange osomba wayotshikala pondjo

1. Kakɔna kakatatshi Yeso kakahombe salema lo ntambe ka ntondo la Jɛrusalɛma?

YEMA tshitshɛ la ntondo ka nyɔi kande, Yeso Kristo akalembetshiya awui efula wendana la prɔfɛsiya kakahombe kotshama ntondo lo nshi y’ekomelo ya dikongɛ di’akambo di’ase Juda. Nde akasha ɔhɛmwɛlɔ dia lushi lɔmɔtshi osomba wa Jɛrusalɛma wakahombe ‘dingama l’asɔlayi.’ (Luka 21:20) Yeso akatɛ ambeki ande dia kam’ayowɛna asɔlayi w’ase Rɔmɔ asɔ, vɔ wakahombe minya demba aha la ntshimbatshimba.—Luka 21:​21, 22.

2. Alako akɔna wakasha Pɔɔlɔ Akristo w’ase Hɛbɛru la Judeya ndo la Jɛrusalɛma?

² Ɛnɔnyi engana eto la ntondo k’asɔlayi w’ase Rɔmɔ dinga Jɛrusalɛma, ɔpɔstɔlɔ Pɔɔlɔ akafunde mukanda w’ohomba efula welamɛ ɔnɛ dibuku dia Hɛbɛru. Lo mukanda akɔ, Pɔɔlɔ akasha Akristo wa la Judeya ndo wa la Jɛrusalɛma alako w’ohomba efula wakakoke mbakimanyiya ndo mbalɔngɔsɔla lo kɛnɛ kakaakongɛɛka la ntondo. Kakɔna mɛtɛ kakaakongɛɛka la ntondo? Jɛrusalɛma yakahombe ndanyema. Akristo asɔ wakakoke ntshikala la lɔsɛnɔ, paka naka vɔ ketawe ntshika mvudu, diangɔ ndo elimu awɔ. Diakɔ diele lo kɛnɛ kendana l’osomba wa Jɛrusalɛma, Pɔɔlɔ akafunde ate: “Lanɛ sho bu la osomba watshikala pondjo.” Oma laasɔ nde akakotsha ate: “Koko tekɔ lo kongɛɛ l’asolo walomɔlomɔ tshɛ osomba wayaye.”—Hɛb. 13:14.

3. Ele “osomba wele la atshina w’eshika,” ndo lande na keso l’ohomba awɔ?

³ Akristo wakɔshi yɛdikɔ ya ntshika Jɛrusalɛma ndo Judeya wakahomana ondo la lɔsɔkɔ ndo l’ɛhɛnyɔhɛnyɔ, koko yɛdikɔ shɔ yakashimbɛ nsɛnɔ yawɔ. Ɛlɔ kɛnɛ, anto mbeyaka mbuta dia tekɔ anto w’anyanya nɛ dia sho hatoyaɛkɛ lo falanga kana le anto dia nkandola ekakatanu wa l’andja. Ko lande na kasalaso ɔsɔnwɛlɔ ɔsɔ? Sho mbeyaka dia dikongɛ nɛ di’akambo diekɔ lo tshanda mɔtshi tsho. Sho tekɔ lo nyanga “osomba wele la atshina w’eshika,” “osomba wayaye,” mbuta ate Diolelo diaki Nzambi.a (Hɛb. 11:10; Mat. 6:33) Lo ɔtɛ a dui tshɛ wa sawo nɛ, tayɔsɛdingola: 1) Woho wakakimanyiya alako wa Pɔɔlɔ wakasambiyama Akristo wa lo ntambe ka ntondo dia ntetemala nyanga “osomba wayaye,” 2) woho wakaalɔngɔsɔla Pɔɔlɔ dikambo di’awui wakahombe ndja, ndo 3) woho watokimanyiya alako ande ɛlɔ kɛnɛ.

YAƐKƐ LE JEHOWA NƐ DIA NDE HAKƆSƐKAKI PONDJO

4. Lande na kaki Jɛrusalɛma ohomba efula le Akristo?

⁴ Jɛrusalɛma yaki ohomba efula le Akristo. Etshumanelo k’Akristo ka lo ntambe ka ntondo kakakengama lo 33 T.D., ndo ase olui-walɔmbɔla wakadjasɛka l’osomba akɔ. Ndo nto, Akristo efula waki la mvudu ndo wakayamɔtshɛ diangɔ efula l’osomba ɔsɔ. Koko, Yeso akahɛmɔla ambeki ande dia vɔ wakahombe ntomba oma la Jɛrusalɛma ndo oma la Judeya.—Mat. 24:16.

5. Ngande wakalɔngɔsɔla Pɔɔlɔ Akristo lo kɛnɛ kakahombe mbakomɛ?

⁵ Dia nɔngɔsɔla Akristo lo kɛnɛ kaki suke la mbakomɛ, Pɔɔlɔ akawakimanyiya dia vɔ mbidja yimba lo woho wakɔsaka Jehowa osomba wa Jɛrusalɛma. Pɔɔlɔ akawaohola dia lo ndjela kanyi ya Jehowa, tɛmpɛlɔ, ɔlɔndji w’ɛlɔmbɛdi ndo elambo wakalambɔmaka la Jɛrusalɛma komonga nto ekila. (Hɛb. 8:13) Anto efula wakadjasɛka l’osomba wakatone Mɛsiya. Tɛmpɛlɔ ka la Jɛrusalɛma komonga nto dihole diakasalemaka ɔtɛmwɛlɔ wa pudipudi wa Jehowa ndo tɔ kakahombe ndanyema.—Luka 13:​34, 35.

6. Lande na kaki alako wa Pɔɔlɔ watanema lo Hɛbɛru 13:​5, 6 ohomba efula le Akristo l’etena kɛsɔ?

⁶ Etena kakafundɛ Pɔɔlɔ ase Hɛbɛru mukanda, Jɛrusalɛma aki osomba waki la lokumu efula. Ofundji ɔmɔtshi w’ose Rɔmɔ wa l’etena kɛsɔ akelɛ Jɛrusalɛma ɔnɛ “osomba wakaleke lokumu l’etena kɛsɔ.” Ase Juda w’oma lo wedja efula wakayaka ɔnɔnyi tshɛ lo afɛstɔ ndo kɛsɔ akafudiaka ɔngɔnyi waki la osomba ɔsɔ. L’ɔtɛ wa dikambo sɔ mbele ondo ndo Akristo vɔ lawɔ wakakondjaka falanga efula. Ndo ondo l’ɔtɛ w’ɔkɔkɔ ɔsɔ mbakawatɛ Pɔɔlɔ ate: “Lo lɔsɛnɔ lanyu, tanyongake la ngandji ka falanga, koko nyɔngɛnangɛnake la kɛnɛ kele la nyu.” Oma laasɔ nde akayoshilaka ɛtɛkɛta w’oma l’Afundelo wɛnya eshikikelo kasha Jehowa ekambi ande l’onto ndo l’onto ɔnɛ: “Dimi hakotshikaki ndo hakokalɛki pondjo.” (Adia Hɛbɛru 13:​5, 6; Eoh. 31:6; Os. 118:6) Akristo wakadjasɛka la Jɛrusalɛma ndo la Judeya waki l’ohomba w’eshikikelo kɛsɔ. Lande na? Nɛ dia yema tshitshɛ l’ɔkɔngɔ wa vɔ nongola mukanda ɔsɔ, vɔ wakahombe ntshika mvudu yawɔ, elimu awɔ ndo diangɔ efula diaki la wɔ. Laasɔ vɔ wakahombe totatɛ yoho ya lɔsɛnɔ l’oyoyo dihole dikina ndo dui sɔ komonga wɔdu.

7. Lande na kahombaso nkeketsha wɛkamu aso le Jehowa oma ko kakianɛ?

⁷ Wetshelo le so: Kakɔna katokongɛɛ la ntondo? Ekomelo ka dikongɛ nɛ di’akambo lo “mfɔnu ka woke.” (Mat. 24:21) L’ɛnyɛlɔ k’Akristo wa lo ntambe ka ntondo, sho pombaka monga la mbetawɔ l’etena kɛnɛ ndo ndjalɔngɔsɔla dikambo dia mfɔnu kakɔ. (Luka 21:​34-36) Lo mfɔnu ka woke, sho mbeyaka nɔmbama dia ntshika diangɔ diaso dimɔtshi kana diangɔ diaso tshɛ, tele l’eshikikelo dia Jehowa hasɛkaki ekambi ande pondjo. Kaanga kakianɛ, la ntondo ka mfɔnu ka woke ntatɛ, tekɔ la diaaso dia mɛnya le onto akɔna ayaɛkɛso. Yambola wate: ‘Onde etsha ami ndo eyango ami mɛnyaka dia dimi ndjaɛkɛka aha lo ɔngɔnyi koko le Nzambi kandaka dia kokɛmi?’ (1 Tim. 6:17) Lo mɛtɛ, kaanga mbakokaso nkondja wetshelo oma lo kɛnɛ kakatombe lo ntambe ka ntondo, “mfɔnu ka woke” kayaye kayoyala woho wele katayalaka. Laasɔ, ngande wayoteya mɛtɛ kɛnɛ kayotohomba nsala etena kayotatɛ mfɔnu kakɔ?

KITANYIYA WANƐ WALƆMBƆLA

8. Kakɔna kakatɛ Yeso ambeki ande dia nsala?

⁸ Ɛnɔnyi engana eto l’ɔkɔngɔ w’Akristo nongola mukanda wakafundɛ Pɔɔlɔ ase Hɛbɛru, Akristo wakɛnyi asɔlayi w’ase Rɔmɔ wambodinga osomba wa Jɛrusalɛma. Ɔsɔ aki etena ka dimɛna le wɔ dia vɔ ndawɔ nɛ dia osomba wa Jɛrusalɛma wakahombe ndanyema. (Mat. 24:3; Luka 21:​20, 24) Ko lende akawahombe ndawɔ? Yeso akawatɛ tsho ɔnɛ: “Wanɛ wele la Judeya kawolawɔ otsha l’akona.” (Luka 21:21) Akona waki efula l’ɛtshi ka nkɛtɛ kɛsɔ. Laasɔ, ngande wakawakoke mbeya l’akona akɔna wakawahombe ndawɔ?

9. Lande na ondo kakahombe Akristo ndjakiyanya lo dikambo di’akona wakawahombe ndawɔ? (Enda ndo kartɛ.)

⁹ Tende akona amɔtshi wakahombe Akristo ndawɔ: Akona wa la Samariya, akona wa la Ngalileya, Dikona dia Hɛrɛmɔna, akona wa la Lɛbanɔna ndo akona wa la wedi wa Jɔrdana. (Enda kartɛ.) Esomba ɛmɔtshi wa lo ndjɛkɛ y’akona ɛsɔ wakakoke mɛnama oko ahole w’amɛna w’ekokelo le anto. Ɛnyɛlɔ, osomba wa Gamla, waki suke la dikona dimɔtshi di’otale efula ndo aki wolo efula di’onto nkoma lɛkɔ. Ase Juda amɔtshi wakɔsaka osomba ɔsɔ oko dihole dia dimɛna efula dia ndjashɛ. Koko, ase Rɔmɔ wakɔtwɛ osomba wa Gamla, wakoolanya ndo anto efula wa l’osomba akɔ wakadiakema.b

10-11. a) Ngande ondo wakalɔmbɔla Jehowa Akristo? (Hɛbɛru 13:​7, 17) b) Wahɔ akɔna wakakondja Akristo lo nkitanyiya wanɛ wakalɔmbɔlaka? (Enda ndo osato.)

¹⁰ Mɛnamaka dia Jehowa akalɔmbɔla Akristo lo tshimbo ya wanɛ wakalɔmbɔlaka etshumanelo. Ombeyi w’ɛkɔndɔ welɛwɔ Eusèbe, akayofundaka l’ɔkɔngɔ ate: “L’ekimanyielo ka Nzambi, ase etshumanelo ka la Jɛrusalɛma wakakondja wɛnɛlɔ wakalongola apami wakasɔnama; ɛnɛlɔ kakɔ kakawadjangɛ . . . dia vɔ monɔ oma l’osomba la ntondo ka ta ndo todjasɛ l’osomba ɔmɔtshi wa la Pereya welɛwɔ Pela.” Osomba wa Pela waki dihole dia dimɛna le Akristo dia vɔ ntshɔ lɛkɔ. Osomba akɔ komangana etale la Jɛrusalɛma ndo aki wɔdu le Akristo dia vɔ nkoma lɛkɔ. Ndo nto, anto efula wa la Pela komonga ase Juda, laasɔ vɔ kopembaka dia ndɔshana l’ase Rɔmɔ.—Enda kartɛ.

¹¹ Akristo wakalawɔ otsha l’akona wakakambe la dako dia Pɔɔlɔ dia ‘kitanyiyaka wanɛ walɔmbɔla’ lo etshumanelo. (Adia Hɛbɛru 13:​7, 17.) Etombelo wakonge la dui sɔ ele, ekambi wa Nzambi wakashimbamɛ. Ɔkɔndɔ shikikɛka dia Nzambi kokalɛ wanɛ tshɛ “[w]akakongaka osomba wele la atshina w’eshika,” mbuta ate Diolelo diaki Nzambi.—Hɛb. 11:10.

12-13. Ngande wakalɔmbɔla Jehowa ekambi ande lo tena dia wolo?

¹² Wetshelo le so: Jehowa kambaka la wanɛ walɔmbɔla dia mbisha ekambi ande ɛlɔmbwɛlɔ ka shikaa. Bible ndola tɔɔ la bɛnyɛlɔ diɛnya woho wakatondja Jehowa anami w’ɛkɔkɔ dia nɔmbɔla ekambi ande lo tena dia wolo. (Eoh. 31:23; Os. 77:20) Ndo sho lawɔ ɛlɔ kɛnɛ tekɔ lo mɛna mɛtɛ ka dikambo sɔ dia Jehowa ekɔ lo ntetemala nkamba la wanɛ walɔmbɔla dia nɔmbɔla ekambi ande.

¹³ Ɛnyɛlɔ, etena ka hemɔ ka COVID-19, ‘wanɛ walɔmbɔla’ wakasha tshumanelo ɛlɔmbwɛlɔ kahombama. Dikumanyi wakalongola ɛlɔmbwɛlɔ dia kotshaka ehomba wa lo nyuma w’anangɛwɔ l’akadiyɛwɔ. Yema tshitshɛ l’ɔkɔngɔ wa hemɔ ka COVID-19 ntatɛ, takasale losanganya la laande l’ɛtɛkɛta ndekana 500 lo tshimbo ya Ɛtɛrnɛtɛ, televiziɔ ndo aradiyo. Takatetemalaka nongola mbo ya ndɛ ya lo nyuma. Etombelo waki la dui sɔ ele, takatetemala monga kaamɛ. Sho koka monga l’eshikikelo dia oyadi ohemba tshɛ wakokaso mpomana la wɔ lo nshi yayaye, Jehowa ayotetemala nkimanyiya wanɛ walɔmbɔla dia nshikikɛ tɛdikɔ t’amɛna ta mbɔsa. Laadiko dia ndjaɛkɛ le Jehowa ndo nkitanyiya ɛlɛmbɛ ande, naa waonga akina wayotokimanyiya dia ndjalɔngɔsɔla dikambo dia mfɔnu ka woke ndo nsala akambo la lomba lo tena di’efukutanu?

TOKANE NGANDJI K’ONTO L’ƆNANGO NDO TOLONGƆNAKE

14. Lo ndjela Hɛbɛru 13:​1-3, waonga akɔna wakahombe Akristo nkɛnɛmɔla lo nshi y’ekomelo ka dikongɛ di’akambo di’ase Juda?

¹⁴ Etena kayotatɛ mfɔnu ka woke, tayonga l’ohomba wa mbokana ngandji k’onto l’ɔnango oleki woho wakatasalaka ntondo. L’etena kɛsɔ, tayohomba ndjela ɛnyɛlɔ k’Akristo wakasɛnaka la Jɛrusalɛma ndo la Judeya. Vɔ wakokanaka ngandji lam’asawɔ. (Hɛb. 10:​32-34) Koko otsha l’ɛnɔnyi w’ekomelo ka dikongɛ di’akambo di’ase Juda, Akristo wakahombe mbokanaka “ngandji . . . k’onto l’ɔnango” ndo “nongolaka angɛndangɛnda” lo yoho ya laande.c (Adia Hɛbɛru 13:​1-3.) Dui sɔ diayonga mɛtɛ ndo le so oko wayasukana ekomelo ka dikongɛ nɛ di’akambo.

15. Lande na kaki Akristo w’ase Hɛbɛru l’ohomba wa mbokana ngandji k’onto l’ɔnango ndo nongɔnaka l’ɔkɔngɔ wa dawo?

¹⁵ Etena kakadinge asɔlayi w’ase Rɔmɔ Jɛrusalɛma ndo kakawakalola aha la ntshimbatshimba, Akristo wakalawɔ paka la diangɔ yema tshitshɛ tsho. (Mat. 24:​17, 18) Vɔ wakahombe kimanyiyana lam’asawɔ etena kakawatatshɔka otsha l’akona ndo etena kakawakome la Pela. Aha la taamu, vɔ waki la ‘ehomba efula wa wanyandja,’ ndo kɛsɔ akakoke mbisha Akristo diaaso dia mɛnyanya ngandji ka mɛtɛ k’onto l’ɔnango ndo nongɔnaka lo sukanɛ onto l’ɔnango ndo kahanaka kɛnɛ kaki la wɔ.—Tito 3:14.

16. Ngande wakokaso mɛnya asekaso ambetawudi wele l’ohomba w’ekimanyielo kaso ngandji? (Enda ndo osato.)

¹⁶ Wetshelo le so: Ngandji totshutshuyaka dia nsukɛ asekaso atɛmɔdi etena kewɔ l’ohomba w’ekimanyielo kaso. Ekambi wa Nzambi efula wekɔ suke dia nkotsha ehomba wa lo nyuma ndo wa lo demba w’anangɛwɔ l’akadiyɛwɔ wakalawɔ l’ɔtɛ w’ata ndo l’ɔtɛ wa mpokoso y’oma lo diangɔ diakatongama. Kadiyɛso kɛmɔtshi ka l’Ukraine kakatshike luudu lande l’ɔtɛ wa ta akate ate: “Takɛnyi woho wakakambe Jehowa l’anangɛso dia tɔlɔmbɔla ndo tokimanyiya. Vɔ wakatolongola ndo wakatokimanyiya dimɛna efula l’Ukraine, la Hongrie ndo kakianɛ l’Allemagne.” Wanɛ wɛnya anangɛwɔ l’akadiyɛwɔ lokaho ndo wawakotshɛ ehomba awɔ, wekɔ dihomɔ diakamba la Jehowa.—Tok. 19:17; 2 Kɔr. 1:​3, 4.

17. Lande na kele ekɔ ohomba efula nkɛnɛmɔla ngandji k’onto l’ɔnango ndo lokaho oma ko kakianɛ?

¹⁷ Aha la taamu, ekimanyielo ka ngasɔ kayoleka monga ohomba lo nshi yayaye oleki nshi nyɛ. (Hab. 3:​16-18) Jehowa ekɔ lo tolowanya oma ko kakianɛ dia nkɛnɛmɔla ngandji k’onto l’ɔnango ndo lokaho, waonga wayotonga ohomba efula lo nshi yayaye.

KƐNƐ KATOKONGƐƐ LO NSHI YAYAYE

18. Ngande wakokaso mbokoya Akristo w’ase Hɛbɛru wa lo ntambe ka ntondo?

¹⁸ Oko washikikɛ ɔkɔndɔ, Akristo wakalawɔ otsha l’akona waki l’akoka wa mbewɔ mpokoso kakakomɛ Jɛrusalɛma. Vɔ wakatshike osomba, koko Jehowa kombatshika pondjo. Ko ayotota lo dikambo dia nshi yaso nyɛ? Hateye shikaa woho wayosalema akambo lo nshi yayaye. Koko Yeso akatɔhɛmɔla dia monga suke dia nkitanyiya. (Luka 12:40) Ɛlɔ kɛnɛ, sho lawɔ koka nkamba la kɛnɛ kamboteka oma lo mukanda wakafundɛ Pɔɔlɔ ase Hɛbɛru. Ndo tekɔ la eshikikelo katosha Jehowa k’ɔnɛ nde hatotshikaki ndo hatokalɛki pondjo. (Hɛb. 13:​5, 6) Nyɛsɔ toyange osomba watshikala pondjo, mbuta ate Diolelo diaki Nzambi, ndo tɔngɛnɛngɛnɛ l’ɛtshɔkɔ wa pondjo pondjo wayodiotela.—Mat. 25:34.