Lande na kele lokombo la Jehowa ohomba efula le so?

1-2. Ngande weyaso dia lokombo la Jehowa lekɔ ohomba efula le Yeso?

LOKOMBO la Jehowa mboleki ohomba le Yeso. Nde mbele onto lakaleke mbeyanya lokombo la She. Oko wakatɛnyi lo sawo di’etshi, Yeso aki suke dia mvɔ l’ɔtɛ wa lokombo la Jehowa ndo dia kɛnɛ tshɛ kalembetshiyalɔ. (Makɔ 14:36; Hɛb. 10:​7-9) Ndo l’ɔkɔngɔ w’Ɛlɔmbwɛlɔ kande k’ɛnɔnyi kinunu, Yeso ayonga suke dia nkimɔ lowandji lande tshɛ lo tshɛ le She l’ɔtɛ w’okidiamelo wa lokombo la Jehowa. (1 Kɔr. 15:​26-28) Ngandji kooka Yeso lokombo la Nzambi mɛnyaka nto akambo efula wendana la lɔngɛnyi lele lam’asande la She. Lɔngɛnyi lɔsɔ mɛnyaka dia Yeso mbokaka Jehowa ngandji k’efula.

² Yeso akaye la nkɛtɛ lo lokombo la She. (Jni. 5:43; 12:13) Nde akeyanya lokombo la She le ambeki ande. (Jni. 17:​6, 26) Nde aketsha ndo akasale ahindo efula lo lokombo la Jehowa. (Jni. 10:25) Lo mɛtɛ, Yeso akalɔmbɛ Jehowa dia nkokɛ ambeki ande “l’ɔtɛ wa lokombo [Lande].” (Jni. 17:11) Mbokɛmaka hwe dia lokombo la Jehowa lekɔ ohomba efula le Yeso oleki ɛngɔ kekina tshɛ. Ko ngande wakoka onto ɔmɔtshi mbuta dia nde ekɔ ombeki waki Yeso kana Okristo naka nde heye kana hakambe la lokombo la Jehowa?

3. Kakɔna kayotɔsɛdingola lo sawo nɛ?

³ Lam’ele tekɔ Akristo wa mɛtɛ, sho mbokoyaka Yeso lo mɛnya dilɛmiɛlɔ ndo ngandji kaso lo lokombo la Jehowa. (1 Pe. 2:21) Lo sawo nɛ, tayɛna lande na kakasha Jehowa lokombo lande le wanɛ wasambisha “lokumu l’ɔlɔlɔ . . . la Diolelo.” (Mat. 24:14) Tayɔsɛdingola nto ohomba wele la lokombo la Jehowa le so l’onto ndo l’onto.

“ANTO AMƆTSHI . . . DIKAMBO DIA LOKOMBO LANDE”

4. a) Ɔkɛndɛ akɔna wakasha Yeso ambeki ande la ntondo ka nde nkalola l’olongo? b) Dimbola diakɔna dionyiyama lo kɛnɛ kendana l’ɔkɛndɛ ɔsɔ?

⁴ Yema tshitshɛ la ntondo ka nde nkalola otsha l’olongo, Yeso akatɛ ambeki ande ate: “Nyu nyayolongola wolo lam’ayoya nyuma k’ekila le nyu ndo nyayoyala ɛmɛnyi ami la Jɛrusalɛma, lo Judeya y’otondo, la Samariya polo ndo l’ahole woleki etale wa lo nkɛtɛ.” (Ets. 1:8) Laasɔ lokumu l’ɔlɔlɔ lakahombe sambishama ahole tshɛ koko aha l’Isariyɛlɛ oto. Ɔnkɔnɛ, anto wa lo wedja tshɛ wakahombe nkondja diaaso dia nkoma ambeki waki Yeso. (Mat. 28:​19, 20) Koko Yeso akate ate: “Nyayoyala ɛmɛnyi ami.” Onde ambeki w’eyoyo asɔ wakahombe mbeya lokombo la Jehowa, ko kana wakahombe monga tsho ɛmɛnyi wa Yeso? Awui wofundami lo Etsha tshapita 15 wayotokimanyiya dia nkadimola lo dimbola sɔ.

5. Ngande wakɛnya apɔstɔlɔ ndo dikumanyi dia la Jɛrusalɛma ɔnɛ anto tshɛ waki l’ohomba wa mbeya lokombo la Jehowa? (Enda ndo osato.)

⁵ L’ɔnɔnyi wa 49 T.D., apɔstɔlɔ la dikumanyi dia la Jɛrusalɛma wakasangana dia nkɛtshanya kɛnɛ kakahombe nsala wanɛ waki kominya mpota dia vɔ nkoma ambetawudi. L’ekomelo k’ɔkɛtshanyelo ɔsɔ, Jakɔba y’ɔnango Yeso akate ate: “[Petero] akakɔndɔla dimɛna woho wakadje Nzambi ase wedja yimba mbala ka ntondo dia nsɔna anto amɔtshi oma l’atei awɔ dikambo dia lokombo lande.” Dia lokombo laki na lakatɛkɛtaka Jakɔba? Nde akashile ɛtɛkɛta w’omvutshi Amɔsɛ ate: “Dia atshikadi nyanga Jehowa l’otema ɔtɔi, kaamɛ l’anto wa lo wedja tshɛ welamɛ lo lokombo lami, mbata Jehowa.” (Ets. 15:​14-18) Ambeki w’eyoyo asɔ wakahombe mbeka aha tsho awui wendana la Jehowa koko wakahombe nto ‘mbelamɛ lo lokombo lande.’ Dui sɔ nembetshiyaka dia vɔ wakahombe mbeyanya lokombo laki Nzambi le anto akina ndo anto asɔ wakahombe mbaeya oko enyimpala wa lokombo lakɔ.

6-7. a) Lande na kakaye Yeso la nkɛtɛ? b) Naa ɔkɔkɔ okina wakaleke ohomba wakaye Yeso la nkɛtɛ?

⁶ Lokombo Yeso nembetshiyaka “Jehowa ekɔ Panda,” ndo Jehowa akakambe la Yeso dia nshimbɛ anto tshɛ wele la mbetawɔ le nde ndo le Ɔnande. Yeso akaye lanɛ la nkɛtɛ dia ndjokimɔ lɔsɛnɔ lande lo dikambo dia anto tshɛ. (Mat. 20:28) Anto wayoshimbamɛ ndo wayokondja lɔsɛnɔ la pondjo diɛsɛ l’oshinga w’etshungwelo wakafute Yeso.—Jni. 3:16.

⁷ Ko lande na kahomba anto tokoshimbamɛ ntondo? L’ɔtɛ wa kɛnɛ kakatombe l’ekambɔ k’Ɛdɛna. Oko wakatadiɛnyi lo sawo dietshi, ambutshi aso wa ntondo mbuta ate Adama l’Eva wakatɔmbɔkwɛ Nzambi diakɔ diakatashisha diɛsɛ dia nsɛna pondjo pondjo. (Eta. 3:​6, 24) Koko, Yeso akaye la nkɛtɛ dia ndjosala dui dimɔtshi di’ohomba efula oleki tsho nshimbɛ ana wa Adama l’Eva. Satana akate awui efula wa kashi lo lokombo la Jehowa. (Eta. 3:​4, 5) Laasɔ, panda ka tokanula ta Adama l’Eva kakendanaka la dui dimɔtshi diakaleke ohomba, mbuta ate okidiamelo wa lokombo la Jehowa. Yeso mbakasungana nsala dui sɔ, nɛ dia nde aki onyimpala wa Jehowa ndo nde akasale lo yoho ya kokele kɛnɛ tshɛ kakalangaka Jehowa dia nde nsala.

8. Kakɔna kakahombe mbeya wanɛ tshɛ waki la mbetawɔ le Yeso?

⁸ Wanɛ tshɛ waki la mbetawɔ le Yeso, oyadi ase Juda kana ase Wedja, wakahombe mbeya ɔnɛ laki Kiɔkɔ ya panda kawɔ, mbuta ate She aki Yeso, Jehowa Nzambi. (Jni. 17:3) Ndo nto oko Yeso, vɔ wakahombe mbeyama lo lokombo la Jehowa. Vɔ wakahombe nto nshihodia ohomba wele l’okidiamelo wa lokombo lakɔ. Panda kawɔ kakalemanɛka la dikambo sɔ. (Ets. 2:​21, 22) Ɔnkɔnɛ ambeki tshɛ wa kɔlamelo waki Yeso wakahombe mbeka akambo wendana la Jehowa ndo la Yeso. Sho koka mɛna lande na kakakomiya Yeso dɔmbɛlɔ diande diofundami lo Joani 17 l’ɛtɛkɛta ɛnɛ ate: “Dimi lakawaewoya lokombo layɛ ndo layoliewoya, dia ngandji kakayamboke monga le wɔ ndo dimi monga kaamɛ la wɔ.”—Jni. 17:26.

“NYU NYEKƆ ƐMƐNYI AMI”

9. Ngande wakokaso mɛnya dia lokombo la Jehowa lekɔ ohomba le so?

⁹ Oma lo kɛnɛ kambotɔsɛdingola, mbokɛmaka hwe dia ambeki tshɛ wa Yeso pombaka ndjasha l’okidiamelo wa lokombo la Jehowa. (Mat. 6:​9, 10) Vɔ pombaka mbɔsa lokombo la Jehowa la nɛmɔ oleki lokombo lokina tshɛ. Kɛsɔ nɔmbamaka dia vɔ nsala awui amɔtshi. Laasɔ, kakɔna kakokaso nsala dia nkidia lokombo la Jehowa ndo mɛnya dia kɛnɛ kakate Satana lo dikambo dia Jehowa komonga mɛtɛ?

10. Kakɔna kadiaso l’Isaya tshapita 42 polo 44? (Isaya 43:9; 44:​7-9) (Enda ndo osato.)

¹⁰ Lo Isaya tshapita 42 polo 44, sho mbekaka kɛnɛ kakokaso nsala dia nkidia lokombo la Jehowa. Lo totshapita tɔsɔ, Jehowa nɔmbaka wanɛ wahɔtɛmɔla dia mɛnya dia tozambizambi tawɔ tekɔ mɛtɛ. Nde nɔmbaka nto ɛmɛnyi wakoka mɛnya dia tozambizambi tɔsɔ tekɔ mɛtɛ. Koko ndooko onto lasala dui sɔ!—Adia Isaya 43:9; 44:​7-9.

11. Oko wofundamidiɔ l’Isaya 43:​10-12, kakɔna katɛ Jehowa ekambi ande?

¹¹ Adia Isaya 43:​10-12. Jehowa mbutɛka ekambi ande ate: “Nyu nyekɔ ɛmɛnyi ami, . . . ndo dimi kele Nzambi.” Jehowa mbokaka ekambi ande dimbola nɛ ate: “Onde ekɔ Nzambi kekina laadiko diami?” (Isa. 44:8) Tekɔ la diɛsɛ dia woke dia nkadimola lo dimbola sɔ. Oma l’ɛtɛkɛta ndo oma l’etsha aso, sho mɛnyaka dia Jehowa mbele Nzambi ɔtɔi ka mɛtɛ. Lokombo lande mbele laadiko dia nkombo kina tshɛ. Sho mɛnyaka oma lo yoho yaso ya lɔsɛnɔ dia sho mbokaka Jehowa ngandji ndo ɔnɛ tekɔ la kɔlamelo le nde oyadi ehemba tshɛ wakoka Satana tela. Lo yoho shɔ, sho mongaka la diɛsɛ dia nkimanyiya l’okidiamelo wa lokombo Lande.

12. Ngande wakakotshama prɔfɛsiya katanaso lo Isaya 40:​3, 5?

¹² Etena kasukɛso lokombo la Jehowa kana lokumu lande, sho mbokoyaka Yeso Kristo. Isaya akatatshi dia onto ɔmɔtshi ‘ayɔmbɛ [kana ‘ayɔlɔngɔsɔla,’ nɔtɛ] mboka ka Jehowa.’ (Isa. 40:3) Ngande wakakotshama prɔfɛsiya kɛsɔ? Joani Obatizanyi akalɔngɔsɔla mboka ka Yeso, ɔnɛ lakaye ndo lakatɛkɛta lo lokombo la Jehowa. (Mat. 3:3; Makɔ 1:​2-4; Luka 3:​3-6) Prɔfɛsiya kakɔ kaamɛ kakate ɔnɛ: “Lotombo la Jehowa layoshɔma.” (Isa. 40:5) Ngande wakakotshama ɛtɛkɛta ɛsɔ? Lam’akaye Yeso la nkɛtɛ, nde aki onyimpala wa Jehowa watekana Jehowa ndamɛ mbaki la nkɛtɛ.—Jni. 12:45.

13. Ngande wakokaso mbokoya Yeso?

¹³ Oko Yeso, sho tekɔ Ɛmɛnyi wa Jehowa. Sho ndɔtaka lokombo la Jehowa ndo sho mbutɛka anto tshɛ wahomana la so awui ndo etsha ande wa diambo. Koko dia nsala dui sɔ dimɛna, sho pombaka nto mbeyanya ɔkɛndɛ wa diambo wele la Yeso l’okidiamelo wa lokombo la Jehowa. (Ets. 1:8) Yeso ekɔ onto lakewoya lo yoho ya dimɛna akambo wendana la Jehowa ndo sho ndjelaka ɛnyɛlɔ kande. (Ɛny. 1:5) Ngande wakokaso mɛnya nto dia lokombo la Jehowa lekɔ ohomba efula le so?

TOHO TOKINA TAKOKASO MƐNYA DIA LOKOMBO LA JEHOWA LEKƆ OHOMBA EFULA LE SO

14. Oko wofundamidiɔ lo Osambo 105:​3, ngande wayaokaso lo dikambo dia lokombo la Jehowa?

¹⁴ Tekɔ l’ofunu wa lokombo la Jehowa. (Adia Osambo 105:3.) Jehowa ngɛnangɛnaka efula etena kongaso l’ofunu lo dikambo diande. (Jɛr. 9:​23, 24; 1 Kɔr. 1:31; 2 Kɔr. 10:17) ‘Ndjafuna le Jehowa’ nembetshiyaka monga l’ofunu lo dikambo dia Jehowa oko wende Nzambi kaso. Sho mongaka la nɛmɔ lo mbutɛ anto akina ɔnɛ Jehowa ekɔ ekila ndo ɔnɛ kɛnɛ tshɛ kasalande kekɔ ɔlɔlɔ. Hatohombe pondjo mboka nsɔnyi mbutɛ asekaso wa l’olimu, wa la kalasa, asukanyi aso ndo anto akina ɔnɛ tekɔ Ɛmɛnyi wa Jehowa. Diabolo nangaka dia sho ntshika mbutɛ anto akina akambo wendana la lokombo la Jehowa. (Jɛr. 11:21; Ɛny. 12:17) Lo mɛtɛ, Satana l’amvutshi wa kashi nangaka nkonya anto dia vɔ mbohɛ lokombo la Jehowa. (Jɛr. 23:​26, 27) Koko, lam’ele sho mbokaka lokombo la Jehowa ngandji, sho nangaka mbotombola “lushi l’otondo.”—Os. 5:11; 89:16.

15. Kakɔna kalembetshiya mbelɛ lokombo la Jehowa?

¹⁵ Sho tetemalaka mbelɛ lokombo la Jehowa. (Jɔɛ. 2:32; Rɔmɔ 10:​13, 14) Mbelɛ lokombo la Jehowa nembetshiyaka awui efula aha tsho lieya ndo nkamba la lɔ. Sho mbɔsaka Nzambi oko onto la mɛtɛ mɛtɛ lo ndjaɛkɛ le nde, lo mendɛ le nde dia tokimanyiya ndo lo tɔlɔmbɔla. (Os. 20:7; 99:6; 116:4; 145:18) Sho mbewoyaka anto akina lokombo lande ndo waonga ande, mbakimanyiyaka dia vɔ ndjatshumoya ndo dia vɔ nsala kɛnɛ tshɛ kakokawɔ nsala dia mbetawɔma le Jehowa.—Isa. 12:4; Ets. 2:​21, 38.

16. Ngande wakokaso mɛnya dia Satana ekɔ kanga kashi?

¹⁶ Tekɔ suke dia nsowa l’ɔtɛ wa lokombo la Jehowa. (Jak. 5:​10, 11) Sho mɛnyaka dia Satana ekɔ kanga kashi lo ntshikala la kɔlamelo le Jehowa etena kasowaso. Lo nshi ya Jɔbɔ, Satana akate lo dikambo dia wanɛ wakambɛ Jehowa ate: “Onto ayokimɔ kɛnɛ tshɛ kele la nde dikambo dia lɔsɛnɔ lande.” (Jɔbɔ 2:4) Satana mbutaka dia anto kambɛka Jehowa paka etena kewɔ la lɔsɛnɔ la dimɛna ndo naka vɔ mpomana l’ekakatanu, kete wayowɔsɛka. Jɔbɔ pami ka kɔlamelo akɛnya dia awui asɔ tshɛ komonga mɛtɛ. Ndo sho lawɔ tekɔ la diɛsɛ dia mɛnya dia oyadi ohemba tshɛ wakoka Satana tela, hatokaki Jehowa ɔkɔngɔ pondjo. Sho koka monga l’eshikikelo dia Jehowa ayotokokɛ l’ɔtɛ wa lokombo lande.—Jni. 17:11.

17. Oko wofundamidiɔ lo 1 Petero 2:​12, lo yoho yakɔna nto yakokaso ntombola lokombo la Jehowa?

¹⁷ Sho mɛnyaka dilɛmiɛlɔ diaso lo lokombo la Jehowa. (Tok. 30:9; Jɛr. 7:​8-11) Lam’ele tekɔ enyimpala wa Jehowa, sho koka ntombola kana mbisha lokombo lande nsɔnyi. (Adia 1 Petero 2:12.) Diakɔ diele, sho nangaka nsala kɛnɛ tshɛ kakokaso nsala dia ntombola Jehowa oma l’ɛtɛkɛta ndo oma lo lɔkɛwɔ laso. Etena kasalaso ngasɔ, kaanga mbeso keema kokele, tayotetemala nɛmiya lokombo la Jehowa.

18. Naa yoho kina yakokaso mɛnya dia lokombo la Jehowa lekɔ ohomba efula le so? (Enda ndo nɔtɛ.)

¹⁸ Sho ndekaka ndjasha lo lokumu lele la lokombo la Jehowa oleki lokumu laso. (Os. 138:2) Lande na kele dui sɔ ohomba efula? Nɛ dia ngandji kokaso lokombo la Jehowa koka ndanya lokumu laso le wanɛ wotodingi.a Yeso aki suke dia mvɔ nyɔi ka nsɔnyi efula oko ondjakanyi l’oyango wa ntombola lokombo la Jehowa. Nde “akɔnyɔla nsɔnyi” lo woho ɔnɛ wele nde kondeka ntshimba wɔɔngɔ kana ndjakiyanya lo kɛnɛ kakafɔnyaka anto lo dikambo diande. (Hɛb. 12:​2-4) Nde akayashaka lo osalelo wa lolango laki Nzambi.—Mat. 26:39.

19. Ngande wayaokayɛ lo dikambo dia lokombo la Jehowa ndo lande na?

¹⁹ Sho tekɔ l’ofunu l’ɔtɛ wa lokombo la Jehowa ndo tekɔ la nɛmɔ di’efula dia mbelamɛ Ɛmɛnyi wa Jehowa. Lam’ele lokombo la Jehowa lekɔ ohomba efula le so, sho tayotetemala mbotombola kaanga etena katɔnyɔla anto akina. Lokombo la Jehowa lekɔ ohomba efula le so oleki kaanga lokumu laso. Ɔnkɔnɛ, toyashikikɛ dia ntombola lokombo la Jehowa oyadi kɛnɛ tshɛ kayosala Satana dia tɔkɔmɔla. Lo nsala ngasɔ, tayɛnya dia lokombo la Jehowa lekɔ ohomba efula le so paka oko welɔ ohomba efula ndo le Yeso Kristo.