Yeso “akeke dia monga la okitanyiya”

Yeso akakitanyiyaka Jehowa tena tshɛ. (Jni. 8:29) Laasɔ, lande na kata Bible ɔnɛ: “Nde akeke dia monga la okitanyiya oma lo asui wakandasowe”?—Hɛb. 5:8.

Lam’akinde la nkɛtɛ, Yeso akahomana l’awui wakinde kopomana la wɔ lam’akinde l’olongo. Nde akodiama oma le ambutshi wakayakimɔ le Jehowa, koko vɔ komonga kokele. (Luka 2:51) Nde akasoyama oma le ewandji wa kɔlɔ w’ɛtɛmwɛlɔ ndo oma le ewandji wa lɛɛta. (Mat. 26:59; Makɔ 15:15) Ndo nde akavu nyɔi ka paa efula. Bible mbutaka ɔnɛ: “Nde akayakitshakitsha ndo akonge la okitanyiya polo ndo lo nyɔi.”—Flpɛ. 2:8.

Awui wakahomana la Yeso asɔ, wakawetsha dia monga l’okitanyiya lo woho wakinde kokoka pondjo mbeka etena kakinde l’olongo. Laasɔ, nde akakome Nkumekanga ka kokele ndo Ɔlɔmbɛdi wa Laadiko wakoka tooka kandji. (Hɛb. 4:15; 5:9) Yeso akaleke monga la nɛmɔ efula le Jehowa l’ɔkɔngɔ wa mbeka okitanyiya oma l’asui wakandasowe. Sho lawɔ koka monga la nɛmɔ di’efula le Jehowa ndo nde koka nkamba la so l’oseka ɔkɔndɛ tshɛ wakokande tosha etena katetemalaso mbokitanyiya kaanga la ntondo k’ekakatanu.—Jak. 1:4.