Ekokelo ka wamato—Kanyi ya Bible lo dikambo sɔ

“Etena kakimi leke dikɛnda, enondo ami la pami akambutɛka ndo akasalɛka akambo wa kɔlɔ oseka lushi tshɛ. L’ɔkɔngɔ wa dimi ntshukama, okilo ami wa womoto akatetemala salɛmi kɔlɔ. Nde la okilo ami wa pami, wakasalɛka akambo oko ɔhɔmbɔ. Lakalange ndjaadiaka.”—Madhu,a Inde.

Organisation mondiale de la santé shikikɛka ɔnɛ: “L’andja w’otondo, anto wekɔ lo salɛ wamato awui wa kɔlɔ efula.” Vɔ mbutaka dia womoto ɔtɔi lo asato salemɛka kɔlɔ kana vɔ mbeyanaka lande la wolo lo ntena dimɔtshi dia lo lɔsɛnɔ.

Naka dui sɔ diambokokomɛka, wɛ mbeyaka ndjaoka lo wale wa salemɛ kɔlɔ ka lo demba kana mboka wɔma w’onto ɔmɔtshi mbeyana layɛ la wolo lo dihole tshɛ dieyɛ. Lam’ele awui asɔ wekɔ lo salema nɛ dia wɛ ekɔ womoto, wɛ mbeyaka ndjɔfɔnya di’apami ‘hawɔshi wamato la nɛmɔ.’ Ko naa kanyi ya Nzambi lo dikambo dia wamato?

Ngande wɔsa Nzambi wamato?

Divɛsa: ‘Nzambi kakatonge pami la womoto.’—Etatelo 1:27.

Elembetshielo: Nzambi mbakatonge apami la wamato. Nde mbaɔsaka vɔ tshɛ la nɛmɔ. Laadiko dia laasɔ, nde nongamɛka di’omi “nanga wadɛnde oko wayalangande,” koko aha nyanga dia mbaahemɛ la ɛtɛkɛta wa kɔlɔ kana wa djawudi. (Ɛfɛsɔ 5:33; Kɔlɔsayi 3:19) Lo mɛtɛ, ekokelo ka wamato ekɔ dui di’ohomba efula le Nzambi.

“Etena kakimi dikɛnda, ewotɔ aso ɛmɔtshi wakeyana lami la wolo. Etena kakimi l’ɛnɔnyi 17, owandji ami akamanɛ dia salɛmi kɔlɔ naka hambeyani la nde. Etombelo waki la dui sɔ ele, lakasalemɛ akambo aha la dilɛmiɛlɔ oma le omɛmi, ambutshi ami ndo oma le asukanyi aso. Koko l’ekomelo, lakayekaka awui wendana la Otungi aso Jehowa.b Nde mbɔsaka wamato la nɛmɔ. Dui sɔ diakashikikɛ dia nde mbokakami ngandji ndo mbɔsakami la nɛmɔ lo washo ande.”—Maria, Argentine.

Kakɔna kakoka kokimanyiya?

Divɛsa: “Ɔngɛnyi ɔmɔtshi waleka mbekesanɛ la onto ndeka ndo ɔnango.”—Tokedi 18:24.

Elembetshielo: Ɔngɛnyi wa mɛtɛ ayokosukɛ. Naka wɛ mbeyaka dia dui nɛ diayokokimanyiya, kete sholɛ onto ɔmɔtshi lɛkɛyɛ otema nsaki yayɛ.

“L’edja k’ɛnɔnyi 20, hambute ndooko onto dia wakeyana lami la wolo. Etombelo waki la dui sɔ ele, dimi komonga la ɔngɛnɔngɛnɔ, laki la lɔkɔnyɔ l’efula ndo lakakɔmɔ. Koko, etena kakamatɛ onto ɔmɔtshi laki suke dia pokamɛmi dui sɔ, lakayaoke dimɛna efula.

Divɛsa: “Nyokitsha ekiyanu anyu tshɛ le [Nzambi], nɛ dia nde ndjakiyanyaka dikambo dianyu.”—1 Petero 5:7.

Elembetshielo: Nzambi kohokamɛka etena kɔlɔmbayɛ. (Osambo 55:22; 65:2) Lam’ele nde ndjakiyanyaka dikambo diayɛ, nde koka kokimanyiya dia wɛ nshihodia nɛmɔ diele layɛ lo washo ande.

“Mbeka akambo wendana la Jehowa, akatatɛ kimanyiyami dia ndeka ndjaoka dimɛna lo yimba. Kakianɛ, lokoka nɔmba Nzambi ndo mbotɛ woho wayaokami. Nde ekɔ oko ɔngɛnyi washihodia mɛtɛ nsaki yami.”—Ana, Belize.

Onde Nzambi hatokomiya akambo wa kɔlɔ wasalɛwɔ wamato?

Divɛsa: “[Jehowa] . . . ayosambolɛ ɔna etshike ndo wanɛ wambominɔma, diaha onto okovɔ lele la nkɛtɛ mbaotsha wɔma nto.”—Osambo 10:​17, 18.

Elembetshielo: Kem’edja, Nzambi ayanga nkomiya awui waha la losembwe, mbidja ndo akambo wa djawudi ndo wa ngala wasalɛwɔ wamato.

“Lakakimanyiyama dia mbeka ɔnɛ Jehowa ayanga nkomiya kem’edja awui wa kɔlɔ wasalɛwɔ wamato ndo ana wa wamato. Dui sɔ diakambisha wɔladi wa lo yimba.”—Roberta, Mexique.

Dia mbeka awui efula wendana la woho washa Bible elongamelo, lande na kahombaso ndjaɛkɛ lo alaka wa lɔkɔ ndo woho washa Ɛmɛnyi wa Jehowa anto akina ekimanyielo kendana la Bible ɛlɔ kɛnɛ, lam’alangayɛ, lɔmba dia onto ɔmɔtshi ndjokenda.